Methyu 8:25 - Kriol Baibul

²⁵ en detlot wekinmen bin go en weikimap Jisas, “Bos! Yu seibum melabat! Wi garra dai na!”

Methyu 8:25 Iomraidhean Croise

Sekan Kranakuls 14:11

King Asa bin prei langa YAWEI im God, “YAWEI, oni yu na gin album melabat garram det pawa blanga yu blanga bidim detlot brabli strongbala amimob en melabat luk langa yu blanga album melabat. Dumaji melabat trastimbat yu en langa yu neim melabat garra fait langa detlot strongbala amimob. Yu nomo larram olabat bidim yu. Yu na YAWEI det trubala God blanga melabat.”

Sekan Kranakuls 20:12

Wal yu na blanga melabat God! Yu panishim olabat, dumaji melabat kaan hendulum dislot ami. Olabat tumatj blanga melabat en melabat kaan sabi wanim melabat garra du, bat melabat wandim yu garra album melabat.” Lagijat na King Jehosafet bin prei.

Ola Saam 10:1

YAWEI, Wotfo yu jidan brabli longwei brom melabat? Wotfo yu haidim miselp wen melabat garram trabul?

Jona 1:6

Wal det bos blanga det bout bin wokaran langa det bout, en imbin faindim Jona deya silip insaid, en imbin jingat langa im, “Wotfo yu silip? Yu gidap na, en yu jingat langa det drimin blanga yu. Maitbi im garra stapam dis win en nomo larram wi draun.”

Methyu 8:2

Bambai na wan men garram det siknis gulum leprasi bin kaman langa Jisas, en imbin baudan lida langa im, en imbin tok, “Bos, if yu wandim, yu gin meigim mi gudbala.”

Methyu 8:24

Bambai na Jisas bin silip, en wen imbin stil silip, strongbala win bin kaman langa det woda, en imbin gulijap meigim det bout draun,

Methyu 9:18

Wal wen Jisas bin stil toktok deya, wan boswan blanga detlot Juwish pipul bin kaman langa im, en imbin baudan lida langa im, en imbin tok, “Main lilgel imbin dai. Wal yu kaman en pudum yu bingga langa im en meigim im gidap laibala.”

Luk Bin Dalim Ola Stori Blanga Jisas Langa Wan Jintail Men 8:24

en deibin go en weikimap Jisas, en deibin tok, “Bos! Bos! Wi binij na! Wi garra dai!” Wal Jisas bin gidap, en imbin dalim det strongbala win en bigbala weib blanga stap, en streidawei dubala bin stap, en ebrijing bin jidan kwaitbala.