San Mateo 2:2 - Ti Baro a Naimbag a Damag Biblia

² “Sadino ti ayan ti ubing a nayanak nga ari dagiti Judio?” sinaludsodda. “Nakitami ti bituenna a nagparang idiay daya ket immaykami agdaydayaw kenkuana.”

Ti Biblia (1973)

² Sadino ti yan ti nayanac nga Ari dagiti Judio? Ta nakitami ti bituenna idiay daya, ket immaycam nga agdayaw kencuana.

San Mateo 2:2 Iomraidhean Croise

Dagiti Salmo 2:6

Kunana, “Insaadko ti arik idiay Sion a nasantoan a turodko.”

Dagiti Salmo 45:11

Gapu iti pintasmo tarigagayannaka ti ari; isun ti apom, tungpalem ngarud ti kayatna.

Isaias 60:3

Umasidegto dagiti pagilian iti silawmo, umayto met dagiti ari iti isisingising ti baro nga aldawmo!

Jeremias 23:5

Kuna ti Apo, “Umayen ti tiempo a panangpilik iti pagbalinek nga ari nga agtaud iti kaputotan ni David. Agturayto a sisisirib daytoy nga ari ket aramidennanto ti naimbag ken nalinteg iti entero a daga.

Jeremias 30:9

Agserbidanto ketdi kaniak, siak, ni Yahweh a Diosda, ken iti ari nga isaadkonto a nagtaud iti maysa a kaputotan ni David.

Zacarias 9:9

Agrag-okayo, tattao ti Sion, agrag-okayo! Agdir-ikay iti ragsak, tattao ti Jerusalem! Kitaenyo, umayen kadakayo ti ariyo! Umay a sibaballigi ngem napakumbaba; umay a nakasakay iti asno, iti urbon ti asno.

Numero 24:17

Makitak ti Israel iti masakbayan Addanto ari a tumaud iti dayta a pagilian, Kaslanto naraniag a bituen. Manipud iti Israel, tumpuarto a layap Burakennanto ti ulo ti Moab, ket parmekennanto dagiti amin a tattao ti Set.

San Mateo 2:3

Idi madamag daytoy ni Ari Herodes, napalalo ti pannakariribukna, kasta met ti tunggal maysa a taga-Jerusalem.

San Mateo 21:5

“Ipakaammoyo iti siudad ti Sion: Umayen ti arim, Napakumbaba ken sisasakay iti asno; Wen, iti urbon ti asno.”

San Mateo 27:11

Nagtakder ni Jesus iti sangoanan ti gobernador a nangusisa kenkuana. “Sika kadi ti Ari dagiti Judio?” sinaludsodna. “Nasaomon,” insungbat ni Jesus.

San Lucas 19:38

“Bendisionan koma ti Dios ti Ari nga umay iti nagan ti Apo,” ipukpukkawda. “Kappia sadi langit ken gloria iti Dios!”

San Lucas 2:11

Ita nga aldaw, ditoy ili ni David, naipasngay ti mangisalakan kadakayo—ni Cristo nga Apo!

San Lucas 23:3

“Sika kadi ti Ari dagiti Judio?” sinaludsod ni Pilato. “Nasaomon,” insungbat ni Jesus.

San Lucas 23:38

Adda kastoy a naisurat iti ngatoen ni Jesus: “Daytoy ti Ari dagiti Judio.”

San Juan 1:49

“Maestro,” insungbat ni Natanael. “Sika ti Anak ti Dios! Sika ti Ari ti Israel!”

San Juan 12:13

Iti kasta, nagalada kadagiti sangsanga ti palma ket napanda simmabat kenkuana. “Madaydayaw ti Dios!” impukpukkawda. “Bendisionan koma ti Dios ti umay iti nagan ti Apo! Bendisionan koma ti Dios ti Ari ti Israel!”

San Juan 18:37

Isut' gapuna a sinaludsod ni Pilato, “No kasta, maysaka nga ari?” “Nasaomon,” insungbat ni Jesus. “Nayanakak ditoy lubong tapno paneknekak ti pudno. Dumngeg kaniak ti siasinoman nga adda iti pudno.”

San Juan 19:19

Nangisurat ni Pilato iti pakaammo ket pinaikabilna iti krus. Kastoy ti naisurat: “Jesus a taga-Nazaret, ti Ari dagiti Judio.”

San Juan 20:28

“Apok ken Diosko!” kinuna ni Tomas.

San Juan 5:23

tapno padayawan dagiti amin a tattao ti Anak a kas iti panangpadayawda iti Ama. Ti saan a mangpadayaw iti Anak, saanna met a padayawan ti Ama a nangibaon kenkuana.

San Juan 9:38

“Mamatiak, Apo!” kinuna ti tao, ket nagparintumeng a nagdaydayaw ken ni Jesus.

Hebreo 1:6

Ngem kuna ti Dios idi dandanina ibaon ti inauna nga Anakna ditoy lubong, “Masapul nga agdaydayaw kenkuana dagiti amin nga angheles ti Dios.”

Paltiing 22:16

“Siak ni Jesus a nangibaon iti anghelko tapno saksianna dagitoy kadakayo nga adda kadagiti iglesia. Nagtaudak iti ramut ken kaputotan ni David. Siak ti naraniag a bituen ti agsapa.”