Jeremias 2:5 - Ti Baro a Naimbag a Damag Biblia

⁵ Kuna ti Apo: “Ania ti pammabasol dagiti kapuonanyo kaniak? Apay a tinallikudandak? Nagdaydayawda kadagiti awan serbina a didiosen, ket nagbalinda met nga awan serbina.

Ti Biblia (1973)

⁵ Castoy ti cuna ni Jehova, Ania a kinadakes ti nasaracanda caniac dagiti ammayo a simmiasida caniac, ket sinurotda ti kinaubbaw, ket nagbalinda nga ubbaw?

Jeremias 2:5 Iomraidhean Croise

2 Ar-ari 17:15

Dida kinayat a tungpalen dagiti bilinna. Sinalungasingda ti katulaganna kadagidi kapuonanda ket dida inkankano dagiti ballaagna. Nagdaydayawda kadagiti awan serserbina a didiosen ket nagbalinda met nga awan serserbina. Tinuladda dagiti ugali dagiti kabangibang a nasion ket sinukirda ti bilin ni Yahweh a dida tultuladen ida.

Dagiti Salmo 115:8

Dagiti nagaramid ken amin nga agtalek kadakuada, umaspingda kadagiti didiosen a pinartuatda.

Isaias 29:13

Kinuna ti Apo, “Ibagbaga dagitoy a tattao nga agdaydayawda kaniak ngem barengbareng ti saoda ket adayo ti pusoda kaniak. Awan mamaay ti panagdaydayawda, ta alagaden ken linteg laeng ti tao ti inkabesada.

Isaias 44:9

Awan ti serserbi dagiti amin nga agar-aramid kadagiti imahen. Awan mamaay dagiti didiosen nga ipatpategda unay. Bulsek ken ignorante dagita nga agdaydayaw kadagitoy a didiosen. Maibabaindanto.

Isaias 46:12

“Denggendak, dakay a nasukir a tattao, dakay a mangipagarup nga adayo pay ti balligi.

Jeremias 10:8

Nengneng ken maag dagiti amin a mamasirib kadakuada. Ania ti masursuroda kadagiti kayo nga imahen?

Jeremias 12:2

Imulam ida ket agramutda; dumakkel ken agbungada. Nasayaat panagsaoda't maipapan kenka ngem ti pusoda adayo kenka.

Jeremias 14:22

Saan a makaited iti tudo dagiti didiosen dagiti nasion; awan kadakuada ti makaited iti arbis. Mangnamnamakami kenka, O Apo a Diosmi, agsipud ta sika laeng ti makaaramid kadagitoy.

Jeremias 2:31

Dakay a tattao ti Israel, denggenyo a naimbag ti saok. Nagbalinak aya a let-ang kadakayo, kas iti nasipnget ken napeggad a daga? Saan! Apay ngarud a kunayo nga aramidenyonto ti kaykayatyo, ket pulos a dikayto agsubli kaniak?

Jeremias 2:4

Denggenyo ti mensahe ti Apo, dakayo a kaputotan ni Jacob, dakayo a tribu ti Israel.

Jeremias 8:19

Denggenyo! Iti entero a daga mangngegko nga isangsangit dagiti tattaok, “Awanen aya ti Apo idiay Sion? Awanen aya sadiay ti ari ti Sion?” Sumungbat ni Yahweh nga arida, “Apay a pinagpungtotdak babaen iti panagdaydayawyo kadagiti imahen? Apay a nagtamedkayo kadagiti awan serserbina a didiosenyo?”

Ezekiel 11:15

Kinunana, “Anak ti tao, sika ken dagiti padam nga Israelita a napagtalaw a kas balud ti sarsaritaen dagiti agnaed idiay Jerusalem. Kunada, ‘Adayo unay dagiti napagtalaw ket dida mabalin ti agdaydayaw iti Apo. Dakami ti nangipatawidanna iti daytoy a daga.’

Ezekiel 14:5

Dagitoy a didiosen ti nakaigapuan ti panangtallikud kaniak dagiti Israelita ngem sapay koma ta magun-odko manen ti kinapudnoda babaen iti sungbatko.’

Jonas 2:8

Tinallikudandaka dagiti agdaydayaw kadagiti awan serserbina a didiosen.

San Mateo 15:8

‘Kuna ti Dios, dagitoy a tattao kunkunada a dayawendak, Ngem adayo ti pusoda kaniak.

Dagiti Aramid 14:15

“Kakabsat,” impukkawda, “apay nga aramidenyo daytoy? Tattaokami laeng a kas kadakayo. Addakami ditoy a mangipakaammo iti Naimbag a Damag tapno panawanyo dagitoy a kinaubbaw ket agturongkayo iti sibibiag a Dios a namarsua iti langit, daga, taaw ken amin nga adda kadakuada.

Taga-Roma 1:21

Ammoda ti Dios, ngem dida agdayaw wenno agyaman kenkuana kas maiparbeng. Nagbalin ketdi nga ubbaw ti panagpampanunotda ket sipnget ti linaon dagiti isipda.

Deuteronomio 32:21

Pinagpungtotdak gapu kadagiti imahenda; pinagimondak kadagiti makunkuna a didiosenda, didiosenda a saan a pudno a Dios. Iti kasta, aramatekto ti makunkuna a nasion a mangpapungtot kadakuada. Aramatekto ti maysa a nasion dagiti maag, a mamagimon kadakuada.

1 Samuel 12:21

Idianyo ti agdaydayaw kadagiti didiosen; didakayo matulongan wenno maisalakan, agsipud ta awan serserbida.