Methyu 7:11 - Kriol Baibul

¹¹ Yu sabi na? Nomeda yu nogudbala, bat stil yu sabi blanga gibit gudbala ting langa yumob biginini olabat. En wi sabi wi Dedi langa hebin im gudbala, en im oldei gibit gudbala ting langa detlot pipul hu askim im.

Methyu 7:11 Iomraidhean Croise

Jenasis 6:5

Bambai na YAWEI bin luk ebrijing weya ola pipul bin dumbat bin brabli nogudwan, en God bin luk ebrijing weya deibin jinggabat olataim bin brabli nogudwan du.

Jenasis 8:21

Wal wen detlot enimul en bard bin ol kukwan, YAWEI bin smelim olabat, en imbin tok, “Im brabli gudwan dijan. Wal ai sabi pipul oldei jinggabat nogudbala ting brom olabat beibitaim. Bat ai kaan kilim dijan graun igin. Ai kaan draundim ola pipul en ola enimul igin seimwei laik aibin jis dum.

Sekan Semyul 7:19

En stil tudei yu dumbat mowa gudbala ting blanga melabat, dumaji yubin meigim pramis blanga main femili olabat olagija. “YAWEI, yu na det boswan God. En nomeda mi oni wekinmen blanga yu, bat stil yubin dalim mi blanga det pramis.

Job Wotfo Gudbala Pipul Abum Trabul? 15:16

wanim yu reken garra hepin langa wi? Wi oldei dumbat brabli nogudbala ting, en wi oldei lukabat blanga mowa nogudbala ting.

Ola Saam 84:11

YAWEI, det trubala God oldei maindimbat wi en im wi bos. Im brabli kainbala langa wi en im rispek wi. Langa ol detlot pipul hu dumbat rait ting, im nomo nokambek eni gudwan ting.

Ola Saam 85:12

Trubala, YAWEI garra gibit ola gudwan ebrijing, en wi kantri garra abum detmatj daga.

Ola Saam 86:15

Bat yu na main God. Yu jidan garram kainbalawan en soriwan filing, en yu laigimbat pipul olataim. Yu nomo gitwail kwikbalawei, najing. Yu oldei jidan kainbala en yu truwan.

Ola Saam 86:5

Bos, yu oldei gud langa melabat en oldei larramgo melabat fri. En langa ol detlot hu oldei jingat langa yu, yu laigim olabat olagijawan.

Aisaiya 49:15

Wal YAWEI bin ensim na, “Yumob reken det gel gin fogedabat im biginini hubin oldei wandim dringgimbat milk brom im? Yumob reken im garra libum im lilwan beibi hubin bon brom im ronwan bodi? Nomeda det gel gin fogedabat im beibi, bat ai kaan neba fogedabat yumob.

Aisaiya 63:7

Wal aibin tok, “Ai garra dalim yumob blanga YAWEI en hau im kipgon laigimbat wi, en ai garra preisim im blanga ol detlot gudbala ting weya YAWEI bin dumbat blanga wi. Ai garra jidan gudbinjiwei langa im dumaji YAWEI bin shoum imbin kipgon laigimbat wi, en imbin jidan brabli kainbala en brabli gudbala langa wi, ola Isreil pipul.

Jeramaiya 17:9

“Nomo enibodi sabi wotkain pipul jidan insaidwei. Ebribodi jidan tufeis en nogudbala, bat nobodi nomo sabi.

Jeramaiya 33:14

“Bambai na ai garra kipum det pramis weya aibin meigim langa detlot Isreil en Juda pipul.

Hoseiya 14:2

Yumob garra kambek langa im en gibit miselp langa im, en yumob garra prei, ‘Yu larramgo melabat fri brom ol detlot nogudbala ting weya melabat bin oldei dumbat, en yu jinggabat langa melabat weya melabat prei langa yu.

Maika 7:18

“YAWEI, yu na det trubala God, en nobodi jidan laik yu. Wal yu larramgo fri ol detlot pipul blanga yu hu stil jidan laibala. Yu larramgo olabat fri brom ol detlot nogudbala ting weya deibin dumbat, dumaji yu kaan wail olagijawan. Im meigim yu gudbinji wen yu shoum melabat yu kipgon laigimbat melabat.

Melakai 1:6

Wal YAWEI det boswan God bin tok langa ola serramonimen, “Wal yu luk ola pipul olabat sabi ola rait ting blanga dum. Ola san oldei rispek olabat dedi en ola wekinmen oldei rispek langa olabat bos. Wal mi yumob dedi. Wotfo yumob nomo rispek mi? Mi na yumob bos bat yumob nomo rispek mi. Yumob serramonimen, yumob tridim mi nogudwei. Yumob askimbat mi, ‘Hau melabat bin tridim yu nogudwei?’

Methyu 23:9

Lagijat igin yumob kaan gulum enibodi iya langa graun ‘Dedi’, dumaji yumob garram oni wanbala Dedi, en im langa hebin.

Methyu 7:10

En wen yu san askim yu blanga fish, wanim yu gibit im? Yu gibit im jigiwan sneik? Nomo! Yu gibit im det fish.

Jon Bin Dalim Det Gudnyus Blanga Jisas Det San Blanga God 3:16

“God bin laigim ebribodi detmatj, en imbin jandim im ronwan san blanga dai blanga olabat, wulijim ebribodi hu bilib langa im garra abum det olagijawan laif en nomo dai. En mi na det San blanga im.

Romans 3:19

Wal ebrijing weya det lowa tok, wi sabi im tok langa detlot pipul hu bulurrum det lowa, en det lowa im deya blanga meigim detlot pipul sabi weya dei rong en dei kaan tok enijing,

Romans 3:9

Yumob bin irrim mi tok. Wal wanim yumob reken? Melabat Juwish pipul mobeda langa ola Jintail pipul? Nomo. Melabat nomo mobeda langa Jintail pipul, dumaji aibin shoum yumob ola Juwish pipul en ola Jintail pipul olabat ol jidan jis laiga prisana blanga det nogudbalawei.

Romans 8:32

Yu si? God nomo bin holdimbek im San. Imbin gibit im blanga dai blanga wi. En im garra gibit wi olkain gudbala ting friwan jis laik imbin gibit im ron San langa wi.

Galeishans 3:22

Bat det lowa nomo bin abum det pawa blanga meigim enibodi jidan raitwei langa God, dumaji langa oltestaman im tok ebribodi langa dijan wel oldei dumbat olkain nogudbala ting, en dei nomo oldei duwit langa det lowa. Yu si? If yu wandim det laif weya God bin pramis blanga gibit, wal yu garra bilib langa Jisas Krais, dumaji God gibit det laif oni langa detlot pipul hu bilib langa im.

Jeims 1:17

God kaan temtimbat yumob, dumaji ola gudbala ting kaman brom hebin, en nomo eni nogudbala ting kaan kaman brom God. Wal yumob jinggabat na. God bin meigim det san en mun blanga gibit wi lait. Bat wen dubala godan, im go dakbala na. Bat God im nomo lagijat. Im gibit wi lait olataim. Oni wanwei im oldei jidan. En im kaan tenim miselp en meigim miselp dakbala. Im kaan tenim miselp en meigim miselp nogudbala. Im jidan gudwei olagijawan.

Fes Jon 3:1

Wal det Dedi langa top laigim wi detmatj, en imbin gulum wi biginini blanga im. En trubala wi blanga im biginini olabat. En ola pipul langa dijan wel nomo sabi wi brabliwei, dumaji dei nomo sabi God.

Fes Jon 4:10

Wal wi garra laigim wi braja en sista olabat seimwei laik God bin laigim wi. Yumob sabi? Wi nomo bin laigim im basdam. Imbin laigim wi basdam, en imbin jandim im San blanga dai blanga meigim det wei blanga wi, wulijim God garra larramgo wi fri brom wi nogudbalawei.