Methyu 26:41 - Kriol Baibul

⁴¹ Yumob garra wotjimbat miselp en prei wulijim yumob kaan gobek langa det nogudbalawei. Det hat blanga yumob wandi bulurrum det gudbalawei. Bat det bodi blanga yumob im wikwan, en im wandi gobek langa det nogudbalawei.”

Methyu 26:41 Iomraidhean Croise

Ola Saam 119:1

YAWEI, ol detlot pipul hu jidan raitwei langa yu garra jidan gudbinji, en ol detlot pipul hu oldei bulurrumbat detlot lowa blanga yu garra jidan gudbinji du.

Ola Saam 119:115

Yumob nogudbala pipul, yumob gowei brom mi. Ai garra teiknodis oni langa detlot lowa blanga main God.

Ola Saam 119:117

Holdim mi en ai garra jidan seifwan, en ai garra teiknodis langa detlot lowa blanga yu olataim.

Ola Saam 119:32

Mi wandim blanga len brabliwei ebrijing weya yu wandim mi blanga dum, dumaji ebridei yu na garra meigim mi sabi mowa en mowa.

Methyu 24:42

“Trubala ai dalim yumob. Yumob garra wotjim miselp, dumaji yumob nomo sabi wotaim ai garra kambek.

Methyu 25:13

Wal Jisas bin kipgon tok, “Yumob sabi na? Det stori im tok blanga det taim wen ai garra kambek en gajim ol detlot pipul hubin meigim miselp redi blanga go langa hebin. Yumob garra wotjim miselp, dumaji yumob nomo sabi wotaim ai garra kambek.

Methyu 26:38

en imbin dalim detlot thribala wekinmen, “Mi brabli nogud detmatj jis laik ai garra dai. Wal yumob stap iya en jidan weik en wotjimbat du.”

Methyu 6:13

Melabat askim yu nomo blanga larram enijing testimbat melabat brabli adbalawei, en yu nomo larram Seitin deigidawei melabat brom yu.’ “Lagijat na yu garra prei,

Mak Bin Dalim Ola Stori Blanga Jisas 14:38

Yumob garra wotjimbat miselp en prei blanga nomo gobek langa det nogudbalawei. Det hat blanga yumob wandi bulurrum det gudbalawei. Bat det bodi blanga yumob im wikwan, en im wandi gobek langa det nogudbalawei.”

Luk Bin Dalim Ola Stori Blanga Jisas Langa Wan Jintail Men 11:4

Melabat bin larramgo fri detlot pipul hubin dumbat nogudbala ting langa melabat, en melabat askim yu blanga larramgo melabat fri du. Melabat askim yu nomo blanga larram enijing testimbat melabat brabli adbalawei.’ Lagijat na yumob garra prei.”

Luk Bin Dalim Ola Stori Blanga Jisas Langa Wan Jintail Men 21:36

“Wal yumob garra oldei wotjim miselp en prei wulijim yumob garra jidan strongbala blanga go thru langa ol detlot trabul en jandap garram mi.” Lagijat na Jisas bin tok.

Luk Bin Dalim Ola Stori Blanga Jisas Langa Wan Jintail Men 22:40

en wen deibin kamat deya, Jisas bin dalim olabat, “Yumob garra prei wulijim yumob kaan slekbek wen trabul garra kaman langa yumob.”

Luk Bin Dalim Ola Stori Blanga Jisas Langa Wan Jintail Men 22:46

Wal Jisas bin weikimap olabat, en imbin dalim olabat, “Wotfo yumob silip? Yumob gidap en prei wulijim yumob kaan slekbek wen trabul garra kaman langa yumob.”

Luk Bin Dalim Ola Stori Blanga Jisas Langa Wan Jintail Men 8:13

“Detlot sid weya bin buldan langa stoniwan pleis, dei jis laik detlot pipul hu irrim det wed en dei lisin langa det wed gudbinjiwei. Bat det wed nomo gowin insaid langa olabat, en dei nomo lisin langa det wed fo longtaim. Wen enikain trabul kaman langa olabat dumaji deibin bilib langa det wed, dei gibit bekboun langa det wed na.

Romans 8:3

Wal det lowa weya God bin gibit langa Mosis nomo bin abum det pawa blanga bidim det nogudbalawei, dumaji det filing blanga wi bin wikwan. Bat God bin jandim im ronwan San blanga bidim det nogudbalawei. Imbin kaman garram det seimkain filing jis laik wi garram, en thru im na God bin bidim det nogudbalawei insaid langa wi.

Fes Karinthiyans 10:13

Ebrijing weya temtimbat yumob oldei temtimbat ebribodi du, en God oldei album wi jis laik weya imbin pramisim wi, en im kaan larram enijing mowa strongbala langa wi temtim wi. En wen enijing temtim wi, God oldei gibit wi pawa en meigim wei blanga wi blanga go thru langa det trabul.

Fes Karinthiyans 16:13

Wal yumob irrim mi na. Yumob garra oldei wotjimbat miselp, en yumob garra kipgon bilib strongbalawei, en yumob kaan bradin langa enijing, en yumob kaan larram enijing bidim yumob.

Fes Karinthiyans 9:27

Yu si? Mi oldei wek adbalawei blanga hendulum main bodi wulijim det bodi main kaan meigim miselp jidan bos blanga mi, dumaji afta wen ai dalimbat det gudnyus langa najalot pipul, ai nomo wandim God garra dalim mi ai nomo bin bulurrum det gudnyus brabliwei en ai kaan gedim det olagijawan prais.

Galeishans 5:24

En ol detlot pipul hu jidan blanga Jisas Krais bin libum det nogudbala laif blanga olabat. Im jis laik deibin kilim miselp en binijimap ol detlot ebrijing weya olabat bodi bin oldei wandi dumbat.

Ifishans 6:18

Wal yumob garra oldei dum ol detlot ting na, en yumob garra oldei prei langa God du en askim im blanga album yumob. En yumob garra oldei larram det Holi Spirit lidim yumob wen yumob prei. En yumob garra oldei wotjim miselp en nomo slekap. Yumob garra oldei prei blanga ola Kristjan pipul.

Fes Pida 4:7

Wal nomo longtaim na Jisas Krais garra kambek en dijan wel garra binij. En blanga tharran na yumob garra oldei jinggabat en hendulum miselp gudbalawei wulijim yumob garra prei brabliwei.

Fes Pida 5:8

Wal yumob garra jinggabat gudbalawei en wotjim miselp, dumaji det boswan dibuldibul na det enami blanga yumob, en im oldei go ebriweya jis laiga hanggriwan laiyan weya im go lukabat daga blanga dagat, dumaji im oldei lukabat enibodi blanga deigidawei im brom God.

Sekan Pida 2:9

Yu si? Det Bos blanga wi sabi hau blanga album ola gudbala pipul wen dei abum trabul, en im sabi hau blanga kipgon panishimbat ola nogudbala pipul raidap det taim weya im garra jadjim olabat en panishim olabat olagijawan.

Rebaleishan 16:15

Wal detlot thribala nogudwan spirit bin majurrumap ola boswan na. Deibin majurrumap olabat langa wanbala kantri, en garram det Hibru langgus dei gulum det kantri Amagedan. Wal Jisas bin tok, “Yu lisin langa mi na. Ai garra kaman jis laiga stilinbala. Yu kaan sabi wotaim stilinbala garra kaman langa yu kemp. Maitbi yu deigimatbat klos blanga silip, en det stilinbala kaman en deigidawei ol detlot klos, en neksdei yu garra sheim, dumaji yu wokaran neigidbala. If yu wandi jidan gudwei, wal yu garra kipgon wotjimbat yuselp, nomo silip.” Lagijat na Jisas bin tok.

Rebaleishan 3:10

Yubin lisin langa mi weya aibin dalim yu blanga kipgon bulurrum mi, en yu nomo bin slekap. Wal bambai wen ola trabul garra kaman langa dijan kantri blanga testimbat ola pipul, mi na garra lukaftumbat yu.