Methyu 5:24 - Kriol Baibul

²⁴ en if yubin dum enijing blanga meigim im nogudbinji, wal yu garra libum det ofring, en yu garra gobek langa det sambodi en sei sori langa im, en afta yu gin gobek en gibit det ofring langa God.

Methyu 5:24 Iomraidhean Croise

Job Wotfo Gudbala Pipul Abum Trabul? 42:8

Wal yumob garra deigim sebenbala buligi, en sebenbala dediwan ship langa main wekinmen Job blanga gibit sekrifais ofring blanga yumob langa det teibul blanga ofring, blanga meigim mi gudbinji. En Job garra prei blanga yumob, en ai garra ensim im preya, en ai kaan panishim yumob blanga ola siliwan ting weya yumob bin tok.” Lagijat na YAWEI bin tok.

Prabebs 25:9

If yu en sambodi agamin gija, yu garra tok gija en sodimat det trabul en nomo dalim najalot pipul.

Methyu 23:23

“Wal im garra brabli nogud blanga ol yumob lowamen en serramonimen, dumaji yumob tufeis. Yumob oldei bulurrum det lowa weya im tok yumob garra gibit haf ola ebrijing blanga yumob langa ofring. Bat yumob nomo bulurrum det haibala lowa weya im tok yumob garra tridimbat ola pipul kainwei en gibit olabat feyago en nomo tok laiyawei langa olabat. Wal im gud yumob oldei gibitbat det ofring. Bat yumob garra bulurrum det haibala lowa du.

Methyu 5:23

“Wen yu go langa det speshalwan pleis blanga gibit ofring langa God, yu garra jinggabat det sambodi,

Fes Karinthiyans 11:28

Wal ai dalim yumob. Ebribodi garra meiksho langa im ronselp bifo im dagat det daga en dringgim det wain, dumaji if im nomo jinggabat det daga en det wain dubala det bodi en det blad blanga Jisas Krais det Bos blanga wi, wal im reken det daga en det wain nomo enijing, en im garra meigim God panishim im, dumaji im dagat det daga en dringgim det wain nogudbalawei.

Fes Timathi 2:8

Wal wen yu abum sebis, ai wandim ola men hu sabi God garra prei. Ai nomo wandim detlot men hu oldei agamin en abumbat ad filing langa najalot pipul blanga prei. Oni detlot men hu bulurrum God brabliwei garra prei. En wen dei prei, dei garra lidimap olabat bingga.

Jeims 5:16

Wal yumob garra dalim miselp blanga eni nogudbala ting weya yumob bin dumbat, en yumob garra prei blanga yumob selp, en afta God garra meigim yumob gudbala, dumaji det preya blanga gudbala pipul im brabli strongbala.