Jeramaiya 36:9 - Kriol Baibul

⁹ Wal langa det namba 9 manth langa det namba 5 yiya wen Jehoiyakim bin jidan king langa det kantri gulum Juda, detlot pipul nomo bin dagadagat daga blanga meigim YAWEI tridim olabat gudwei. Detlot pipul hubin dum tharran bin jidan langa Jerusalem en langa detlot taun blanga Juda.

Jeramaiya 36:9 Iomraidhean Croise

Sekan Kranakuls 20:3

Wal King Jehosafet bin bradin nomo lilbit en imbin lafta prei en askim YAWEI det trubala God blanga album im. En imbin dalim detlot pipul langa Juda nomo dagat eni daga, dumaji olabat garra jidan soribala,

Niyamaiya 9:1

Wal langa det namba 24 dei blanga det seimwan manth, det namba 7 manth, detlot Isreil pipul bin kadimat miselp brom detlot pipul brom ola najalot kantri, en deibin majurrumap miselp igin dumaji deibin nogudbinji blanga detlot nogudbala ting weya deibin dumbat. Ol detlot pipul hu grengrenfatha olabat bin brom det femili lain blanga Isreil bin werrimon rafwan klos, en deibin pudum graun langa olabat hed en dei nomo bin dagat eni daga dumaji deibin sori miselp detmatj. Deibin wandi onap blanga olabat nogudbalawei en det nogudbalawei blanga olabat grengrenfatha olabat.

Esta 4:16

“Yu garra go en majurrumap ola Juwish pipul hu jidan iya langa Susa, en ol yumob kaan dagat daga o dringgim enijing deitaim o naitaim fo 3 dei, en yumob garra prei blanga mi. En mi en main wekingel olabat garra dum lagijat du. Afta tharran ai garra go langa det king, nomeda det lowa tok ai kaan go. If ai dai, wal ai gin dai.” Esta bin jandimbek im wed lagijat na.

Jeramaiya 36:1

Langa det namba 4 yiya wen Jehoiyakim det san blanga Josaiya bin jidan king langa Juda YAWEI det trubala God bin tok langa mi na,

Jeramaiya 36:22

Imbin kolwethataim, en det king bin jidan langa im tjeya lida langa det faiyapleis.

Jeramaiya 36:6

Bat ai wandim yu garra go deya neks taim langa det dei wen detlot pipul nomo dagatbat daga. Yu garra go deya en yu garra ridimat detlot wed brabli adbala wulijim detlot pipul garra irrim ebrijing wanim YAWEI bin dalim mi, en weya yubin raidimdan blanga mi. Yu garra dum dijan wulijim ebribodi gin irrim langa yu, en detlot pipul brom ola lilwan taun hu oldei jidan olaran langa Juda gin irrim yu du.

Jowal 1:13

“Wal ol yumob serramonimen hu oldei wek langa det seikridwan teibul deya langa det Serramoni Pleis, yumob garra werrimon rabishwan klos blanga sori miselp, en yumob garra go langa det Serramoni Pleis en kraikrai deya olnait, dumaji nomo eni sid daga en wain blanga gibit ofring langa YAWEI.

Jowal 1:14

“Yumob serramonimen garra jingat langa ola pipul en dalim olabat nomo blanga dagat eni daga, en yumob garra majurrumap olabat garram olabat lida deya langa det Serramoni Pleis blanga YAWEI det trubala God blanga wi,

Labidakas 23:27

“Det namba 10 dei langa det namba 7 manth, det dei na yumob garra abum serramoni blanga deigidawei yumob nogudbalawei weya yumob oldei dumbat. Wal langa det dei na, yumob nomo lau blanga dagat eni daga. Yumob garra kaman en weshipbat iya, en gibitbat det ofring langa mi na YAWEI.

Jona 3:5

Wal ol detlot pipul langa det taun bin ol lisin langa det wed blanga God, en deibin tok, “Wi garra werrimon ola sekbeigwan klos, en wi kaan dagat eni daga du. Wi garra dum lagijat blanga shoum God wi garra libum ola nogudbalawei blanga wi en bulurrum det wei blanga im. Wi holot garra dum lagijat.”

Sekaraiya 8:19

“Bifo yumob pipul bin jidan nomo dagat daga langa det namba 4 manth, en det namba 5 manth, en det namba 7 manth en det namba 10 manth, dumaji yumob bin shoum yumob bin jidan soribala, bat bambai langa detlot manth yumob garra abum gudbinji taim blanga dagat daga en dringgimbat, en yumob Juda pipul garra laigim det trubalawei en jidan gudbalawei.”

Jadjis 20:26

Brom deya detlot Isreil pipul bin go langa det seikridwan pleis blanga YAWEI igin, en deibin sori miselp en kraikrai en nomo dagat eni daga raidap det san bin godan, en deibin gibit det ofring gulum feloship ofring langa God, en deibin abum det sekrifais serramoni blanga im du.

Fes Semyul 7:6

Wal ola pipul bin majurrumap miselp langa det taun, en deibin abum serramoni weya deibin gajim sambala woda, en deibin spilim det woda jis laiga ofring blanga God, en dei nomo bin dagat eni daga brom ailibala raidap sangodan, en deibin ol tok, “Melabat bin dum nogudbala ting langa YAWEI.” Wal deya na langa det taun gulum Mispa, Semyul bin jidan lida blanga ola Isreil pipul,