Rebaleishan 2:12 - Kriol Baibul

¹² Brom deya det men bin dalim mi blanga raidimdan dijan wed langa det einjul blanga det tjetj langa det taun gulum Pegamam. Det men bin abum det bigwan naif garram dubala shapwan said langa im mawus. En dijan na det wed brom im.

Rebaleishan 2:12 Iomraidhean Croise

Aisaiya 11:4

Detlot powan pipul en detlot pipul hu nomo garram enibodi, garra abum feyago en jidan brabli gudbalawei. Det wed blanga im garra jidan jis laik det wadi blanga panishim detlot nogudbala pipul.

Aisaiya 49:2

Imbin meigim mi tok streidat langa najalot pipul, en det wed bin gowin langa olabat jis laik shapwan naif. Imbin oldei kipum mi brabli seifwan garram im pawa.

Hibrus 4:12

Wal wi garra bilib langa God wed brabliwei, dumaji det wed im trubala, en im wek langa wi laif. Det wed im jis laiga bigwan naif garram dubala shapwan said, en im gowin rait insaid langa wi weya det filing blanga wi jidan, en im meigim wi sabi weya wi rong, dumaji im jadjim wi blanga ebrijing weya wi oldei jinggabat en wandim.

Rebaleishan 1:11

“Yu raidimdan langa rolapwan peipa ebrijing weya yu garra luk, en yu garra jandim det peipa langa detlot 7 tjetj deya langa detlot taun gulum Efasas, Semena, Pegamam, Thaiyataira, Sadis, Filadelfiya en Leiyadasiya.” Lagijat na det sambodi bin tok.

Rebaleishan 1:16

Langa im raidensaid bingga imbin holdim 7 sta, en wanbala bigwan naif garram dubala shapwan said bin kamat brom im mawus, en det feis blanga im bin brabli shainiwan jis laik det san weya jidan langa top.

Rebaleishan 19:21

en det raida bin binijimap ol detlot solja blanga dubala garram det bigbala naif langa im mawus, en detlot bard olabat bin dagadagat detmatj bifpat blanga ol detlot solja na.

Rebaleishan 2:1

Brom deya det men bin dalim mi blanga raidimdan dijan wed langa det einjul blanga det tjetj langa det taun gulum Efasas. Det men bin holdim detlot 7 sta langa im raidensaid bingga, en imbin wok langa midul langa detlot 7 goldinwan lempsten. En dijan na det wed brom im.

Rebaleishan 2:16

“Wal yu garra libum detkain ting en kambek langa mi. En if yu nomo kambek langa mi, wal ai garra kaman langa yu dregli en fait langa yu garram dijan bigbala shapwan naif iya langa main mawus.

Jadjis 3:16

Bat bifo imbin go langa det king, imbin meigim longwan naif, en imbin shapinim det longwan naif tusaid langa det bleidpat, en afta imbin taiyimap det longwan naif langa im raidensaid insaidwei langa im klos.