Methyu 23:27 - Kriol Baibul

²⁷ “Im garra brabli nogud blanga ol yumob lowamen en serramonimen, dumaji yumob tufeis. Yumob jis laik det greibyad weya dei meigim luk gudwan garram purdiflawa atsaidwei. Bat andanith langa det greibyad ola boun en nogudwan bodipat jidan.

Methyu 23:27 Iomraidhean Croise

Prabebs 26:23

Detlot pipul hu oldei jinggabat pipul nogudbalawei bat oldei tok garram kainwan wed, dei jis laik wen sambodi pudum purdiwan peint langa rabishwan dish.

Nambas 19:16

En if sambodi tatjim det bodi weya bin gitkil, o weya bin jis dai atsaid, o if sambodi tatjim detlot boun blanga det dedwan men o wuman, o if im tatjim greib, wal im garra jidan blanga 7 dei, dumaji im nomo klinbala blanga serramoni.

Methyu 23:28

Lagijat na yumob luk gudwan atsaidwei langa ola pipul. Bat yumob tufeis, en yumob brabli nogudbala insaid.

Luk Bin Dalim Ola Stori Blanga Jisas Langa Wan Jintail Men 11:44

“Wal im garra brabli nogud blanga yumob, dumaji yumob jis laiga greibyad weya nobodi sabi. Nobodi kaan luk det greib, en wen dei wok ontop langa det greib, dei nomo sabi det greib im deya garram det nogudwan bodi insaid. “Yumob sabi? Atsaidwei yumob luk gudwan. Bat insaidwei yumob nogudwan.” Lagijat na Jisas bin tok langa det serramonimen.

Eks Hau Det Gudnyus Blanga Jisas Krais Bin Spredat Ebriweya 23:3

Wal Pol bin dalim det boswan serramonimen, “Yu tufeisbala! God garra panishim yu, dumaji yubin kotim mi iya, en yu na bin breigim det lowa wen yubin dalim olabat blanga beldim mi.”

Galeishans 6:12

Ol detlot pipul hu wandim yumob blanga reken olabat haibala, olabat oldei trai en fosim yumob blanga bulurrum det lowa blanga sekamsais, dumaji dei nomo wandim enibodi blanga gibit olabat trabul. Yumob sabi? If dei dalimbat det trubala gudnyus blanga Jisas Krais weya imbin dai langa det kros, wal loda pipul garra gibit olabat adtaim, dumaji det gudnyus oldei meigim loda pipul nogudbinji weya im dalim olabat blanga libum olabat olbalawei.