Labidakas 26:32 - Kriol Baibul

³² Ai garra binijimap yumob kantri brabliwei, en detlot enami blanga yumob hu garra kaman en teikoba det kantri blanga yumob garra brabli hatjamp.

Labidakas 26:32 Iomraidhean Croise

Fes Kings 9:8

Dijan Serramoni Pleis im garra buldan en im garra jidan ebriweya, en ebribodi garra gedim shok brabliwei en tok, ‘Wotfo YAWEI bin dum lagijat langa dijan kantri en dijan Serramoni Pleis?’

Aisaiya 24:1

“Wal trubala YAWEI det trubala God garra binijimap dijan wel, en im garra meigim dijan wel jidan wulijim deset kantri. YAWEI garra spredimatbat ola pipul ebriweya langa dijan wel.

Aisaiya 5:6

Im garra jidan eniwei du, nomo garram enijing. Nobodi garra lukaftumbat detlot greiptri. Im garra jidan garram loda jigiwan gras. En ai kaan jandim eni rein.

Aisaiya 5:9

Bat YAWEI det boswan God bin meigim dijan pramis langa mi. Imbin tok, ‘Detlot bigwan en gudwan haus garra jidan emtiwan, nomo garram enibodi blanga lukaftumbat.

Aisaiya 6:11

“Aibin askim YAWEI na, ‘Haulong dijan ting garra jidan lagijat?’ “Wal YAWEI bin tok langa mi, ‘Raidap olabat haus garra buldan en olabat taun garra bitsap en raidap olabat fam garra jidan nomo garram enijing,

Aisaiya 64:10

Detlot taun blanga yu, olabat jidan deset kantri na, en Jerusalem im jidan moweswan.

Jeramaiya 12:11

Olabat bin meigimbat det kantri brabli rabishwan. Im jidanbat nomo garram enijing na. Holot det kantri im jidan jis laik deset kantri, en nobodi iya nomo wori blanga tharran, najing.

Jeramaiya 18:16

Dei bin meigim dijan kantri jidan brabli nogudbala, en najalot pipul oldei rabishimbat dijan kantri. Ol detlot hu oldei gopas, dei gedim shok wanim olabat oldei lukinatbat. Olabat garra hatjamp nomo lilbit en sheikimbat olabat hed.

Jeramaiya 19:8

Ai garra nokamdan dijan taun, wulijim enibodi hu garra gopas garra hatjamp en gedim shok.

Jeramaiya 25:11

Holot dijan kantri garra jidan rabishwan en im garra jidan brabli nogudwan wen enibodi luk, en detlot najalot pipul, olabat frenmob garra ol wek blanga det king brom Bebalon blanga 70 yiya.

Jeramaiya 25:18

Jerusalem en ola taun blanga Juda en garram olabat king en lidamob, bin dringgim brom det kap, en olabat bin jidan jis laiga draiwan deset pleis. Olabat bin jidan brabli nogudwan, wulijim ola najalot pipul bin yusumbat olabat neim nogudbalawei, en olabat stil dumbat tudei.

Jeramaiya 25:38

Aibin libum main pipul olabat, jis laik det laiyan weya libum det keib weya im oldei jidanbat. Aibin meigim det kantri jidan jis laik deset kantri na, dumaji aibin brabli wail langa olabat en aibin jandim yumob enami blanga fait en binijimap yumob.” Lagijat na YAWEI bin tok.

Jeramaiya 33:10

“Ola pipul toktok blanga hau dijan pleis im jidan jis laik deset kantri, en nomo eni pipul o eni enimul jidanbat langa dijan pleis. En olabat rait. Detlot taun blanga Juda en detlot strit langa Jerusalem jidan emtiwan. Nomo eni pipul o enimul jidan deya, najing. Bat bambai yumob garra irrim ola pipul abumbat padi wen dubala git merrit en dei garra jingat hepiwei en meigimbat bigismob nois. Yumob garra irrim ola pipul garra sing wen olabat bringimap theingkyu ofring langa main Serramoni Pleis. Olabat garra tok, “ ‘Wi gibit theingks langa YAWEI det Boswan God, dumaji im brabli gudbala, Im laigim wi olagijawan.’ Ai garra meigim dijan kantri jidan brabli gudbalawei jis laik wen imbin jidan bifo.

Jeramaiya 44:2

YAWEI det boswan God bin tok, “Yubin luk detlot nogudbala ting weya aibin jandim langa Jerusalem, en langa detlot najalot taun langa Juda. Tudei na olabat stil jidanbat rabishwan en nomo eni pipul jidan deya na,

Jeramaiya 44:22

Tudei na blanga yumob kantri im jidan rabishwan en nobodi kaan jidan deya. Im brabli nogudbala, en sambala pipul oldei yusumbat im neim nogudbalawei, dumaji YAWEI kaan kipgon lukinatbat yumob nogudbalawei.

Jeramaiya 9:11

Wal YAWEI bin tok, “Ai garra meigim Jerusalem jidan rabishwan. Ola wailwan dog gulum jekal garra oldei jidanbat deya, en detlot taun blanga Juda garra jidan jis laik det deset kantri, weya nobodi jidan.”

Leminteishans 4:12

Basdam ola pipul langa Jerusalem en ola king en lidamob brom najalot kantri bin reken nobodi kaan nokamdan detlot geit blanga Jerusalem en gowin insaid en teikoba.

Isikiyel 5:15

Mi brabli wail langa yumob, en ai garra panishim yumob, en detlot pipul brom najawan kantri garra brabli bradin nomo lilbit. Olabat garra lukinat yumob en dei garra meigim fan langa yumob en olabat garra mokimbat yumob.

Denyul 9:18

God, yu irrim melabat. Yu irrim melabat en yu luk melabat na. Melabat oldei abumbat detmatj trabul. En yu luk detlot pipul weya abumbat adtaim langa det taun. Melabat preipreibat langa yu. Wal melabat kaan askim yu dumaji melabat gudbala, bat melabat gin oni askim yu dumaji yu brabli kainbala.

Denyul 9:2

Langa det feswan yiya na weya Daraiyas bin jidan king, mi na Denyul bin ridimbat detlot seikridwan buk, en aibin jinggabat wanim YAWEI det trubala God bin dalim Jeramaiya det speshalwan mesinja blanga Jerusalem, en hau det taun garra jidan bitsapwan blanga 70 yiya.

Hebakak 3:17

Wal mi na Hebakak, en mi tok dijan, “Ai garra preisim YAWEI brabli gudbinjiwei nomeda detlot figtri nomo abum daga, en ola greiptri, dei nomo abum daga. Nomeda detlot olibtri nomo abum eni daga en nomo eni sid daga gro langa detlot pedik. Nomeda ola ship dai, en det pleis weya detlot buligi jidan, im emtiwan, bat trubala, ai garra stil preisim YAWEI, dumaji im na bin seibum mi.

Luk Bin Dalim Ola Stori Blanga Jisas Langa Wan Jintail Men 21:20

“Wal wen yumob luk ola ami jidan raidaran langa dijan taun Jerusalem, yumob garra sabi det taim bin kaman blanga dijan taun en dei garra binijimap dijan taun.

Dyudaranami 28:37

En langa detlot kantri weya YAWEI garra jandimwei yumob, ola pipul langa detlot kantri garra gida shok wanim bin kaman langa yumob, en olabat garra meigimbat fan langa yumob en mokimbat yumob.