Melakai 4:5 - Kriol Baibul

⁵ “Wal bifo det dei wen ola pipul garra bradin detmatj, ai garra jandim Ilaija, det speshalwan mesinja langa yumob.

Melakai 4:5 Iomraidhean Croise

Aisaiya 40:3

Sambodi im jinginatbat, “Deya langa det deset kantri yumob meigim det roud streitwan! Meigim det roud redibala blanga YAWEI det trubala God!

Jowal 2:31

Wal bifo det dei blanga YAWEI garra kaman, det san garra go brabli dakbala, en det mun garra go brabli redwan jis laik blad, en det dei na garra brabli nogud.

Sefanaiya 1:14

Wal aibin kipgon tok, “Im nomo longtaim na blanga det speshalwan dei blanga YAWEI. Yumob garra irrim det nois blanga pipul hu kraikraibat detmatj, en detlot strongwan solja kraikraibat adbala dumaji nobodi deya blanga album olabat.

Melakai 3:1

YAWEI det boswan God bin tok, “Yumob irrim mi. Ai garra jandim main mesinja lida langa mi blanga meigim det roud redi blanga mi. Det bos yumob lukabat garra kaman kwikbala langa im Serramoni Pleis. Det mesinja weya aibin pramis langa main pipul en tharran weya yumob wandimbat, trubala im garra kaman.

Melakai 4:1

Wal YAWEI det haibala bos im tok, “Yumob irrim mi. Det dei garra kaman wen ai garra binijimap pipul jis laik det bigbala faiya binijimap olabat. Afta ai garra binijimap ol detlot praudbala pipul jis laik det faiya weya barnimap ola draiwan gras. Wal ai garra binijimap detlot pipul brabliwei, jis laik det faiya weya im barnimap ola rutpat en ola wadi en nomo enijing jidan.

Luk Bin Dalim Ola Stori Blanga Jisas Langa Wan Jintail Men 1:17

en im garra go lida langa det boswan garram det Spirit en pawa brom God seimwei laik det speshalwan mesinja neim Ilaija bin dum, en im garra meigim ola dedi jinggabat olabat biginini en laigim olabat, en im garra tenimran detlot pipul hu nomo oldei duwit langa God lowa en meigim olabat jinggabat det gudbalawei, en im garra meigim detlot pipul jidan redi blanga det Boswan hu garra kaman.” Lagijat na det einjul bin tok langa Sekaraiya.

Luk Bin Dalim Ola Stori Blanga Jisas Langa Wan Jintail Men 9:30

en streidawei dubala men bin deya toktok garram im. Det dubala men bin neim Mosis en Ilaija,

Jon Bin Dalim Det Gudnyus Blanga Jisas Det San Blanga God 1:21

Wal detlot serramonimen bin askim im, “Wal hu yu? Yu det speshalwan mesinja neim Ilaija?” En Jon bin tok, “Nomo. Mi nomo Ilaija.” Wal detlot serramonimen bin askim im igin, “Wal hu yu? Yu det brabli speshalwan mesinja weya God bin pramis langa Mosis blanga jandim langa wi?” En Jon bin tok, “Nomo. Mi nomo det brabli speshalwan mesinja.”

Rebaleishan 6:17

Det taim bin kaman blanga det dubala blanga gitwail langa melabat na, en nobodi kaan bidim dubala. Det dubala garra win.” Lagijat na deibin jingat.