Methyu 26:31 - Kriol Baibul

³¹ Deya na Jisas bin tok langa olabat, “Tudei naitaim na yumob garra ranawei brom mi. Yumob garra libum mi miselp, dumaji im tok langa oltestaman, ‘God garra larram detlot nogudbala pipul kilim det boswan blanga ola ship. Dei garra kilim im ded, en ola ship garra ranawei.’ Lagijat na im tok langa oltestaman.

Methyu 26:31 Iomraidhean Croise

Ola Saam 38:11

Ol main fren en detlot pipul hu jidan wansaid langa mi kaan kaman gulijap langa mi, dumaji ai garram loda sowa, en ol main femili kipawei brom mi du.

Ola Saam 69:20

Det nogudwan wed bin meigim mi nogudbinji en ai kaan dum enijing na. Aibin wandim pipul blanga sori langa mi, bat najing. Aibin wandim pipul blanga kaman langa mi blanga meigim mi gudbinji, bat najing.

Ola Saam 88:18

Yubin meigim main gudfren olabat libum mi, en det dakbala pleis na main fren.

Aisaiya 53:10

Wal YAWEI bin tok, “Wal lagijat na aibin meigim det plen blanga det wekinmen blanga abum det trabul en pein, en gibit miselp jis laiga sekrifais ofring blanga deigimwei ol detlot nogudbalawei blanga ola pipul, en meigim olabat jidan nomo giltiwan. Blanga tharran na, det wekinmen garra jidan laibala en luk hau imbin seibum detmatj pipul en ol detlot pipul hu garra kaman bambai. Imbin dum ebrijing wanim aibin wandim im blanga dum.

Leminteishans 1:19

Aibin oldei jingat adbala langa main frenmob, bat olabat nomo bin wandim album mi. Detlot serramonimen en lidamob, deibin daidaibat langa detlot roud wen deibin lukabatbat blanga daga langa det taun blanga jidan laibala.

Sekaraiya 13:7

Wal YAWEI det boswan God bin tok, “Jandap men garram det bigbala naif. Fait langa det stakmen. Kilim det men hu jandap wansaid langa mi. Kilim det boswan blanga ola ship, en ola ship garra ol ranawei ebriweya. Ai garra panishim detlot lilwan ship.

Methyu 11:6

If enibodi hu bulurrum main wei en nomo gibit bekboun langa mi wal larram im jidan brabli gudbinji.” Lagijat na Jisas bin tok.

Methyu 26:24

Mi det Speshalwan Men weya God bin jandim, en ai garra dai jis laik God bin tok langa oltestaman. Bat det men hu garra hendimoba mi blanga dai, im garra pudum imselp langa bigbala trabul, en im mobeda blanga im if im nomo bin bon.”

Methyu 26:56

Ai dalim yumob wotfo. Dumaji wan speshalwan mesinja blanga God bin tok langa oltestaman trubala dijan ting garra hepin lagijat na.” Brom deya ola wekinmen blanga Jisas bin ranawei brom im na.

Jon Bin Dalim Det Gudnyus Blanga Jisas Det San Blanga God 16:32

Wal ai dalim yumob. Det taim garra kaman en im olredi iya weya yumob garra ol ranawei langa yumob ron kemp, en yumob garra meigim mi jidan miselp. Bat ai kaan jidan miselp, dumaji main Dedi jidan garram mi.