Jeramaiya 18:22 - Kriol Baibul

²² Yu garra jandim bigismob men blanga pulumatbat olabat haus nomo garram eni woning. Yu meigim olabat jingat bradinbalawei brabli adbala. Olabat bin grajim hol wulijim ai garra buldan insaid langa det hol, dumaji olabat wandim trepam mi blanga gajim mi.

Jeramaiya 18:22 Iomraidhean Croise

Ola Saam 119:85

Detlot praudbala pipul hu nomo teiknodis langa yu lowa bin grajim dipwan hol blanga trepam mi.

Ola Saam 140:5

Detlot praudbala pipul bin meigim trep blanga mi. Deibin pudumdan ola trep olawei langa det roud blanga gajim mi.

Ola Saam 140:6

Mi tok langa YAWEI, “Yu main God.” YAWEI, irrim mi jingat langa yu blanga album mi.

Ola Saam 142:4

YAWEI yu lukaran. Nobodi iya hu wandi wokwok garram mi. Nobodi nomo fil sori langa mi, najing! En nomo eni seif pleis blanga go haidim miselp.

Ola Saam 38:12

Detlot pipul hu wandim kilim mi ded, olabat pudumbat ola trep blanga mi. En detlot pipul hu wandim kilim mi, olabat toktok blanga meigim ebrijing nogud blanga mi. Olabat kaan stap toktokbat blanga dum nogudbala ting langa mi.

Aisaiya 10:30

Yumob gin irrim ebribodi kraikraibat langa detlot taun gulum Gelim, Layisha, en det sedwan taun gulum Einathoth.

Jeramaiya 18:20

Yu reken nogudwan ting garra peiyimbek blanga gudbala ting? Bat olabat bin grajim hol blanga trepam mi. Yu sabi blanga tharran na hau aibin kaman langa yu, en dalim yu blanga olabat wulijim yu kaan gitwail langa olabat.

Jeramaiya 20:10

Ai oldei irrimbat ebribodi toktokbat kwaitbalawei, ‘Pipul ebriweya bradin nomo lilbit. Wal wi garra dalim detlot haibala bosmob blanga im.’ Nomeda olabat blanga main ronwan frenmob, bat stil olabat weidabat wotaim ai garra meigim misteik. Olabat oldei tok, ‘Maitbi wi gin trikim im wulijim wi gin grebum im en kilim im.’

Jeramaiya 20:16

Wal larram im jidan jis laik detlot taun weya YAWEI bin binijimap en im nomo bin fil sori blanga olabat. Larram im irrim olabat kraikraibat garram detmatj pein ebri ailibala, en det longwan wisul ebri dinataim.

Jeramaiya 4:31

Aibin irrim sambodi kraikraibat, jis laik det wuman wen im garra abum im beibi, en jis laik gel weya kraikraibat adbala wen im abumbat det pein blanga im feswan beibi. Dijan Jerusalem na hubin kraikraibat en lujim im win. En imbin pudumat im bingga en jinginatbat adbala, “Mi garra dai na, dumaji olabat kaminap blanga kilim mi na!”

Jeramaiya 5:26

“ ‘Brabli nogudbala pipul jidan garram yumob. Dei pudumbat trep blanga gajimbat men en meigim olabat wek adbala. Jis laik det men weya im go hanting en gajimbat ola bard en pudumbat olabat langa det lilwan haus, lagijat na deibin bilimap olabat haus brom stilimbat ola ebrijing. Olabat bin meigim miselp brabli ritjwan, en brabli strongbala.

Jeramaiya 6:26

Wal YAWEI bin tok langa im pipul olabat na, “Wal yumob werrimon sekbeigwan klos en yumob rolabat langa detlot eshis. En yumob kraikrai nomo lilbit jis laik wen yumob krai blanga yumob ronwan biginini, dumaji det amimob hu garra kaman blanga binijimap yumob, garra kaman kwikbala.

Sefanaiya 1:16

Langa det dei bambai yu garra irrim det bigwan fait weya ola solja blowimbat olabat wisul brabli adbalawei en dei garra jinginatbat nomo lilbit. Detlot enami solja garra breigimdan detlot strongwan taun en dei garra breigimdan ola haiwan wol en ola haiwan pleis weya holdimap detlot taun.”

Methyu 22:15

Wal detlot serramonimen gulum Ferasi bin gowei brom deya na, en deibin meigim olabat plen blanga trikim Jisas garram olabat kwestjan,