Methyu 26:28 - Kriol Baibul

²⁸ en imbin tok, “Dijan wain yumob dringgim im main blad. Ai garra spilim main blad blanga ebribodi blanga opinimap det nyubalawei blanga God. Ai garra spilim main blad blanga deigidawei ola nogudbala ting brom loda pipul.

Methyu 26:28 Iomraidhean Croise

Jeramaiya 31:31

“Bambai ai garra meigim nyuwan pramis langa ol detlot Isreil pipul, en langa ol detlot pipul brom Juda.

Labidakas 17:11

Wal det blad im na det laif blanga detlot enimul en ebri laibwan ting. Blanga tharran na aibin dalim olabat blanga spilim ola blad langa det teibul blanga ofring blanga deigidawei detlot pipul nogudbalawei weya dei oldei dumbat. Wal det blad, im det laif na, blanga deigidawei ola nogudbalawei.

Sekaraiya 9:11

Wal YAWEI bin kipgon tok, “Dumaji aibin meigim strongwan pramis langa yumob en yumob bin tok blanga kipum en meigim det pramis strongwan garram det blad blanga det sekrifais ofring, yumob sabi ai garra larramgo yumob pipul fri. Jis laik nogudbala men pudum prisana insaid langa det draiwan wel, wal ola enami bin pudum yumob pipul langa ola nogudbala pleis du, bat ai garra larramgo yumob fri.

Methyu 20:28

Mi na det Speshalwan Men weya God bin jandim, en ai nomo bin kaman blanga meigim enibodi album mi. Aibin kaman blanga album ola pipul. En yumob garra bulurrum mi. Yumob sabi? Aibin kaman blanga dai blanga ola pipul en blanga baiyimbek olabat garram main laif brom det nogudbalawei weya olabat oldei dumbat.” Lagijat na Jisas bin tok.

Methyu 26:27

Afta na imbin gajim det kap ful garram wain, en imbin gibit theingks langa God, en imbin gibit det wain langa im wekinmen olabat,

Methyu 26:29

Ai dalim yumob. Ai kaan dringgim dijan wain garram yumob enimo. Bat wen main Dedi jandimbek mi, en ai jidan boswan brabliwei, det taim na ai garra dringgim det wain nyubalawei.”

Methyu 6:12

Melabat larramgo fri detlot pipul hu dumbat nogudbala ting langa melabat, en melabat askim yu blanga larramgo melabat fri du.

Mak Bin Dalim Ola Stori Blanga Jisas 1:4

Wal bambai na det mesinja bin kaman. Imbin neim Jon, en imbin go en jidan langa bush kantri, en imbin werrimon detlot klos weya deibin oldei meigim garram kemul heya, en imbin werrimbat lethawan belt, en imbin oldei dagadagat grashopa en shugabeig. Wal bigmob pipul brom Judiya en brom Jerusalem bin ol go langa Jon, en Jon bin toktok langa olabat. Imbin dalimbat olabat lagijat, “Yumob garra libum ol yumob nogudbalawei, en yumob garra beptais wulijim God garra larramgo yumob fri brom detlot nogudbala ting weya yumob bin oldei dumbat.” Lagijat na Jon bin oldei tok. Wal detlot pipul bin onap, en deibin dalimbat Jon blanga olabat nogudbalawei, en imbin beptaisimbat olabat langa det Jodan Riba,

Mak Bin Dalim Ola Stori Blanga Jisas 14:24

en Jisas bin tok, “Dijan wain yumob dringgim im main blad. Ai garra spilim main blad blanga ebribodi blanga opinimap det nyubalawei blanga God.

Luk Bin Dalim Ola Stori Blanga Jisas Langa Wan Jintail Men 22:19

Brom deya Jisas bin gajim wanbala damba, en imbin gibit theingks langa God, en afta imbin breigim det damba, en imbin gibit det damba langa detlot speshalwan mishanri, en imbin tok, “Dijan na main ronwan bodi weya ai garra gibit blanga yumob. Wal yumob dagat dijan daga blanga jinggabat mi.”

Luk Bin Dalim Ola Stori Blanga Jisas Langa Wan Jintail Men 22:20

Brom deya wen olabat bin binij dagadagat sapa, Jisas bin gajim wanbala kap garram wain, en imbin pasimran det wain langa olabat, en imbin tok, “Dijan wain det nyubalawei blanga God. Ai garra spilim main ronwan blad blanga yumob blanga opinimap det nyubalawei blanga God.

Romans 5:15

Bat dubala bin difrin, dumaji detkain ting weya God bin dum thru Jisas Krais im difrin brom det nogudbala ting weya Edam bin dum. Loda pipul bin dai brom det nogudbala ting weya det wan men bin dum. Bat God bin brabli kainbala langa loda pipul blanga det gudbala ting weya det najawan men bin dum. En det brabli kainbala ting weya God bin dum im mobedawan.

Romans 5:19

Yu si? Det wanbala men nomo bin dum wanim God bin dalim im blanga dum, en blanga tharran na imbin meigim ebribodi jidan nogudbala. Bat God garra meigim loda pipul jidan raitwei langa im, dumaji det najawan men bin dum wanim God bin dalim im blanga dum.

Fes Karinthiyans 11:25

En lagijat igin afta wen deibin binij det sapa, Jisas bin gajim det wain, en imbin tok, “Dijan wain im det nyubalawei blanga God. Ai garra spilim main ronwan blad blanga yumob blanga opinimap det nyubalawei blanga God. En ebritaim wen yumob dringgim dijan wain, yumob garra dringgim blanga jinggabat mi.” Lagijat na Jisas bin tok.

Kaloshans 1:14

en im san na bin pei blanga larramgo wi fri brom ol detlot nogudbala ting weya wibin oldei dumbat.

Kaloshans 1:20

En God bin wandi bringimbek ebrijing langa imselp thru im San, en imbin meigim ebrijing jidan gudwei langa imselp thru det blad weya im San bin weistim langa det kros.

Hibrus 10:29

Wal wanim yumob reken garra hepin if enibodi nomo laigim det San blanga God en tridim im brabli nogudbalawei? En wanim yumob reken garra hepin if im tridim det blad blanga det pramis blanga God weya bin meigim im fri seim laik odinri blad? En wanim yumob reken garra hepin if im tok nogudbalawei blanga det Holi Spirit hubin brabli kain langa im? Yu sabi? Deibin oldei panishim det sambodi hu nomo bin duwit langa det lowa. Bat God garra panishim brabliwei det sambodi hubin tjakidawei det San blanga im.

Hibrus 13:20

Wal wi sabi God bin meigim Jisas det Bos blanga wi gidap laibala brom dedbala, dumaji Jisas bin weistim im blad blanga opinimap det nyubalawei blanga det olagijawan pramis, en im oldei lukaftumbat wi brabliwei jis laik det stakmen oldei lukaftumbat ola ship brabliwei, en wi sabi oni God gin meigim wi jidan gudbalawei. Wal mi askim God blanga gibit yumob ebrijing yumob wandim blanga dum wanim im wandim yumob blanga dum, en mi askim im blanga wek langa wi laif thru Jisas Krais en dum wanim meigim im gudbinji. Wal Jisas Krais im na det haibalawan, en wi garra preisim im olagijawan. Yuwai. Lagijat na.

Hibrus 9:28

En lagijat gin Jisas bin dai wantaim blanga deigidawei ola nogudbala ting blanga ola pipul, en wen im garra kambek det sekantaim, im kaan kaman blanga deigidawei ola nogudbala ting. Im garra kambek blanga seibum ol detlot pipul hu weidabat blanga im.

Fes Jon 2:2

Im na bin dai blanga meigim det wei blanga wi wulijim God garra larramgo wi fri brom ol detlot nogudbala ting weya wibin dumbat. Im nomo bin meigim det wei oni blanga wi. Imbin meigim det wei blanga ebribodi.

Rebaleishan 7:14

Wal aibin tok, “Najing. Mi nomo sabi. Maitbi yu sabi?” Wal det olmen bin dalim mi, “Dislot pipul iya bin deya langa det bigwan trabul. En deibin go thru langa det trabul, dumaji deibin washim olabat klos. Deibin meigim olabat klos brabli waitwan garram det blad blanga det yangwan ship.

Rebaleishan 7:9

Brom deya aibin luk bigismob pipul. Deibin hipap detmatj nobodi nomo bin kaundimap olabat. Deibin ol difrin pipul brom ebri traib en ebri kantri en ebri langgus, en deibin ol jandap lida langa det speshal boswan tjeya, en deibin ol jandap lida langa det yangwan ship. Deibin ol werrimon longwan waitwan kout, en deibin ol holdimbat bushis brom pamtri langa olabat bingga,