Ifishans 1:3 - Kriol Baibul

³ Wal God im det Dedi blanga Jisas Krais det Bos blanga wi, en wi garra preisim im en gibit im theingks, dumaji wen imbin joinimap wi langa Jisas Krais, imbin gibit wi ola gudbala ting weya imbin meigim deya redi blanga wi.

Ifishans 1:3 Iomraidhean Croise

Jenasis 14:20

Det brabli haibala God na bin album yu blanga bidim detlot enami blanga yu. En ola pipul garra gudbinji en sei theingkyu langa im.” Wal Eibram bin gibit Melkisadek haf enijing weya imbin pulumat brom detlot enami wen imbin bidim olabat. Imbin gibit im wanbala ting blanga ebri tenbala ting imbin deigim brom detlot enami.

Jenasis 22:18

en brom yu biginini olabat ai garra meigim ola najalot traib ebriweya brabli gudbinji. Ai garra dum lagijat dumaji yubin lisin langa mi en yubin dum wanim aibin dalim yu blanga dum.’ Lagijat na God bin tok.”

Fes Kranakuls 29:20

Wal King Deibid bin tok langa ola pipul, “Ol yumob na garra preisimbat YAWEI.” En ola pipul bin preisimbat YAWEI, det trubala God blanga olabat grengrenfathamob, en deibin weship im en deibin pudumdan hed langa im en langa det king du.

Fes Kranakuls 4:10

Jeibes bin prei langa det God blanga ola Isreil pipul. Imbin tok, “Dedi langa top, yu album mi, en gibit mi brabli gudwan kantri. Yu jidan garram mi, en seibum mi brom ola nogudbala ting weya oldei ardimbat main bodi.” Lagijat na Jeibes bin tok. En God bin kain langa im en imbin gibit im ebrijing weya imbin askim im.

Sekan Kranakuls 31:8

Wen King Hesakaiya en im wekinmen bin luk haumatj ting deibin pudumbat, olabat bin stat gibitbat preis en theingks langa YAWEI det trubala God en langa ola Isreil pipul.

Niyamaiya 9:5

Afta na dislot serramonimen bin tok langa ola pipul, Jeshuwa, Kedmiyel, Bani, Hashabaneiya, Sherebaiya, Hodaiya, Shebanaiya en Pethahiya. Deibin tok, “Jandap en preisim YAWEI det trubala God blanga wi. Preisim im olagijawan! Ola pipul garra preisim wi speshalwan God. Im brabli haibala. Wi kaan sabi hau blanga preisim im brabliwei.”

Ola Saam 134:3

Ai askim YAWEI hu jidan deya langa Saiyan, en hubin meigim hebin en dijan wel, blanga jidan gudbalawei blanga yumob.

Ola Saam 72:17

Larram pipul jinggabat det neim blanga det king olagijawan, en nomo fogedabat im. Larram pipul ebriweya sabi blanga im raidap det taim weya det san kaan gibit lait enimo. Larram pipul langa ebri kantri askim God blanga jidan gudbalawei langa olabat, seimwei laik imbin gudbala langa det king.

Ola Saam 72:19

Preisim im haibala neim olagijawan. Larram ola pipul ebriweya sabi det haibalawei blanga im. Yuwai! Trubala!

Aisaiya 61:9

Detlot bigininimob blanga yumob garra jidan brabli haibala langa najalot pipul langa najalot kantri. Ebribodi garra luk langa olabat, en dei garra sabi mi na YAWEI bin oldei album dislot pipul.” Lagijat na YAWEI bin tok.

Denyul 4:34

Wal King Nebakanesa bin tok langa olabat, “Wen det 7 yiya bin binij, aibin lukap langa top, en aibin jinggabat gudwei igin. Aibin preisim det Brabli Haibala God. Aibin weship im en lidimap im neim en meigim im mowa haibala, det wanbala God hu jidan olagijawan. Aibin tok, “God na jidan bos olataim. Im na jidan king olagijawan.

Luk Bin Dalim Ola Stori Blanga Jisas Langa Wan Jintail Men 2:28

en deya na wen Josef en Meri bin deigim det lilboi blanga det serramoni, det olmen bin gajim det lilboi, en imbin holdim im garram im bingga, en imbin gibit theingks langa God.

Jon Bin Dalim Det Gudnyus Blanga Jisas Det San Blanga God 14:20

En wen det rait taim garra kaman, yumob garra sabi trubala mi jidan garram main Dedi en yumob jidan garram mi en mi jidan garram yumob.

Jon Bin Dalim Det Gudnyus Blanga Jisas Det San Blanga God 17:21

En ai prei blanga olabat holot wulijim dei garra ol jidan wanbala. Ai wandim olabat garra jidan wanbala garram yunmi jis laik yu jidan garram mi en mi jidan garram yu. En ai wandim olabat garra jidan wanbala wulijim ola pipul langa dijan wel garra bilib yubin jandim mi.

Jon Bin Dalim Det Gudnyus Blanga Jisas Det San Blanga God 20:17

Wal Jisas bin dalim Meri, “Nomo holdim mi, dumaji ai nomo bin gobek langa main Dedi langa top. Bat yu gobek en dalim main braja en sista olabat ai garra gobek langa main Dedi. En yu dalim olabat main Dedi im blanga yumob Dedi du, en main God im blanga yumob God du.”

Romans 12:5

En im seimwei du weya wibin joinap garram Jisas Krais. Nomeda wi detmatj, bat stil wi ol jidan wanbala garram im, en wi ol jidan jis laiga difrinwan pat blanga det bodi blanga im.

Romans 15:6

En mi askim im blanga meigim yumob jidan garram wanbala main jis laik Jisas Krais bin jidan, dumaji yumob garra ol preisimbat God mijamet garram wanbala main en wanbala hat. Lagijat na yumob garra preisimbat God det Dedi blanga Jisas Krais det Bos blanga wi.

Fes Karinthiyans 1:30

en Jisas Krais na det wei blanga wi blanga sabi God. Im na meigim wi jidan raitwei langa God, en im na meigim wi jidan ronwan pipul blanga God, en im na larramgo wi fri brom ola nogudbala ting weya wi oldei dumbat.

Fes Karinthiyans 12:12

Wal yumob jinggabat na. Det bodi blanga wi garram loda difrinwan pat. En nomeda im garram loda difrinwan pat, bat stil im oni wanbala bodi.

Sekan Karinthiyans 1:3

Wal wi garra gibit theingks langa God det Dedi blanga Jisas Krais det Bos blanga wi. Im na det brabli kainbala Dedi, en im na det God hu oldei album wi. Yumob sabi? Nobodi kaan album wi. Oni God na.

Sekan Karinthiyans 11:31

Yumob sabi? Wen Eretas bin jidan king, det gabman bos blanga det taun gulum Dameskas bin jandim blijiman blanga blokim ola geit blanga det taun blanga gajulum mi. Bat sambodi bin pudumdan mi garram baskit snikinwei thru langa windo biyain langa det taun, en aibin gidawei. Trubala imbin hepin langa mi lagijat. En God det dedi blanga Jisas Krais det Bos blanga wi sabi mi nomo dalimbat yumob laiya. Oni im na wi garra preisimbat olagijawan.

Sekan Karinthiyans 5:17

Wi garra jinggabat pipul gudbalawei, dumaji wen enibodi joinap garram Jisas Krais, im jidan nyuwan, en det olbalawei blanga im gowei, en det nyubalawei kaman.

Sekan Karinthiyans 5:21

Yumob sabi? Jisas Krais nomo bin dum eni nogudbala ting. Bat God bin wandi album wi, en imbin meigim im jidan jis laiga sekrifais ofring blanga ola nogudbala ting weya wibin dumbat, en blanga tharran na thru Jisas Krais wi gin jidan raitwei langa God.

Galeishans 3:9

Yu si? Eibrahem bin bilib det wed weya God bin gibit im, en God bin gudbinji langa im. En lagijat du God garra gudbinji langa ol detlot pipul hu bilib brabliwei langa im.

Ifishans 1:10

Wi sabi wen det rait taim garra kaman, God garra joinimap ebrijing weya imbin meigim langa dijan wel en langa hebin, en Jisas Krais na garra jidan Boswan blanga olabat.

Ifishans 1:17

Wal God im det brabli haibalawan Dedi weya Jisas Krais det Bos blanga wi bin oldei bulurrum, en mi oldei askimbat im na blanga gibit yumob det Holi Spirit blanga meigim yumob sabi ebrijing en blanga meigim yumob sabi im brabliwei.

Ifishans 1:20

Det pawa blanga God weya wek langa wi, im det seimwan pawa weya God bin yusum blanga meigim Jisas Krais gidap laibala brom dedbala, en im det seimwan pawa gin weya imbin yusum wen imbin meigim im jidan Bos deya langa hebin langa im raidensaid.

Ifishans 2:6

Wal wen God bin joinimap wi garram Jisas Krais, imbin lidimap wi blanga jidan garram im, en imbin gibit wi det seimwan pawa weya im garram blanga bidim ola nogudwan ting langa dijan wel,

Ifishans 3:10

Imbin dum lagijat, dumaji imbin wandi yusum det tjetj blanga im blanga shoum ola einjul en olkain spirit im sabi olkain ting.

Ifishans 6:12

Yumob garra yusum ol detlot ting blanga God jis laiga solja weya im yusum ola ting blanga fait. Bat wi nomo fait langa pipul. Wi oldei fait langa ola dibuldibul en langa ola nogudwan spirit en langa ol detkain ting weya kamat brom dakbala en meigim miselp bos.

Falipiyans 2:11

en dei garra tok, “Jisas Krais im brabli Bos.” En dei garra preisim God det Dedi blanga wi.

Hibrus 8:5

Bat det pleis weya detlot haibala serramonimen oldei dumbat olabat wek, im nomo det riliwan seikridwan pleis. Im jis laiga kopi blanga det riliwan seikridwan pleis deya langa hebin. Im jis laiga pitja blanga det riliwan pleis. Wi sabi tharran, dumaji God bin gibit woning langa Mosis wen imbin dalim im blanga bildimap det Seikridwan Tent. Imbin tok, “Yu garra meiksho yu bulurrum det plen weya aibin gibit yu ontop langa det hil.”

Hibrus 9:23

Wal ol detlot ting weya deibin abum langa det Serramoni Pleis iya langa graun bin jis laiga kopi blanga ola riliwan ting langa hebin, en deibin oldei lafta meigim ol detlot ting klin garram blad.

Fes Pida 1:3

Wal wi garra gibit theingks langa God det dedi blanga Jisas Krais det Bos blanga wi, dumaji imbin brabli kain langa wi, en imbin gibit wi nyubala laif wen imbin meigim Jisas Krais gidap laibala brom dedbala, en blanga tharran na wi sabi trubala wi garra gedim ol detlot ting weya God garram deya langa hebin blanga im pipul olabat, en wi sabi detlot ting kaan go nogudwan en binij. Dei garra jidan olagijawan. Praise