Jeramaiya 20:12 - Kriol Baibul

¹² Bat YAWEI det boswan God, yu na oldei testimbat ola pipul raitwei. Yu sabi wanim insaid langa olabat hat en langa olabat main du. Wal yu larram mi luk wen yu bidim detlot enami blanga main, dumaji ai pudum main laif langa yu bingga.

Jeramaiya 20:12 Iomraidhean Croise

Ola Saam 11:5

Im luk ola gudwan pipul en ola nogudwan pipul seimwei. Im nomo laigim ola jigiwan pipul brabliwei.

Ola Saam 139:23

Luk insaid langa main hat, YAWEI, en faindat if mi nogud insaid langa main hat. Luk if mi nogud wen mi jinggabat enijing.

Ola Saam 17:3

Yu sabi main hat. Nomeda naitaim du yubin testim mi, yubin faindim mi nomo gilti. Aibin jinggabat nomo blanga dalim laiya.

Ola Saam 54:7

Yubin seibum mi brom ol main trabul, en aibin luk ol main enami olabat nomo bin win.

Ola Saam 58:10

Ola pipul hu jidan trubalawei garra jidan gudbinji wen dei luk ola nogudbala pipul git panish. Olabat garra luk detmatj blad buldan blanga detlot nogudbala pipul.

Ola Saam 59:10

Main God, yu oldei laigim mi, en yu garra go lida langa mi, en larram mi luk weya yu bidim main enami olabat hu oldei tok nogudbalawei blanga mi.

Ola Saam 62:8

Trastim God olataim, main kantrimen. Dalim im blanga ol yu trabul, dumaji im na det seifwan pleis blanga wi.

Ola Saam 7:9

God, yu oldei dum wanim rait. Yu sabi wanim melabat jinggabat en wanim melabat filim. Yu stapam detlot nogudbala pipul brom dumbat krulbala ting langa najalot pipul. Yu gibit ola gudbala ting langa detlot pipul hu jidan raitwei.

Ola Saam 86:4

Main bos, meigim mi jidan gudbinji dumaji mi blanga yu wekinmen. Mi oldei jingat langa yu.

Aisaiya 37:14

Wal afta King Hesakaiya bin ridimbat det leda brom det king brom Asiriya, King Hesakaiya bin deigim det leda insaid langa det Serramoni Pleis en imbin spredimat, wulijim YAWEI garra luk.

Aisaiya 38:14

Aibin kraikraibat jis laik det lilwan bard, en aibin jinginat sedwei jis laik dab. Blanga main dubala ai brabli redwan brom lukinatbat blanga yu YAWEI. Mi ardimbat nomo lilbit. Yu kaman en album mi.

Jeramaiya 11:20

Wal aibin prei na, “YAWEI det brabli haibala boswan God, yu na oldei tridimbat ola pipul gudwei, en yu sabi wanim olabat oldei jinggabat en wotkain filing dei oldei abum. Ai garra libum ebrijing langa yu bingga, wulijim ai garra luk yu garra panishim dislot pipul.” Lagijat na aibin prei.

Jeramaiya 12:8

Blanga main ronwan pipul bin tenawei brom mi en bin meigim miselp jigiwan, jis laik ol detlot laiyan jigiwan deya langa det bush kantri. Blanga tharran na mi heidimbat olabat du.

Jeramaiya 17:10

Bat oni mi na YAWEI sabi. Ai gin luk insaid langa ebribodi, nomeda hu im. Ai luk ebribodi seimwei en gibit ebribodi feyago blanga ebrijing dei dum.” Lagijat na YAWEI bin tok.

Jeramaiya 17:18

Yu meigim ol detlot hu oldei ardimbat mi jidan sheimwan, bat yu sori langa mi en album mi YAWEI. Yu meigim olabat jidan bradinwan, bat yu nomo bradinim mi. Yu jandim detlot nogudbala ting langa olabat, en yu binijimap olabat brabliwei.” Wal lagijat na aibin tok.

Fes Pida 2:23

Yumob sabi? Wen deibin tok olkain nogudbala ting langa Jisas Krais, im nomo bin ensimbek olabat. En wen deibin kilim im, im nomo bin tok enijing langa olabat, dumaji imbin sabi God garra jadjim ebribodi raitwei blanga ebrijing weya dei dumbat, en imbin trastim God blanga hendulum ebrijing blanga im.

Fes Pida 4:19

Yumob sabi? Sambala Kristjan pipul abum trabul, dumaji God wandim olabat blanga abum det trabul. En nomeda dei abum det trabul, bat stil dei garra kipgon dumbat gudbala ting en trastimbat God blanga lukaftumbat olabat, dumaji im na bin meigim olabat, en im oldei dum wanim im tok.

Rebaleishan 18:20

Wal ol detlot pipul langa hebin garra jingat brabli gudbinjiwei na. Ola Kristjan pipul, ola speshalwan mishanri en ola speshalwan mesinja blanga God, ol detlot na garra brabli gudbinji, dumaji God bin panishim det nogudbala taun Bebalon na. Imbin panishim det Bebalon hubin oldei ardimbat olabat.

Rebaleishan 2:23

Bat ai garra kilim ded ol detlot pipul hu bulurrum det wei blanga det wuman. En afta ola tjetjmob garra sabi nobodi sabi wotkain enibodi insaid. Oni mi na ai sabi. Mi oldei lukinat insaid langa ebribodi hat en main, en ai sabi wanim ebribodi jinggabat blanga dumbat, en ai sabi wanim ebribodi wandi dumbat. En ai garra peiyimbek ebribodi blanga ola enijing weya dei dumbat.

Rebaleishan 6:10

Wal detlot pipul hubin dai blanga det gudnyus bin ol jingat adbala na, “God, yu Brabli Haibala Bos. Yu brabli gudbala, en yu trubalawan du. Longtaim melabat bin weidabat yu blanga bringimap detlot pipul brom ola kantri hubin binijimap melabat. Wal wotaim yu garra jadjim olabat en panishim olabat blanga dijan weya deibin kilim melabat ded?”

Fes Semyul 1:15

Wal det gel bin tok, “Nomo, bos. Mi nomo drangginwan. Mi nomo bin dringgimbat enijing. Mi brabli nogudbinji dijan, en aibin toktok langa YAWEI blanga ola trabul weya mi garram.