Nambas 28:3 - Kriol Baibul

^3-8 Wal Mosis bin dalim detlot Isreil pipul det wed blanga YAWEI, “Dijan na det ofring yumob garra gibit langa YAWEI. Longtaim, deya langa det hil kantri gulum Sainai, imbin det fes taim weya melabat bin gibit det barnapwan ofring, en det smel blanga det ofring garra meigim YAWEI brabli gudbinji. Wal blanga det barnapwan ofring blanga ebridei, yumob garra gibit dubala boiwan ship, wan yiya ol, en nomo garram enijing rong langa dubala bodi. Yumob garra gibit det feswan ship ailibala, en yumob garra gibit det najawan ship wen det sangodan, garram det sid daga ofring. Im wan kilogrem flauwa miksap garram wan lita det brabli gudwan oliboil. Blanga det wain ofring garram det feswan ship, yumob garra spilim wan lita wain langa det teibul blanga ofring. Langa sangodan, yumob garra gibit det sekanwan ship seimwei laik wen yumob bin dum ailibala, garram det sid daga ofring en det wain ofring. Det smel blanga det ofring garra meigim YAWEI brabli gudbinji. Wal lagijat na yumob garra oldei gibit det dubala barnapwan ofring ebridei langa YAWEI.” Lagijat na Mosis bin tok.

Nambas 28:3 Iomraidhean Croise

Fes Kranakuls 16:40

Ebri ailibala en sangodantaim deibin oldei barnimbat detlot sekrifais ofring holot langa det teibul blanga ofring, seimwei laik weya deibin raidimdan langa det buk garram ola lowa weya YAWEI bin gibit ola Isreil pipul.

Sekan Kranakuls 8:13

Imbin gibit barnapwan ofring laik det lowa blanga Mosis bin tok blanga ebri seikridwan dei. Olabat bin ebri Sebathdei, en det Nyumanth serramoni en detlot thribala serramoni dei abum ebriyiya gulum Damba Nomo Garram Raising serramoni, en serramoni gulum Kukwan Daga en serramoni gulum Hampi.

Esra 3:5

en deibin oldei barnim ola sekrifais serramoni holbit. En seimwei du deibin dum langa det Serramoni gulum Nyumanth en langa det najalot serramoni weya deibin weship langa YAWEI det trubala God, en nomeda deibin oldei gibit detlot sekrifais serramoni dei bina gibit mowa gudbinjiwei langa YAWEI det trubala God.

Denyul 11:31

Sambala solja blanga det king garra meigim det Serramoni Pleis nomo klinwan blanga serramoni. Olabat garra stapam detlot sekrifais ofring weya detlot Juwish pipul bin gibitbat ebridei, en detlot solja garra pudumap det brabli nogudbala ting langa det teibul blanga ofring blanga ola sekrifais.”

Denyul 12:11

“Brom det taim na wen dei nomo go ebridei blanga gibitbat sekrifais, en sambodi garra pudumap det brabli nogudwan ting langa det Serramoni Pleis, 1,290 dei garra gopas.

Denyul 8:11

Im nomo bin teiknodis langa God, det brabli haibala bos blanga det ami langa top en imbin stapam detlot sekrifais weya deibin meigim ebridei langa God, en imbin meigim nogud det Serramoni Pleis.

Denyul 8:13

Afta na aibin irrim wanbala einjul bin askim najawan einjul. Imbin tok, “Yu sabi det drim Denyul bin abum? Wal wotaim yu reken dei garra stat gibitbat detlot sekrifais ofring blanga ebridei? Wotaim yu reken detlot nogudbala ting garra binij? En det hon weya pudumdan detlot ami blanga hebin en det Serramoni Pleis, wotaim yu reken im garra binij?”

Labidakas 3:5

En detlot serramonimen garra barnimap detlot langa det teibul blanga ofring garram det barnapwan ofring. Det smel blanga det ofring garra meigim mi brabli gudbinji.

Labidakas 6:9

“Gibit Eran en im sanmob detlot lowa blanga det barnapwan ofring. Wal det ofring dei garra libum langa det teibul blanga ofring olnait, en dei garra barnimbat faiya olnait.

Eimos 4:4

YAWEI det boswan God im tok langa yumob Isreil pipul, “Yumob gin go langa det pleis gulum Bethel blanga weship, bat wen yumob dum lagijat, yumob kaan meigim miselp gudbala dumaji yumob kipgon dumbat nogudbala ting. En nomeda yumob go langa det najawan pleis gulum Gilgel blanga weship, bat stil yumob oldei dumbat nogudbala ting. Ailibala ebridei yumob gin bringimap buligi o ship blanga barnim en gibit sekrifais ofring, en ebri 3 dei yumob gin bringimap wanbala ting blanga ebri tenbala enijing blanga yumob.

Nambas 28:10

Dijan barnapwan ofring yumob garra gibit langa det namba 7 dei, en garram det ebridei ofring en garram det wain ofring du.” Lagijat na Mosis bin tok.

Nambas 28:15

Ebridei yumob garra gibit det barnapwan ofring garram det wain ofring, en yumob garra gibit wan boiwan gout blanga yumob nogudbalawei. Wal ol detlot na yumob garra gibit langa det feswan dei blanga ebri manth.” Lagijat na Mosis bin tok.

Nambas 28:23

Blanga 7 dei yumob garra gibit detlot ofring mowa den det barnapwan ofring yumob gibit ebridei.

Nambas 28:24

En yumob garra midap blanga weship langa YAWEI langa det namba 7 dei, en yumob kaan dum eni wek langa det dei na. Wal lagijat na yumob garra gibit detlot ofring langa YAWEI blanga 7 dei, en det smel blanga detlot ofring garra meigim YAWEI brabli gudbinji. Blanga 7 dei yumob garra gibit detlot ofring mowa den det barnapwan ofring en wain ofring yumob gibit ebridei.” Lagijat na Mosis bin tok.

Nambas 28:31

Yumob garra gibit dislot, en det wain ofring, en det ebridei ofring en det sid daga ofring langa YAWEI.” Lagijat na Mosis bin tok.

Nambas 29:11

“Wal yumob garra gibit wanbala boiwan gout blanga det ofring blanga yumob nogudbalawei, en yumob garra gibit najawan gout blanga meigim yumob klinbala blanga serramoni, en ebridei yumob garra gibit det barnapwan ofring garram det sid daga ofring en wain ofring.” Lagijat na Mosis bin tok.

Nambas 29:16

En yumob garra gibit wanbala boiwan gout du blanga det ofring blanga ol yumob nogudbalawei. Blanga 7 dei yumob garra gibit dislot mowa den det barnapwan ofring garram det sid daga en wain ofring weya yumob gibit ebridei.

Nambas 29:6

Yumob garra gibit mowa ebrijing langa det barnapwan ofring blanga det feswan dei langa ebri manth garram det sid daga ofring. En ebridei yumob garra gibit det barnapwan ofring yumob garra gibit det sid daga en wain ofring. Wal det smel blanga detlot ofring garra meigim YAWEI brabli gudbinji.” Lagijat na Mosis bin tok.

Jon Bin Dalim Det Gudnyus Blanga Jisas Det San Blanga God 1:29

Wal det neksdei na Jon Beptis bin luk Jisas kaminap langa im, en wen imbin luk Jisas, Jon bin dalim detlot pipul deya, “Iya na det Yangwan Ship blanga God hu garra deigidawei ola nogudbala ting brom ebribodi.

Hibrus 9:6

Bat wen deibin ringimap det Tent garram ol detlot enijing, detlot serramonimen bin oldei go insaid langa det feswan rum ebridei blanga dum olabat wek.

Rebaleishan 13:8

Ebribodi langa ola kantri garra bulurrum det enimul. Oni detlot pipul weya God bin raidimdan olabat neim langa det buk blanga det yangwan ship, olabat na kaan bulurrum det enimul. Det buk dei gulum Buk Blanga Laif, en detlot pipul weya God nomo bin raidimdan olabat neim langa det buk bifo imbin meigim dijan kantri, wal olabat na garra brabli gudbinji en tok gudwei blanga det enimul.