Labidakas 8:13 - Kriol Baibul

¹³ En afta na Mosis bin bringimap detlot san blanga Eran langa frantwei, en imbin meigim detlot werrimon shet en waitwan heinggitjif raidaran langa olabat binji, en imbin taiyimap het langa olabat hed, jis laik YAWEI bin dalimbat Mosis blanga dum.

Labidakas 8:13 Iomraidhean Croise

Ola Saam 132:9

Larram ol detlot serramonimen blanga yu oldei dum wanim rait olataim. Larram ol yu pipul olabat jingat adbala gudbinjiwei.

Eksadas 40:13

en yu garra meigim Eran werrimon detlot speshalwan klos, en yu garra rabum im garram det oil, en yu garra hendimoba im langa mi blanga jidan serramonimen blanga mi.

Eksadas 40:16

Brom deya Mosis bin dum ebrijing wanim YAWEI bin dalim im blanga dum.

Aisaiya 61:10

Mi brabli gudbinji en mi jinginat brabli adbala, dumaji mi sabi YAWEI im main God. Imbin seibum mi en gibit mi feyago. Tharran im jis laik detlot klos weya mi oldei werrimbat. Olabat mowa purdiwan langa detlot najalot purdiwan ting det gel o boi oldei werrimon wen dei redi blanga git merrit.

Aisaiya 61:6

En yumob garra jidan serramonimen en wekinmen blanga YAWEI. Yumob garra abum detlot silba en gol brom najalot kantri en yumob garra jidan brabli ritjwan.

Isikiyel 42:14

Wen detlot serramonimen gitredi blanga gowei brom det Serramoni Pleis, dei garra go langa detlot rum bifo dei gobek langa det atsaidwan kotyad. Dei garra libum olabat seikridwan klos deya langa detlot rum en dei garra werrimon olabat ronwan klos bifo olabat garra go eniweya langa ola pipul.”

Labidakas 10:5

Wal deibin kaman en gajim detlot klos en garrimap det dubala ded bodi, en deibin deigim atsaid brom det kemp jis laik Mosis bin dalim dubala blanga dum.

Fes Pida 2:5

En blanga tharran na yumob jidan jis laiga laibalawan ston du, en God joinimap yumob garram Jisas Krais blanga bildimap det speshalwan haus blanga im, en yumob garra jidan speshalwan serramonimen blanga im du, en thru Jisas Krais na yumob garra dum ola enijing weya meigim im gudbinji jis laik yumob gibit im speshalwan sekrifais ofring.

Fes Pida 2:9

Bat yumob pipul hu bilib, God na bin pikimat yumob, en yumob jidan jis laiga speshalwan serramonimen blanga Jisas Krais det king, en yumob jidan jis laiga ronwan traib blanga im, en yumob na det ronwan pipul blanga God, en imbin pikimat yumob blanga dalimbat ebribodi blanga ola gudbala ting weya imbin dumbat. Basdam yumob nomo bin jidan ronwan pipul blanga God, en yumob nomo bin sabi God im kainbala. Bat tudei yumob jidan ronwan pipul blanga im, en yumob sabi im kainbala, dumaji imbin jingat langa yumob wen yumob bin jidan langa det dakbala pleis, en imbin dalim yumob blanga kaman en jidan langa det brabli gudwan lait blanga im.

Rebaleishan 1:6

En imbin meigim wi jidan jis laiga serramonimen blanga wek blanga im Dedi God. Wal wi garra gibit theingks langa Jisas Krais blanga tharran, dumaji im garram ola pawa olagijawan. Olagija im garram. Trubala dijan mi dalim yumob.

Rebaleishan 5:10

Yu na bin meigim detlot pipul brabli haibala. Yubin meigim olabat jidan speshalwan serramonimen blanga God, en olabat garra jidan bos langa ola kantri na.” Lagijat na deibin sing.