Jeramaiya 5:17 - Kriol Baibul

¹⁷ Olabat garra dagadagat ola sid daga en frut daga blanga yumob, en olabat garra kilim yumob doda en san. En olabat garra kilim yumob enimul, en kadimdan ola greip en figtri. Detlot strongbala taun weya yumob reken yu jidanbat seifwan, det amimob blanga olabat garra binijimap yumob.”

Jeramaiya 5:17 Iomraidhean Croise

Aisaiya 62:8

“Wal YAWEI bin gibit im wed, en imbin meigim dijan pramis, ‘Ai kaan neba gibit yumob enami olabat ol detlot sid daga en greip daga weya yumob bin plentimbat en dumbat adwek.

Aisaiya 62:9

Trubala yumob bin gajimbat detlot sid daga en greip daga, en yumob garra dagat det damba en yumob garra jidan brabli gudbinji en preisimbat mi na YAWEI, en yumob garra dringgimbat det wain insaid langa main Serramoni Pleis.’

Aisaiya 65:22

Nomo enibodi kaan neba deigidawei olabat haus en greip fam igin. Main pipul olabat garra jidan brabli olwan, jis laik detlot olbala tri, en olabat garra gudbinji blanga wanim olabat bin oldei dumbat.

Jeramaiya 1:15

dumaji mi jinginatbat langa ola pipul langa detlot nowathsaid kantri blanga kaman. En olabat king garra pudumap olabat speshalwan tjeya deya langa detlot geit deya langa Jerusalem en raidaran langa det wol, en raidaran najalot taun langa Juda.

Jeramaiya 4:26

Det gudbala kantri bin jidan jis laik deset kantri. En detlot taun bin jidan rabishwan, dumaji YAWEI bin brabli wail.

Jeramaiya 4:7

Det ami weya bin binijimap ola difrinwan kantri garra kaman jis laik det laiyan weya kaminap brom det pleis weya im oldei haidimbat miselp. Det ami garra libum ol detlot taun blanga Juda rabishwan, en nomo enibodi garra jidan deya laibala enimo.

Jeramaiya 5:18

Wal YAWEI bin tok na, “Jeramaiya, ai kaan larram detlot enami kilim ebribodi hu jidan langa Juda. En wen olabat garra askim wotfo dislot ting bin hepin, yu garra dalim olabat, dumaji olabat bin gowei brom mi, en olabat oldei weshipbat drimin langa olabat ronwan kantri. Blanga tharran na olabat garra lafta dum adwek langa najawan kantri nomo blanga olabat.”

Jeramaiya 50:17

Wal YAWEI bin kipgon tok, “Detlot Isreil pipul, olabat jis laik detlot ship wen detlot laiyan ranimap olabat en spredimat olabat oloba. Det boswan brom Asiriya bin fait langa olabat basdam, en afta King Nebakanesa brom Bebalon bin wandim binijimap olabat.

Jeramaiya 50:7

Enibodi hu garra faindim olabat, garra fait langa olabat. Blanga olabat enamimob oldei tok, ‘Olabat bin dum nogudbala ting langa YAWEI, en wanim wi dumbat im nomo rong. Olabat nomo bin oldei trastimbat YAWEI laik olabat grengrenfathamob bin oldei dum.’

Jeramaiya 8:13

“Aibin oldei wandim majurrumap main pipul olabat, jis laik det fama weya im oldei majurrumap detlot daga, bat yumob jidan jis laik det greiptri weya nomo garram eni greip daga, en jis laik det figtri weya nomo garram eni fig daga. En detlot bushis bin draiyap du. Wal blanga tharran na, aibin larram detlot streinja pipul teikoba det kantri.” Lagijat na YAWEI bin tok.

Jeramaiya 8:16

Blanga melabat enami, olabat olredi langa det taun gulum Den na. Melabat gin irrim detlot hosis jinginatbat. Wen detlot hosis jinginat adbala dei meigim dijan kantri sheiksheikbat nomo lilbit. Blanga melabat enamimob, deibin olredi kaman na blanga binijimap langa melabat kantri en ebrijing iya langa melabat taun en ola pipul du.”

Leminteishans 2:12

Ola biginini oldei askimbat olabat mami blanga daga en woda. En dei oldei buldanbuldan ebriweya langa ola roud jis laik men wen sambodi bin ardimbat olabat langa fait. En detlot biginini oldei dai slobala langa olabat mami bingga.

Leminteishans 2:2

YAWEI nomo bin sori langa enibodi wen imbin binijimap ol detlot taun langa Isreil. Deya langa det kantri imbin pulumdan ol detlot strongwan wol en taun weya kipum pipul seif wen eni enami kaman langa olabat. Imbin meigim det kantri Isreil en detlot lidamob sheim miselp nomo lilbit en olabat najing na.

Isikiyel 36:4

“ ‘Wal ol yumob bigwan hil en lilwan hil en ola lilwan en bigwan krik, yumob lisin langa mi na wanim ai garra dum. Nomeda ola taun blanga yumob jidan rabishwan na, en ola pipul brom najalot kantri oldei laflafbat en mokimbat langa yumob,

Hoseiya 2:12

en ai garra rudimat ola greiptri en ola figtri brom ola gadin blanga im. Imbin reken im boifren olabat bin gibit im ol detlot tri dumaji imbin oldei silipsilipbat garram olabat. Bat najing. Dei nomo bin gibit im ol detlot tri. Mi na bin gibit im detlot tri. Bat ai garra meigim olkain rabishwan tri gro langa detlot gadin blanga im, en olkain wailwan enimul garra jidanbat deya langa detlot gadin en meigim detlot gadin jidan nogudwan.

Hoseiya 8:14

“Ol detlot Isreil pipul bin meigimbat bigismob bigwan haus. Bat dei nomo jinggabat mi hubin meigim olabat. En detlot Juda pipul bin bildimap bigismob strongbala taun weya olabat enami kaan bidim olabat. Bat ai garra barnimap ol detlot strongbala taun blanga olabat.” Lagijat na YAWEI bin tok.

Jowal 2:3

“Ol detlot grashopa garra binijimap ebrijing jis laiga faiya barnimap ola gadin. Det kantri luk brabli purdiwan lida langa detlot grashopa. Im jidan jis laik det gadin gulum Idin. Bat wen detlot grashopa garra go thru langa det kantri, im garra jidan jis laiga draiwan deset kantri. En nomo enijing kaan gro weya detlot grashopa garra jidan.

Labidakas 26:16

wal ai garra panishimbat yumob. Ai garra panishim yumob brabliwei, en ai garra jandim strongbala siknis en tharran na garra meigim yumob blainwan, en meigim yumob laif nogud. Wal yumob garra plentimbat sid daga, bat im kaan jidan gudwan, dumaji ola enami blanga yumob garra kaman en bidim yumob en olabat garra dagat detlot daga weya yumob bin growimapbat.

Sefanaiya 3:6

Wal YAWEI im tok, “Aibin binijimap detlot pipul deya langa detlot najalot kantri. Ol detlot strongwan haus en wol bin buldan, en detlot haus ol breigimdan en nobodi wokwok langa detlot roud na. Detlot taun jidan emtiwan, nobodi jidan deya langa olabat.

Melakai 1:4

Bat maitbi ol detlot Idamait pipul hubin bigininimob blanga Isau garra tok blanga gobek langa det kantri. En maitbi dei garra tok gija, “Detlot enami bin bidim wi en wi taun olabat ol binij, bat wi garra bildimap ola taun igin.” Wal YAWEI garra tok, “Detlot pipul gin bildimap olabat igin, bat ai garra breigimdan olabat igin.” En najalot pipul garra tok, “Idam im det kantri garram brabli nogud pipul. YAWEI garra wail olagijawan langa detlot Idamait pipul.”

Dyudaranami 28:33

Detlot pipul brom najawan kantri garra deigimwei detlot sid daga weya yumob bin adwek en growimap. Wal yumob kaan gajim enijing. Detlot pipul brabli krulbala en olabat garra oldei tridim yumob nogudbalawei.