Jeramaiya 17:14 - Kriol Baibul

¹⁴ Wal aibin kipgon tok, “YAWEI, yu pudum yu bingga langa mi en meigim mi strongbala. Yu seibum mi brom main enami, en ai garra jidan seifwan. Dumaji oni langa yu na ai garra preisimbat.

Jeramaiya 17:14 Iomraidhean Croise

Ola Saam 106:47

YAWEI, melabat God, yu seibum melabat, en yu bringimbek melabat brom ola najalot kantri, wulijim melabat garra gibit theingks en preisim yu holiwan neim.

Ola Saam 109:1

God, mi preisim yu. Nomo jidan kwaitbala!

Ola Saam 119:94

Mi blanga yu YAWEI. Yu seibum mi, dumaji mi oldei teiknodis langa ol yu lowa.

Ola Saam 12:4

Dei oldei tok lagijat, “Wi gin gedim enijing wi wandim, en wi gin tok blanga enijing wi wandim. Wi nomo garram bos.”

Ola Saam 148:14

Imbin meigim im pipul olabat jidan strongbala blanga preisim im. Olabat na detlot Isreil pipul hu im laigim brabliwei. Preisim YAWEI det trubala God!

Ola Saam 54:1

God, seibum mi garram yu pawa, en garram yu pawa shoum pipul mi nomo rong.

Ola Saam 6:2

Yu jidan kain langa mi, YAWEI, dumaji mi wikwan. Meigim mi gudwan igin, YAWEI, dumaji main bodi ardimbat mi.

Ola Saam 6:3

Mi brabli nogudbinji en mi ardimbat detmatj. YAWEI, haulong yu garra libum mi lagijat?

Ola Saam 6:4

Kambek langa mi, YAWEI, en seibum mi. Seibum mi dumaji yu laigim mi en yu oldei jidan kainbala. Nomo larram mi dai.

Ola Saam 60:5

Ensim melabat preya en seibum melabat garram yu pawa, wulijim ola pipul hu yu laigim gin jidan seifwan.

Aisaiya 6:10

En YAWEI bin tok langa mi, ‘Yu meigim dislot pipul gibit mi bekboun. Jadimap olabat irriwol en olabat dubala ai en meigim olabat nomo sabi enijing wulijim olabat kaan kambek langa mi blanga meigim olabat gudbala.’ Lagijat na YAWEI bin tok.

Jeramaiya 15:20

Ai garra meigim yu jidan wulijim det brabli strongbala wol weya deibin meigim brom kopawan en weya jandap brabli haibala. Olabat reken olabat garra fait langa yu, bat olabat kaan bidim yu. Ai garra go garram yu, en ai garra maindim yu en yu garra jidan seifwan na.

Jeramaiya 3:23

Wen melabat bin weshipbat olkain drimin ontop langa detlot hil, dei nomo bin album melabat, najing. YAWEI yu na oldei album langa melabat, en yu na det God blanga melabat.

Jeramaiya 30:17

Ai garra meigim yumob jidan brabli gudwan na, en ai garra meigim yumob sowa gudwan igin, nomeda yumob enamimob oldei toktokbat, ‘Saiyan im nomo gudwan. Nobodi nomo wori blanga im.’ Bat mi na YAWEI bin tok dijan.”

Jeramaiya 31:18

“Aibin irrim detlot pipul brom Isreil tok soribalawei, ‘YAWEI, melabat jis laik detlot wailwan enimul, bat yubin shoumbat melabat blanga bulurrum yu brabliwei. Yu bringimbek melabat. Melabat redi blanga kambek langa yu, dumaji yu na blanga melabat God.

Jeramaiya 33:6

Bat bambai ai garra meigim dijan taun en ola pipul jidan gudwan igin. Ai garra shoum olabat hau blanga jidan gudwei en seifwan.

Nambas 12:13

Wal Mosis bin lafta krai langa YAWEI, “God, meigim Miriyam gudwan igin.”

Methyu 14:30

Bambai na wen Pida bin wokwok ontop langa woda, imbin stat jinggabat det strongbala win, en imbin bradin na, en imbin stat godan insaid langa woda, en imbin jingat langa Jisas, “Bos! Yu album mi!”

Methyu 8:25

en detlot wekinmen bin go en weikimap Jisas, “Bos! Yu seibum melabat! Wi garra dai na!”

Luk Bin Dalim Ola Stori Blanga Jisas Langa Wan Jintail Men 4:18

Imbin tok, “Det spirit blanga God im jidan garram mi, dumaji imbin pikimat mi blanga dalimbat det gudnyus langa ola powan pipul. Imbin jandim mi blanga dalim ola prisana God garra larramgo olabat fri, en imbin jandim mi blanga dalim ola blainwan pipul God garra meigim olabat luk gudwei, en imbin jandim mi blanga dalim ol detlot pipul hu oldei abumbat trabul God garra meigim olabat jidan gudbalawei.

Dyudaranami 10:21

Yumob preisim im. Im blanga wi God en yumob bin luk garram yumob ronwan ai ola brabli klebabala en gudbala ting weya imbin dum blanga yumob.

Dyudaranami 32:39

“ ‘Nomo eni drimin jidan laibala. Oni mi na det trubalawan God. Mi na gibit laif, en mi na deigimwei laif. Mi na meigim yumob ardimbat, en mi na meigim yumob gudbala, en nobodi gin tjeinjim wanim ai dum.