Joshuwa 22:6 - Kriol Baibul

^6-8 En imbin jandimwei olabat gudbinjiwei garram dijan wed, “Yumob bin gedim loda enijing iya langa dijan kantri. Yumob bin gedim loda buligi en olkain silba en gol en kopa en aiyan en loda klos du brom yumob enami. Wal wen yumob kamat langa yumob kantri, yumob garra sherimat detlot enijing langa yumob femili olabat.” Afta na wen Joshuwa bin tok lagijat, det thribala klen bin gobek langa det kantri weya Mosis bin gibit olabat sanraisaid langa det Jodan Riba. Longtaim Mosis bin gibit det kantri langa Rubin en Ged klen en langa sambala langa Manesa klen, en biyain langa olabat Joshuwa bin gibit det kantri sangodansaid langa det Jodan Riba langa det najalot pipul brom Manesa klen en langa ol detlot najalot Isreil klen.

Joshuwa 22:6 Iomraidhean Croise

Jenasis 14:19

en imbin dalim Eibram, “Det brabli haibala God hubin meigim ola kantri en skai, im na gudbinji langa yu.

Jenasis 47:10

Wal Jeikob bin tok gudbala wed langa det king, en afta Jeikob bin gudbai langa im en bin gowei na.

Jenasis 47:7

Afta na Josef bin bringimap im dedi langa det king, en wen Jeikob bin gudei langa im, imbin tok gudbala wed langa det king, en det king bin gudbinji,

Sekan Semyul 6:18

en wen imbin binij detlot serramoni, imbin gibit gudbala wed langa ola pipul, en imbin dalim olabat, “YAWEI det boswan God garra gudbala langa yumob.”

Sekan Semyul 6:19

Afta na King Deibid bin gibitbat daga langa ebri men en ebri gel brom ol detlot Isreil pipul hubin deya langa det serramoni. Imbin gibit olabat wanbala damba en wanbala kukwan bif en sambala daga gulum reisan. En afta ebribodi bin gobek langa olabat ron kemp.

Sekan Semyul 6:20

Wal afta na King Deibid bin gobek langa im ron kemp du blanga luk im femili olabat, en im waif Mikal bin kamat atsaid blanga midim im, en imbin dalim King Deibid nogudbalawei, “Yu haibala men, dumaji yu king blanga ola Isreil pipul, indit? Bat tudei yubin meigim miselp brabli lobala, dumaji yubin densdensbat jis laiga granggibala men lida langa ol detlot wekingel en wekinmen blanga yu, en yu nomo bin werrimon eni klos. Yubin oni gaburrumap miselp garram det shet.” Lagijat na Mikal bin tok.

Fes Kings 8:66

En langa det namba 8 dei Salaman bin jandimbek ebribodi langa olabat ronwan kemp. Deibin ol preisimbat im en deibin gobek gudbinjiwei dumaji YAWEI bin kain en dum detmatj gudbala ting blanga im wekinmen Deibid en ol im pipul langa Isreil.

Sekan Kranakuls 30:18

Sambala pipul hubin kaman brom detlot klen brom Ifreiyim, Manesa, Isaka en Sebyulan nomo bin meigim miselp klinbala blanga det serramoni, dumaji dei nomo bin sabi brabli blanga det Pasoba Serramoni. Deibin dagat detlot lilwan ship bat dei nomo bin sabi det lowa. Wal King Hesakaiya bin lafta prei blanga olabat na.

Eksadas 39:43

en Mosis bin tjekap ol detlot ting weya deibin dumbat, en imbin luk olabat bin dum ebrijing raitwei jis laik weya YAWEI bin dalim im blanga dum, en imbin tok gudbalawei langa detlot wekinmen blanga tharran.

Luk Bin Dalim Ola Stori Blanga Jisas Langa Wan Jintail Men 2:34

Brom deya det olmen bin gibit gudbala wed blanga det lilboi mami en dedi, en afta imbin tok langa det lilboi mami, “God bin jandim dijan lilboi blanga album loda Isreil pipul en blanga binijimap loda Isreil pipul du. Im garra shoum ola pipul wotkain God.

Luk Bin Dalim Ola Stori Blanga Jisas Langa Wan Jintail Men 24:50

Brom deya Jisas bin deigim im wekinmen olabat atsaid brom det taun Jerusalem, en deibin go langa det lilwan taun gulum Bethani, en deya na imbin lidimap im bingga, en imbin gibit olabat im laswan wed,

Joshuwa 14:13

Wal Joshuwa bin gudbinji langa Keilab, en imbin gibit im gudbala wed, en afta imbin gibit im det taun gulum Hebran.

Joshuwa 24:28

Brom deya Joshuwa bin larram ol detlot Isreil pipul gobek langa olabat ronwan kantri.

Fes Semyul 10:25

Afta na Semyul bin dalim ola pipul hau det nyubala lowa garra jidan blanga det king, en imbin raidimdan detlot lowa langa buk, en imbin pudum det buk langa wanbala seikridwan pleis blanga YAWEI. Afta wen imbin dum lagijat, imbin jandimwei ola pipul langa olabat ron kemp na.

Fes Semyul 2:20

En afta det serramonimen neim Ilai bin oldei tok gudbalawei langa det gel en im hasbin, en det serramonimen bin oldei dalim det hasbin blanga det gel, “YAWEI garra gibit yu en yu waif mowa biginini blanga deigim pleis blanga dijan lilboi weya yunbala bin gibit langa God.” Lagijat na det serramonimen bin oldei tok, en afta dubala bin oldei gobek langa dubala kemp. Lagijat na dubala bin oldei dumbat.