Jeramaiya 7:31 - Kriol Baibul

³¹ Wal langa det Hinam Beli yumob bin bildimap det teibul blanga ofring dei gulum Tofeth, wulijim yumob bin meigim yumob san en doda jidan sekrifais langa det faiya. Ai nomo bin dalim yumob blanga dum tharran, dumaji ai nomo bin jinggabat detkain ting.

Jeramaiya 7:31 Iomraidhean Croise

Sekan Kings 17:17

En langa ola nogudwan drimin deibin gibit olabat ronwan biginini blanga barnimap blanga sekrifais ofring en deibin oldei go langa detlot hu oldei askimbat ola spirit blanga wanim garra hepin bambai en hu oldei yusumbat olkain klebabala ting du. En deibin laigim dumbat ola nogudbala ting weya YAWEI nomo bin laigim.

Sekan Kings 23:10

Wal King Josaiya bin bitsimap det weship pleis blanga Topheth langa det beli gulum Hinam, wulijim olabat kaan gibit olabat bigininimob laiga barnapwan ofring langa det drimin gulum Molek.

Sekan Kings 23:20

King Josaiya bin kilim ola serramonimen hubin oldei weshipbat blanga detlot drimin sheip. En imbin barnimap ola boun blanga olabat ontop langa detlot teibul blanga ofring weya deibin oldei wek en imbin gobek langa Jerusalem.

Sekan Kranakuls 28:3

en imbin barnim gudsmelwan medisin langa Hinam Beli, en imbin sekrifais im ronwan sanmob laik deibin gibit barnapwan ofring langa detlot drimin sheip. Imbin dum detlot seimwan nogudbala ting weya ola pipul bin dum basdam weya YAWEI bin andimwei wen det Isreil ami bin kaminap.

Sekan Kranakuls 33:6

En imbin pudumap purdiwan ston blanga najalot drimin langa det Serramoni Pleis. King Manesa bin dumbat detlot klebabala trik en najalot nogudwan ting en imbin askim detlot klebabalamen blanga dalim im wanim blanga dum. En imbin sekrifais im ronwan san olabat deya langa det pleis gulum Hinam Beli. Imbin dum bigismob nogudbala ting en imbin meigim YAWEI brabli wail. Longtaim God bin dalim King Deibid en im san Salaman, “Jerusalem im det pleis weya aibin pikimat brom eni najawan pleis deya langa Isreil. Im blanga main, en deya langa det serramoni pleis dei garra oni weshipbat mi olagijawan.

Aisaiya 30:33

Wal longtaim YAWEI bin abum pleis redibala blanga barnimbat det bodi blanga det king brom Asiriya. Det pleis im brabli dipwan en brabli bigwan, en bigismob wud im deya du, en YAWEI garra jandim det faiya blanga barnimap ebrijing na.”

Aisaiya 57:5

Yumob oldei weshipbat detlot drimin sheip wen yumob silipsilipbat garram enibodi andanith langa detlot sheidiwan tri. Yumob oldei sekrifais yumob ronwan biginini ontop langa detlot teibul blanga ofring blanga detlot drimin sheip. Yumob bin dumbat detkain langa detlot beli en langa detlot stoniwan pleis.

Jeramaiya 19:2

en go langa det Hinam Beli atsaid langa det Potishad Geit. Imbin dalim mi blanga dalim dijan mesij na langa detlot pipul.

Jeramaiya 2:23

Wotfo yumob tok yumob jidan klinbala blanga serramoni, en yumob nomo bin weshipbat Beil? Yumob luk ol detlot nogudbala ting yumob bin dumbat langa det hil kantri. Yumob brabli wailwan, jis laik det yangwan kemul wen im ran olaran ebriweya.

Jeramaiya 32:34

Olabat bin pudum det nogudbala drimin sheip blanga olabat insaid langa det Serramoni Pleis weya olabat bin bildimap blanga weshipbat mi en olabat bin meigim det pleis nogudwan.

Jeramaiya 32:35

Detlot Juda pipul bin oldei dumbat nogudbala ting. Olabat bin bildimap teibul blanga ofring blanga Beil langa det pleis gulum Hinam Beli blanga meigim olabat ronwan san en doda blanga sekrifais langa det drimin gulum Molek. Ai nomo bin dalim olabat blanga dum tharran nogudbala ting, en im nomo bin kamat brom mi.” Lagijat na YAWEI bin tok langa mi.

Isikiyel 16:20

“Bambai na yubin abum biginini blanga mi. Yubin abum boiwan en gelwan, en yubin meigim olabat jidan sekrifais ofring blanga detlot drimin sheip. Yubin olredi gibit mi bekboun. Wotfo yu wandi sekrifais main bigininimob du?

Isikiyel 20:26

Olabat bin sekrifais olabat ronwan feswan san langa faiya. Aibin larram olabat nomo jidan klinbala blanga det serramoni. Aibin larram olabat dum tharran blanga meigim olabat brabli nogudbinji nomo lilbit blanga shoum olabat mi na YAWEI.

Isikiyel 20:31

Tudei na yumob stil gibitbat detlot seimwan ofring en yumob nomo jidan klinbala blanga serramoni brom weshipbat detlot drimin sheip en yumob sekrifais yumob ronwan bigininimob langa faiya du. Bat ol yumob Isreil pipul stil kaman en askim mi wanim ai wandim yumob blanga dum. Mi na YAWEI det boswan God, en trubala ai dalim yumob. Ai kaan ensimbek yumob.’ ”

Labidakas 18:21

Nomo gibit yumob biginini blanga sekrifais ofring langa det drimin gulum Molek, dumaji tharran meigim mi brabli nogudbinji.

Maika 6:7

If wi bringimap 1,000 ship en bigismob oliboil en gibit langa im blanga ofring, dei garra meigim im gudbinji? Nomo! Maitbi wi garra gibit im detlot feswan biginini blanga wi blanga pei blanga ola nogudbala ting weya wibin dumbat.

Dyudaranami 12:31

Yumob weship YAWEI det trubala God blanga wi brabliwei, nomo laik ola najalot pipul hu weshipbat ola difrinkain drimin, dumaji dei dumbat ola brabli nogudbala ting weya YAWEI nomo laigim. Dei barnimapbat olabat biginini langa faiya ontop langa det teibul blanga ofring.

Dyudaranami 17:3

wen imbin weshipbat detlot drimin o det san o mun o detlot sta. Wal blanga tharran na im nomo bin teiknodis langa det lowa blanga YAWEI.

Dyudaranami 18:10

Yumob nomo lau blanga sekrifais yumob biginini langa faiya langa det teibul blanga sekrifais ofring langa detlot drimin. En yumob nomo lau blanga dumbat klebabala ting blanga faindat wanim garra hepin langa yumob bambai. En yumob nomo lau blanga singim enibodi. En wen yumob luk samting langa skai laik det lait o wen det bard im jingat o najalot enijing, nomo jinggabat en bradin, en nomo go langa eni klebabala blanga faindat wanim im min. En yumob nomo lau blanga askim enijing langa det spirit blanga det dedbala.

Joshuwa 15:8

en brom deya imbin go thru langa det pleis gulum Hinam Beli deya sauthsaid langa det hil weya det taun gulum Jerusalem bin jidan. Detlot pipul gulum Jebusait bin oldei jidan langa det taun. En brom deya det boda bin go ontop langa det hil sangodansaid brom det Hinam Beli raidap nowathsaid langa det pleis gulum Refait Beli,