Methyu 11:5 - Kriol Baibul

⁵ Yumob dalim im ol detlot blain pipul gin luk na, en ol detlot leimbala pipul gin wok na, en detlot pipul hubin abum leprasi olabat gudbala na, en ola defwan pipul gin lisin na, en detlot dedbala pipul bin gidap laibala na, en ol detlot po pipul bin lisin det gudnyus blanga God.

Methyu 11:5 Iomraidhean Croise

Sekan Kings 5:14

Wal Neiman bin go langa det Jodan Riba. Imbin bogi sebenbala taim jis laik Ilaisha bin dalim im en imbin gudbala igin. Im skin bin strongbala en brabli gudwan jis laik ola biginini.

Sekan Kings 5:7

Wen det king brom Isreil bin ridim det leda imbin terrimap im klos en imbin nogudbinji en imbin tok, “Wanim det king brom Siriya reken, ai garra meigim dis men gudbala? Mi nomo God garram pawa blanga ola laibala en dedbala. Ai sabi im trai meigim mi fait langa im!”

Ola Saam 146:8

Im meigim blainwan pipul luk. Im album detlot pipul hu garrimap hebiwan loud brom najalot pipul. Im laigim detlot pipul hu bulurrum det wei blanga im.

Ola Saam 22:26

Ola powan pipul garra dagat blendibala daga raidap dei bulap. Wen pipul kaman langa yu YAWEI, dei garra preisim yu. God, yu oldei gibitbat olabat ola gudbala ting.

Eksadas 4:11

Wal YAWEI bin tok, “Hubin meigim det mawus blanga yu? Hu garram det pawa blanga meigim enibodi kaan irrim en tok? En hu garram det pawa blanga meigim enibodi luk gudwei en kaan luk gudwei? Mi na, indit?

Aisaiya 29:18

En langa det taim na, detlot pipul hubin jidanbat defwan longtaim garra irrim sambodi ridimbat langa olabat, en detlot pipul hubin oldei jidanbat blainwan garra luk gudwei.

Aisaiya 29:19

Detlot powan pipul, en detlot pipul hu nomo garram enibodi blanga lukaftumbat olabat, garra jinginatbat brabli hepiwan langa YAWEI det brabli holiwan God blanga ola Isreil pipul.

Aisaiya 43:8

Wal YAWEI bin kipgon tok, “Ai garra bringimap main pipul olabat mijamet. Olabat garram dubala ai, bat olabat kaan luk, en olabat garram dubala irriwol, bat olabat kaan irrim.

Aisaiya 66:2

Wal mi na YAWEI det trubala God bin meigim ebrijing. Detlot pipul weya mi laigim olabat brabliwei, dei oldei jidan lobala en dei oldei jinggabat oni langa mi blanga albumbat olabat, en olabat sheik wen dei irrim mi toktokbat.

Sekaraiya 11:7

Wal brom deya mi na Sekaraiya bin jidan stakmen blanga detlot ship weya bin redi blanga go blanga dai en aibin lukaftumbat detlot ship. Aibin deigim dubala wadi en aibin gibit dubala neim. Wanbala wadi aibin gulum “Kainbala” en det najawan aibin gulum “Wanbala”.

Methyu 10:8

Yumob garra meigim sikbala pipul gudbala, en yumob garra meigim dedbala pipul gidap laibala, en yumob garra meigim detlot pipul hu garram leprasi gudbala, en yumob garra andimwei dibuldibul brom insaid langa pipul. Yumob nomo bin pei blanga det pawa blanga dumbat ol detkain klebabala ting, en wen yumob garra dumbat detlot wek blanga ol detlot sikbala pipul, yumob kaan askimbat enibodi blanga enijing.

Methyu 11:4

Wal Jisas bin tok, “Yumob gobek en dalim Jon wanim yumob bin luk en wanim yumob bin lisin.

Methyu 12:13

Afta na Jisas bin tok langa det men garram kripulwan bingga, “Yu pudumat det kripulwan bingga.” En det men bin duwit langa im, en streidawei det bingga bin gudbala jis laik im najawan bingga.

Methyu 21:14

Brom deya ola blainwan pipul en ola kripulwan pipul bin kaman langa Jisas deya langa det Serramoni Pleis, en imbin meigim olabat gudbala,

Methyu 5:3

“Ol yumob pipul hu meigim miselp lobala langa God, yumob garra gudbinji, dumaji yumob jidan blanga God, en im na garra meigim yumob haibala.

Methyu 9:30

En streidawei dubala bin luk. En Jisas bin dalim dubala streidat, “Yunbala nomo dalim enibodi aibin meigim yunbala luk gudwei.”

Mak Bin Dalim Ola Stori Blanga Jisas 7:37

en ebribodi hubin irrim det nyus bin ol hatjamp brabliwei, en deibin tok, “Im meigim defwan irrim, en im meigim damwan tok gudwei. Im dum ebrijing brabli gudbalawei.”

Mak Bin Dalim Ola Stori Blanga Jisas 9:25

Wal wen Jisas bin luk detlot pipul bin hipimapbat miselp deya, imbin tok langa det nogudbala spirit, “Yu defwan en damwan spirit, ai dalim yu blanga kamat brom dijan lilboi, en yu kaan kambek langa im enimo!”

Luk Bin Dalim Ola Stori Blanga Jisas Langa Wan Jintail Men 4:18

Imbin tok, “Det spirit blanga God im jidan garram mi, dumaji imbin pikimat mi blanga dalimbat det gudnyus langa ola powan pipul. Imbin jandim mi blanga dalim ola prisana God garra larramgo olabat fri, en imbin jandim mi blanga dalim ola blainwan pipul God garra meigim olabat luk gudwei, en imbin jandim mi blanga dalim ol detlot pipul hu oldei abumbat trabul God garra meigim olabat jidan gudbalawei.

Jon Bin Dalim Det Gudnyus Blanga Jisas Det San Blanga God 10:25

Wal Jisas bin tok, “Aibin olredi dalim yumob. Bat yumob nomo bin wandi bilib langa mi. En ol detlot klebabala ting weya mi oldei dum garram main Dedi pawa shoum yumob du.

Jon Bin Dalim Det Gudnyus Blanga Jisas Det San Blanga God 10:38

Bat if ai dum detlot ting, wal yumob garra bilib langa mi. En if yumob nomo wandi bilib langa detlot wed main, wal maitbi yumob gin bilib langa detlot ting weya mi dumbat wulijim yumob garra sabi brabliwei mi jidan garram main Dedi, en main Dedi jidan garram mi.”

Jon Bin Dalim Det Gudnyus Blanga Jisas Det San Blanga God 2:23

Wal wen Jisas bin deya langa Jerusalem blanga det Pasoba Serramoni, loda pipul bin luk ola klebabala ting weya imbin oldei dumbat, en blanga tharran na deibin bilib langa im.

Jon Bin Dalim Det Gudnyus Blanga Jisas Det San Blanga God 3:2

en imbin kaman langa Jisas naitaim, en imbin dalim Jisas, “Bos, melabat sabi yu titja, en melabat sabi God bin jandim yu, dumaji nobodi kaan dum eni klebabala ting wulijim yu dumbat. Oni detlot pipul weya God jidan garram olabat garram pawa blanga dumbat klebabala ting lagijat.”

Jon Bin Dalim Det Gudnyus Blanga Jisas Det San Blanga God 5:36

“Wal Jon Beptis bin jidan witnis blanga mi, en imbin dalimbat yumob blanga mi. Bat samting deya im mowa strongwan witnis blanga mi. En det samting im ol detlot wek weya main Dedi bin gibit mi blanga dumbat. Ol detlot wek na weya mi dumbat jidan witnis blanga mi, en dei shoum yumob trubala main Dedi bin jandim mi.

Jon Bin Dalim Det Gudnyus Blanga Jisas Det San Blanga God 9:7

en imbin dalim det blain men, “Yu go en washim miselp langa det wodahol gulum Sailowam.” Wal det neim blanga det wodahol im tok Jandim. En Jisas bin jandim det blain men deya na, en det blain men bin go langa det wodahol, en imbin washim miselp, en streidawei imbin luk, en imbin kambek langa im kemp gudwan na.

Eks Hau Det Gudnyus Blanga Jisas Krais Bin Spredat Ebriweya 2:22

“Wal main kantrimen olabat, yumob irrim mi na. God bin pikimat det men neim Jisas hubin growap langa det taun gulum Nesareth, en imbin shoum yumob imbin pikimat im, dumaji Jisas bin dumbat olkain speshalwan ting garram pawa brom God. En yumob sabi, dumaji imbin hepin iya na langa yumob.

Jeims 2:5

Wal main braja en sista olabat, yumob lisin langa mi na. God bin pikimat detlot po pipul langa ebri kantri blanga meigim olabat jidan blanga im. Olabat oldei trastimbat im brabliwei, en dei garra jidan ritjwan langa det gudwan pleis blanga im, dumaji imbin meigim pramis langa detlot pipul hu laigim im, en imbin dalim olabat dei garra jidan garram im langa hebin.