Methyu 21:26 - Kriol Baibul

²⁶ Bat wi kaan dalim im, ‘Jon bin gedim det rait brom men,’ dumaji wi bradin blanga ol detlot pipul hu reken Jon bin speshalwan mesinja blanga God.”

Methyu 21:26 Iomraidhean Croise

Aisaiya 57:11

Maitbi yumob bin fogedabat langa mi na, en yumob nomo jidan trubalawei. Maitbi yumob bradin nomo lilbit blanga sambodi, indit? Yumob reken aibin jidan kwaitbala longtaim, en blanga tharran na yumob nomo jinggabat langa mi.

Methyu 11:9

“Wal yumob dalim mi na. Wanim yumob bin go blanga luk? Yumob bin wandi go en luk det speshalwan mesinja brom God? Trubala yubin luk mesinja. Bat im nomo bin jis enikain mesinja.

Methyu 14:5

En blanga tharran na Herod bin wandi kilim Jon ded. Bat im nomo bin kilim im basdam, dumaji ola pipul bin reken Jon bin speshalwan mesinja blanga God, en Herod bin bradin blanga olabat.

Methyu 21:11

Wal detlot pipul bin tok, “Dijan im det speshalwan mesinja blanga God neim Jisas. Imbin kaman brom Nesareth deya langa Gelali.”

Methyu 21:25

Yumob dalim mi na. Hubin gibit det rait langa Jon Beptis blanga beptaisimbat enibodi? Imbin gedim det rait brom God o brom men?” Wal detlot serramonimen en bosmen bin tok gija blanga tharran, “Wanim wi garra tok? If wi dalim im Jon bin gedim det rait brom God, wal im garra askim wi wotfo wi nomo bin duwit langa det wed blanga im.

Methyu 21:27

Wal detlot serramonimen en lowamen bin lafta dalim Jisas lagijat, “Melabat nomo sabi hubin gibit Jon Beptis det rait blanga beptaisimbat ola pipul.” Wal Jisas bin dalim olabat, “Wal ai kaan dalim yumob du hubin gibit mi det rait blanga dumbat dislot ting weya mi dumbat.”

Mak Bin Dalim Ola Stori Blanga Jisas 11:32

Bat wi kaan dalim im Jon bin gedim det rait brom men.” Lagijat na deibin tok miselp, dumaji deibin bradin blanga detlot pipul hubin reken Jon bin speshalwan mesinja blanga God.

Mak Bin Dalim Ola Stori Blanga Jisas 12:12

Wal detlot serramonimen en lowamen bin wandi grebum Jisas en lokimap im, dumaji deibin sabi imbin tokin blanga olabat langa det dubala stori en imbin dalimof olabat. Bat deibin bradin blanga ol detlot pipul hubin lisin langa im, en deibin lafta libum im deya gin, en deibin gowei.

Mak Bin Dalim Ola Stori Blanga Jisas 6:20

Imbin sabi Jon bin gudbala men en imbin speshalwan wekinmen blanga God, en im nomo bin larram enibodi ardim Jon. Imbin oldei laigim irrim Jon toktok. Bat wen imbin oldei irrim det wed, det wed bin oldei meigim im nogudbinji langa im main.

Luk Bin Dalim Ola Stori Blanga Jisas Langa Wan Jintail Men 20:19

Wal detlot serramonimen en lowamen bin wandi grebum Jisas en lokimap im streidawei, dumaji deibin sabi imbin tokin blanga olabat langa det dubala stori. Bat deibin bradin blanga ola pipul deya,

Luk Bin Dalim Ola Stori Blanga Jisas Langa Wan Jintail Men 20:6

Bat wi kaan dalim im Jon bin gedim det rait brom men.” Lagijat na deibin tok gija, dumaji ola pipul bin reken Jon bin speshalwan mesinja brom God, en detlot bosmen bin bradin detlot pipul mait stonimbat olabat ded if dei tok Jon bin gedim det rait brom men.

Luk Bin Dalim Ola Stori Blanga Jisas Langa Wan Jintail Men 22:2

Wal detlot haibala serramonimen en lowamen bin wandi kilim Jisas ded. Bat deibin bradin blanga ola pipul, en deibin trai en faindimwei blanga kilim im snikinwei.

Jon Bin Dalim Det Gudnyus Blanga Jisas Det San Blanga God 5:35

En Jon Beptis imbin jis laiga braitwan lait weya bin shoum yumob det trubalawei. En yumob bin gudbinji blanga det lait. Bat oni lilwail yumob bin gudbinji blanga det lait.

Jon Bin Dalim Det Gudnyus Blanga Jisas Det San Blanga God 9:22

Lagijat na dubala bin dalim detlot serramonimen blanga askim dubala san miselp, dumaji detlot serramonimen bin tok dei garra andimwei enibodi brom det Juwish Miting Pleis hu tok Jisas na det Boswan gulum Masaiya. En blanga tharran na dubala bin bradin blanga detlot serramonimen.

Eks Hau Det Gudnyus Blanga Jisas Krais Bin Spredat Ebriweya 5:26

Wal det boswan blijiman bin deigim im wekinmen olabat, en deibin go langa det Serramoni Pleis, en deibin bringimbek detlot speshalwan mishanri. Bat dei nomo bin hendulum olabat rafwei, dumaji deibin bradin blanga ola pipul, en deibin dalim miselp, “If wi hendulum dislot men rafwei, detlot pipul mait stonim wi.”