Joshuwa 12:1 - Kriol Baibul

¹ Wal longtaim wen Mosis bin stil jidan laibala, ol detlot Isreil pipul bin teikoba ol detlot kantri sanraisaid brom det Jodan Riba. Deibin bidim dubala king det said langa det riba, en deibin teikoba ol detlot kantri brom det Anan Riba raidap langa det Jodan Riba olawei raidap langa det hil gulum Heman.

Joshuwa 12:1 Iomraidhean Croise

Fes Kings 4:19

Geba det san blanga Uri bin bos blanga det kantri gulum Giliyad. Longtaim King Saihon bin jidan bos blanga ola Emarait pipul, en King Og bin jidan boswan blanga ola Beishan pipul deya. Wal wanbala haibala gabman bos bin jidan brabli boswan langa ola kantri langa Isreil en langa ol dislot men.

Ola Saam 133:3

En im brabli gudwan jis laik det dyu ontop langa det bigwan hil gulum Hemen en langa detlot hil langa Saiyan. Deya na YAWEI bin pramisim blanga gibit im pipul olabat det olagijawan laif.

Ola Saam 136:21

Imbin pulumat olabat kantri, en imbin gibit langa ola Isreil pipul friwan. Trubala, im laigim wi tudei en olagijawan.

Ola Saam 89:12

Yubin meigim nowath en sauth. Teibowa en Heman, det dubala bigwan hil sing langa yu gudbinjiwei.

Aisaiya 16:2

Detlot wuman brom Moweb bin deya gulijap langa det Anan Riba blanga ranawei, wulijim bigismob bard spredatbat brom olabat nes.

Nambas 21:13

Brom deya olabat bin shifdim kemp igin langa det nowathsaid langa det Anan Riba langa det deset kantri weya imbin go langa det Emarait kantri. Det Anan Riba bin det boda blanga Moweb pipul kantri en Emarait pipul kantri.

Nambas 21:21

Brom deya detlot Isreil pipul bin jandim wed langa Saihan det king blanga detlot Emarait pipul.

Nambas 21:24

Bat detlot Isreil pipul bin kilim ded sambala enami wen olabat bin faitfaitbat langa olabat en deibin deigim olabat kantri brom det Anan Riba langa sauthsaid raidap nowathsaid langa det Jeibak Riba. Nowathwei igin brom det Jeibak Riba detlot Emanait pipul bin jidan, en det Emanait pipul boda bin brabli strongbala.

Nambas 32:19

Melabat kaan kadimat eni kantri blanga olabat det najasaid langa Jodan Riba, dumaji melabat bin gajim melabat pat iya sanraisaid langa Jodan Riba.” Deibin tok lagijat.

Nambas 32:32

Melabat garra dum wanim YAWEI bin dalim melabat blanga dum. Wal melabat garra go kros langa det kantri gulum Keinan en melabat garra fait, wulijim melabat garra abum dijan kantri sanraisaid langa det Jodan Riba.” Lagijat na deibin tok.

Nambas 32:33

Ol detlot kantri en ol detlot taun weya deibin teikoba brom Saihan det king blanga detlot Emarait pipul en Og det king blanga detlot Beishan pipul Mosis bin gibit langa detlot klen blanga Ged en Rubin en haf det klen blanga Manesa.

Dyudaranami 2:24

Wal Mosis bin tok na, “Afta wibin go thru langa Moweb YAWEI bin tok langa wi, ‘Yumob krosim det riba gulum Anan. Ai garra album yumob blanga bidim detlot Idamait pipul en teikoba det kantri. En ai garra hendimoba langa yumob det Idamait king gulum Saihan brom det taun gulum Heshban.

Dyudaranami 2:32

Wal wen King Saihan bin kaman garram ola men blanga im blanga fait langa wi gulijap langa det taun gulum Jeihas,

Dyudaranami 3:1

Wal Mosis bin kipgon tok langa ola Isreil pipul, “Brom deya wibin go langa det roud langa det kantri gulum Beishan, en King Og bin kaman garram im soljamob blanga fait langa wi gulijap langa det taun gulum Idrei.

Dyudaranami 4:44

Wal afta deibin libum Ijip en wen deibin sanraisaid langa det Jodan Riba gulijap langa det taun gulum Bethpiyowa, deya na Mosis bin gibit detlot lowa blanga God langa detlot Isreil pipul. Tharran pleis bin weya King Saihan bin jidan bos blanga detlot Emarait pipul langa det taun gulum Heshban. Wal Mosis en detlot pipul brom Isreil bin bidim detmob.

Dyudaranami 4:48

Dijan kantri bin gajimap det taun gulum Eroya, gulijap langa det riba gulum Anan en raidap langa nowathwei langa det hil gulum Siriyon, det naja neim bin Heman,

Joshuwa 1:15

Detlot solja garra kipgon albumbat olabat raidap olabat garra gedim ol detlot kantri sangodansaid langa det riba weya YAWEI bin gibit olabat. En wen olabat gedim olabat kantri, wal yumob gin kambek disaid langa yumob ronwan kantri en jidan iya, dumaji Mosis det wekinmen blanga God bin gibit langa yumob dijan kantri na.” Lagijat na Joshuwa bin tok.

Joshuwa 11:17

Imbin teikoba ola kantri brom det hil gulum Heilak sauthwei gulijap langa det kantri gulum Idam raidap langa det taun gulum Beilged deya langa det kantri gulum Lebanan Beli disaid langa det hil gulum Heman.

Joshuwa 11:3

en imbin jandim det wed langa ola Keinanait pipul disaid langa det Jodan Riba en langa ola Keinanait pipul det said langa det Jodan Riba en langa ola Emarait, Hitait, Perasait en Jebusait pipul hubin jidan langa det hil kantri en langa ola Hibait pipul hubin jidan langa det hil gulum Heman deya langa det kantri gulum Mispa. King Jeibin bin jingat langa ol detlot pipul na,

Joshuwa 13:8

Wal basdam bifo ola Isreil pipul bin krosim det Jodan Riba, det dubala klen gulum Rubin en Ged en sambala pipul brom det klen gulum Manesa bin gedim olabat kantri sanraisaid brom det riba. Mosis det wekinmen blanga YAWEI bin gibit olabat det kantri bifo imbin dai.

Joshuwa 22:4

en YAWEI bin meigim olabat jidan gudbalawei jis laik imbin pramisim olabat. “Wal yumob garra gobek langa yumob ronwan kantri na. Yumob garra gobek langa det kantri weya Mosis bin gibit yumob sanraisaid langa det Jodan Riba,

Jadjis 11:18

“Bambai na deibin kipgon, en deibin go thru langa det deset kantri, dumaji deibin lafta goran brom det dubala kantri Idam en Moweb, en afta deibin kamat sanraisaid brom Moweb, en deibin kemp deya wansaid langa det Anan Riba. Bat dei nomo bin krosim det riba, dumaji imbin det bandri blanga Moweb, en deya na det bandri blanga yu kantri.