Jeramaiya 5:22 - Kriol Baibul

²² Wal mi na YAWEI. Wotfo yumob nomo bradin langa mi? Wotfo yumob nomo sheiksheikbat en baudan lida langa mi? Aibin pudum sengraun raidaran langa solwoda blanga stapam det solwoda. Im garra jidan olagija en det solwoda kaan krosim det sengraun. Detlot solwoda gin go brabli haiwan, bat im kaan go raidoba langa det sengraun, en det weib gin meigim bigwan nois, bat im kaan breik thru det sengraun.

Jeramaiya 5:22 Iomraidhean Croise

Jenasis 1:9

Brom deya God bin tok, “Larram det woda langa bodam hipimap miselp langa wan pleis blanga meigim draiwan kamat.” En imbin hepin lagijat na,

Fes Kings 13:28

en det olmen bin go en faindim det bodi blanga det speshalwan mesinja leidanbat langa det roud. En det dongki en laiyan bin stil deya jandapbat wansaid langa im du. En det laiyan nomo bin dagat det bodi en im nomo bin ardim det dongki.

Job Wotfo Gudbala Pipul Abum Trabul? 26:10

God bin pudum raunwan mak langa midul langa det solwoda blanga kadimat det dakbala brom det lait.

Job Wotfo Gudbala Pipul Abum Trabul? 37:24

Wal wi bradin langa God, dumaji im nomo teiknodis langa detlot hu oldei jidan praudbalawei en reken dei sabi ebrijing.” Lagijat na Ilaihu bin tok.

Job Wotfo Gudbala Pipul Abum Trabul? 38:8

Hubin meigim det solwoda stap langa im ronwan pleis,

Ola Saam 104:9

Yubin pudumdan bandri weya dei kaan neba pasim, wulijim dei kaan gaburrumap dijan wel igin.

Ola Saam 119:120

YAWEI, mi bradin langa yu en mi sheiksheik nomo lilbit dumaji yu det brabli haibalawan God en ai sabi hau yu jadjim pipul.

Ola Saam 33:7

Imbin hipimap ola solwoda langa wan pleis. Imbin lokimap ola woda raitdan andanith langa det solwoda langa im ron stowahaus.

Ola Saam 46:3

Wi kaan bradin nomeda if det solwoda gidap en meigim loda nois, en nomeda if det solwoda bambum detlot bigwan hil en olabat sheik.

Ola Saam 99:1

YAWEI im Bos en ola pipul sheik nomo lilbit. Im jidan langa im speshalwan tjeya deya langa midul langa det dubala golwan sheip garram wing. En dijan wel im sheiksheik.

Prabebs 8:29

Aibin deya wen imbin dalim det solwoda nomo blanga pasim det mak, en aibin deya wen imbin meigim det draiwan graun.

Aisaiya 50:2

“Aibin kaman en jinginat langa yumob, bat yumob nomo bin ensim langa mi. Ai nomo bin lujim main pawa blanga album en seibum yumob. Wen ai tok langa det solwoda en riba blanga jidan wulijim det deset, wal det woda jis draiyap, en ola fish dai en go jinggiwan, dumaji nomo eni woda bin deya.

Aisaiya 64:2

Yu stadimap det faiya en meigim det woda boilap wulijim detlot enami blanga yu garra sabi hu yu, en ola pipul langa ebri kantri garra sheiksheikbat nomo lilbit, dumaji olabat garra sabi yu kaminap gulijap na.

Aisaiya 66:5

If yumob sheiksheik wen YAWEI tok, yumob garra irrim langa im gudwei. Im tok, “Sambala yumob ronwan pipul nomo laigim yumob en olabat gibit bekboun langa yumob, dumaji yumob laigim en jidan trubala langa mi. Olabat oldei meigimbat fan blanga yumob en dei oldei tok ‘Larram YAWEI shoum im pawa. Larram wi luk im meigim olabat jidan brabli hepiwan.’ Bat detlot pipul hu tok ol dislot ting garra sheim miselp brabliwei.” Lagijat na YAWEI bin tok.

Jeramaiya 10:7

Oni yu na king langa ebri kantri. Wotfo ebribodi nomo weship langa yu? Nomo enibodi jidan wulijim yu langa ol dislot klebabala men langa ola kantri, en langa olabat king.

Jeramaiya 2:19

Blanga yumob ronwan nogudbalawei garra panishim yumob, dumaji yumob bin tenawei brom mi, en tharran na garra jadjim yumob. Yumob garra len im brabli nogudbala ting wanim yubin dum wen yubin gibit bekboun langa mi. Mi na YAWEI det brabli boswan God blanga yumob, en yumob nomo bin jidan trubala langa mi.”

Jeramaiya 31:35

Wal YAWEI meigim det san gibitbat lait deitaim, en meigim det mun en sta gibitbat lait naitaim. Im oldei meigim det solwoda brabli haiwan en jingat adbala. Im neim YAWEI det brabli boswan God.

Denyul 6:26

Ai dalim yumob, ebribodi langa ola kantri weya ai jidan bos garra rispek brabliwei det God blanga Denyul. “Im na det laibalawan God, en im jidan bos olagijawan. Nobodi kaan bidim im, en im pawa kaan neba binij.

Eimos 4:12

En blanga tharran na ai garra panishim yumob, en dumaji ai garra dum lagijat, yumob lafta meigim miselp redi blanga det adtaim weya ai garra panishim yumob.” Lagijat na YAWEI bin tok langa yumob.

Eimos 9:6

“YAWEI bin bildimap im kemp deya ontop langa hebin. Imbin gaburrumap dijan graun garram det skai. Imbin gajim woda brom solwoda en spilim eniweya langa dijan graun. Im neim YAWEI det trubala God.”

Jona 1:16

Wal detlot boutmen bin brabli bradin blanga YAWEI na, en deibin meigim det sekrifais serramoni blanga im, en deibin meigim olkain pramis langa im.

Neiham 1:4

En wen im dalim detlot solwoda blanga draiyap, detlot solwoda draiyap, en im meigim ola riba draiyap du. En im meigim ola gudwan pedik langa det kantri gulum Beishan go brabli draiwan, en ola grinwan gras deya langa det hil gulum Kamul jidan draiwan du, en ola purdiflawa langa det kantri gulum Lebanan binij du.

Methyu 10:28

“Yumob kaan bradin blanga detlot pipul hu gin kilim yumob ded. Dei gin kilim ded det bodipat blanga yumob, bat dei kaan kilim ded det spiritpat blanga yumob. Yumob garra bradin oni langa God, dumaji im gin kilim yumob bodipat en spiritpat ded en afta im gin tjakam yumob langa det helfaiya. Trubala ai dalim yumob. Oni langa im na yumob garra bradin.

Mak Bin Dalim Ola Stori Blanga Jisas 4:39

Wal Jisas bin gidap, en imbin dalim det win blanga stap, en imbin dalim det woda blanga jidan kwaitbala, en det win bin stap, en detlot weib bin ol jidan kwaitbala.

Luk Bin Dalim Ola Stori Blanga Jisas Langa Wan Jintail Men 12:5

“Ai dalim yumob blanga hu yumob garra bradin. Yumob garra bradin langa God, dumaji im gin kilim yumob ded, en afta im gin tjakam yumob langa det helfaiya. Trubala ai dalim yumob. Oni blanga im na yumob garra bradin.

Dyudaranami 28:58

“Wal if yumob nomo teiknodis en duwit brabliwei langa God wed weya imbin raidimdan langa dijan buk, en if yumob nomo rispek det brabli haibala neim blanga YAWEI,

Rebaleishan 15:4

Nobodi kaan tenawei brom yu olagija, dumaji ebribodi garra jinggabat yu. Dei garra lukbek langa yu en weship langa yu. Nobodi jidan brabli gudwan. Oni yu na. En ola traib langa ebri kantri garra kaman langa yu, en dei garra baudan en tok gudwei langa yu, dumaji yu na bin dumbat ola gudwan wek, en ebribodi bin luk.” Lagijat na detlot pipul bin tok.