Methyu 27:24 - Kriol Baibul

²⁴ Wal Pailat bin jinggabat na, en imbin tok miselp, “If ai larramgo im fri, ola pipul mait abum bigbala fait.” Wal Pailat bin gajim sambala woda, en imbin washim im bingga wen detlot bigmob pipul bin lukinat langa im, en imbin dalim olabat, “Yumob bin dalim mi dijan men garra dai. Wal yumob kaan pudum bleim langa mi. Mi nomo gilti. Yumob na ola giltiwan. Yumob na pudum im ded, nomo mi.”

Methyu 27:24 Iomraidhean Croise

Ola Saam 26:6

YAWEI, mi washim main bingga blanga shoum ai nomo bin dum eni rong, en mi weship yu langa det seikridwan haus blanga yu. Mi singim theingkyu song langa yu blanga ola gudwan ting weya yubin dum.

Jeramaiya 2:27

Yumob ol garra sheim miselp. Yumob tok, ‘Det tri im main dedi, en det rok im main mami.’ Wal dijan na garra hepin, dumaji yumob bin gowei brom mi, en yumob nomo bin jinggabat blanga kambek langa mi, najing. Bat wen yumob abum detmatj trabul yumob oldei askim mi blanga kaman en seibum yumob.

Jeramaiya 2:35

“Bat stil yumob Isreil pipul oldei tok, ‘Mi brabli gudbala. YAWEI im nomo wail langa mi.’ Bat mi na YAWEI garra panishim yumob dumaji yumob reken yumob brabli gudbala.

Methyu 26:5

Deibin tok, “Wi kaan grebum im wen wi abumbat det serramoni, dumaji loda pipul bin kaman blanga det serramoni, en dei laigim im, en if wi kilim im, dei mait meigim loda trabul blanga wi.”

Methyu 27:19

en wen Pailat bin jidanbat deya toktok langa olabat, im waif bin jandim wed langa im. Imbin tok, “Yu nomo wandi tatjim det gudbala men, dumaji aibin abum drim en imbin meigim mi brabli nogudbinji.”

Methyu 27:23

Wal Pailat bin tok, “Wanim rong ting imbin dum?” Bat nobodi bin ensim im. Deibin ol stat jinginatbat adbala, “Kilim im! Neilimap im langa kros en larram im dai deya!”

Methyu 27:4

en imbin tok, “Aibin dum nogudbala ting wen aibin hendimoba det gudbala men langa yumob blanga kilim im ded.” Bat deibin tok, “Wotfo yubin kaman en dalim melabat yubin dum nogudbala ting? Tharran blanga yu bisnis.”

Methyu 27:54

Wal det boswan solja en ola najalot solja hubin wotjimbat Jisas, wen deibin filim det graun bin sheik, en deibin luk ebrijing wanim bin hepin, olabat hat bin jamp garram bigiswan frait, en deibin bradin detmatj, en deibin tok, “Trubala dijan im San blanga God!”

Methyu 27:9

Wal longtaim det speshalwan mesinja blanga God neim Jeramaiya bin tok langa oltestaman blanga dijan ting, en trubala imbin hepin. Det mesinja bin tok, “Detlot pipul blanga Isreil bin tok blanga peiyim 30 bigwan silba mani, en afta deibin deigim det mani,

Jon Bin Dalim Det Gudnyus Blanga Jisas Det San Blanga God 13:9

Wal Saiman Pida bin tok, “Bos, if yu garra washim main fut, wal yu garra washim main bingga en hed du.”

Jon Bin Dalim Det Gudnyus Blanga Jisas Det San Blanga God 19:4

Wal wanmo Pailat bin go atsaid en tok langa detlot pipul deya, “Yumob luk. Ai garra bringimap det men iya atsaid langa yumob wulijim yumob garra luk ai kaan faindim enijing rong langa im blanga meigim im dai.”

Eks Hau Det Gudnyus Blanga Jisas Krais Bin Spredat Ebriweya 3:14

Nomeda Jisas bin kaman brom God en imbin brabli gudbala, bat stil yumob bin dalim Pailat blanga kilim im ded en blanga larramgo det medra neim Barebas.

Sekan Karinthiyans 5:21

Yumob sabi? Jisas Krais nomo bin dum eni nogudbala ting. Bat God bin wandi album wi, en imbin meigim im jidan jis laiga sekrifais ofring blanga ola nogudbala ting weya wibin dumbat, en blanga tharran na thru Jisas Krais wi gin jidan raitwei langa God.

Fes Pida 3:18

Yumob sabi? Det gudbala men bin dai blanga ola nogudbala pipul, en imbin dai blanga meigim wei blanga wi blanga go langa God. Deibin kilim im bodi ded. Bat det spirit blanga im bin jidan laibala,