Labidakas 5:16 - Kriol Baibul

¹⁶ Wal im garra lafta peiyim detlot weya im nomo bin gibit basdam, en im garra gibit im lilbit mowa. En im garra gibit langa det serramonimen, en det serramonimen garra gibit det enimul blanga abum det sekrifais ofring blanga im weya imbin dumbat nogudbala ting, en tharran na garra meigim im jidan fri.

Labidakas 5:16 Iomraidhean Croise

Ola Saam 69:4

Detlot pipul hu nomo laigimbat mi fo najing, olabat jidan detmatj na, mowa den ol main heya langa main hed. Main enami olabat oldei dalimbat laiya stori blanga mi. Olabat strongbala en dei wandi kilim mi ded. Deibin meigim mi gibit ola ebrijing langa olabat weya ai nomo bin stilim.

Eksadas 22:1

If enibodi stilim samting, im garra pei. Bat if det men nomo garram enijing blanga peiyimbek, wal dei garra selim im blanga gedim det mani. If det men stilim buligi o ship, en im kilim det enimul o im selim det enimul, wal im garra peiyimbek faibala buligi blanga wanbala buligi en fobala ship blanga wanbala ship. If im stilim buligi o dongki o ship, en dei faindim det enimul laibala langa im haus, wal im garra peiyimbek dubala enimul blanga wanbala enimul. If enibodi luk sambodi gowin langa im haus naitaim blanga stilim enijing, en if im kilim det stilinbala ded, wal dei kaan panishim im weya imbin kilim det stilinbala ded. Bat if im deitaim wen im kilim det stilinbala ded, wal dei garra panishim im.

Labidakas 22:14

“If enibodi hu nomo blanga det serramonimen femili dagat det daga blanga det seikridwan ofring, en im nomo sabi, wal im garra lafta peiyimbek det serramonimen, en im garra gibit im lilbit mowa daga.

Labidakas 27:13

En if im wandim baiyimbek det enimul, wal im garra peiyimbek det seimwan mani en lilbit mowa.

Labidakas 27:15

En if im wandim baiyimbek det haus, wal im garra peiyimbek det seimwan mani en lilbit mowa.

Labidakas 27:27

bat ebri fesbonwan enimul weya nomo klinbala blanga serramoni, dei gin baiyimbek garram det raitwan mani en lilbit mowa. If im nomo bin baiyimbek, wal najawan men gin baiyim garram det raitwan mani.

Labidakas 27:31

If enibodi wandim baiyimbek detlot sid daga o frut daga, wal im garra pei det raitwan mani en lilbit mowa.

Labidakas 4:20

Wal im garra dum seim ting garram dijan buligi laik imbin dumbat basdam garram det buligi blanga det ofring blanga det nogudbalawei, en lagijat na im meigimbat sekrifais blanga detlot pipul en olabat garra jidan fri brom det nogudbalawei.

Labidakas 4:26

En im garra barnim det fet pat langa det teibul blanga ofring, jis laik imbin barnimbat det fet blanga det buligi weya imbin kilim blanga det feloship ofring. Wal lagijat na det serramonimen garra abum det sekrifais blanga det boswan men hubin dumbat nogudbala ting, en tharran garra meigim im jidan fri.

Labidakas 5:10

En im garra gibit det najawan bard blanga det barnapwan ofring jis laik det lowa bin dalim olabat. Wal lagijat na det serramonimen garra gibit det sekrifais blanga im nogudbalawei, en tharran garra meigim im jidan fri.

Labidakas 5:13

Wal lagijat na det serramonimen garra gibit det sekrifais blanga det nogudbalawei blanga im, en tharran garra meigim im jidan fri. En det najalot flauwa garra jidanbat blanga det serramonimen, jis laik im sid daga ofring.”

Labidakas 5:6

Im garra abum panishmen brom dumbat det nogudbalawei, en im garra lafta bringimap det nenigout o gelwan ship langa mi na YAWEI, en det serramonimen garra gibit det sekrifais ofring blanga det nogudbalawei weya imbin dumbat.

Labidakas 7:2

Imbin tok, “Wal det enimul blanga dijan ofring, dei garra kilim langa nowathsaid langa det teibul blanga ofring, weya ol detlot enimul blanga det barnapwan ofring dei oldei kilim. Im blad dei garra tjakambat langa det fobala said langa det teibul blanga ofring.

Nambas 5:7

im garra tok sori langa det sambodi blanga det nogudbala ting weya imbin dum, en im garra peiyimbek blanga wanim imbin dum rong, en im garra gibit im lilbit mowa du.

Nambas 5:8

Bat if det sambodi bin dai en im nomo garram eni rileishan, wal det sambodi hubin dum det nogudbala ting garra gibit det mani langa YAWEI blanga det serramonimen. Im garra gibit det mani seimtaim garram det dediwan ship ofring blanga meigim im fri brom det nogudbalawei.

Luk Bin Dalim Ola Stori Blanga Jisas Langa Wan Jintail Men 19:8

Wal Sekiyas bin jandap deya, en imbin dalim Jisas, “Bos, yu irrim mi na. Ai garra gibit haf ola enijing main langa ola powan pipul, en wen aibin stilimbat mani brom enibodi, wal ai garra gibitbek olabat fobala taim.”

Eks Hau Det Gudnyus Blanga Jisas Krais Bin Spredat Ebriweya 26:20

en aibin tok langa ola Juwish pipul deya langa Dameskas basdam, en afta aibin go en tok langa olabat deya langa Jerusalem, en brom deya aibin go en tok langa olabat ebriweya langa Judiya, en laswan aibin go en tok langa ola Jintail pipul du. Aibin dalimbat ol detlot pipul blanga tenim miselp brom olabat nogudbalawei en bulurrum God, en aibin dalimbat olabat dei garra dumbat det gudbala ekshan du.

Fes Semyul 6:3

Wal detlot serramonimen en doktabala bin tok, “If yumob jandimbek det Seikridwan Boks blanga det drimin blanga ola Isreil pipul, wal yumob kaan jandimbek det Boks nomo garram enijing. Yumob lafta jandimbek det Boks garram ofring blanga pei blanga yumob nogudbalawei, en wen yumob dum lagijat, det drimin garra meigim yumob gudbala, en afta yumob garra sabi wotfo imbin kipgon panishimbat wi.”