Genesis 26:12 - Ti Baro a Naimbag a Damag Biblia

¹² Nagtalon ni Isaac iti dayta a daga. Iti dayta a tawen, nakaapit iti maminggasut a kaadu ti immulana, gapu ta binendisionan ni Yahweh.

Ti Biblia (1973)

¹² Ket ni Isaac nagtalon idiay a daga, ket nacagunguna iti daydi a tawen ti naminsangagasut: ket binendicionan ni Jehova.

Genesis 26:12 Iomraidhean Croise

Genesis 24:1

Lakay unayen ni Abraham. Binendisionan ni Yahweh ti amin nga inaramidna.

Genesis 24:35

“Nawadwad ti bendision nga inted ti Apo iti apok. Bimmaknang ta pinaraburanna iti adu a karnero, kalding ken baka, pirak ken balitok, adipen a lallaki ken babbai, kamelio ken asno.

Genesis 25:11

Kalpasan ti ipapatay ni Abraham, binendisionan ti Dios ni Isaac nga anakna a nagnaed iti asideg ti Beer-lahai-roi.

Genesis 26:29

a dinakamto dangran a kas iti dimi panangdangran kenka. Naimbagkami idi kenka ket saandaka nga inan-ano idi pumanawka. Ita, nalawag a binendisionannaka ti Apo.”

Genesis 26:3

Agnaedka ditoy ket addaakto kenka. Bendisionankanto. Itedkonto amin daytoy a daga kenka ken kadagiti kaputotam, kas inkarik ken ni tatangmo nga Abraham.

Genesis 30:30

Bassit pay la ti sanikuam sakbay a simmangpetak ngem nakarangrang-aykan ta binendisionannaka ti Apo gapu kaniak. Ita, tiempona metten a tamingek ti pagimbagak.”

Ti Libro ni Job 42:12

Kadagiti maudi a tawen ti panagbiag ni Job, ad-adu ti bendision nga inted ni Yahweh kenkuana ngem idi damo. Naaddaan iti 14,000 a karnero, 6,000 a kamelio, 2,000 a baka ken 1,000 nga asno.

Dagiti Salmo 67:6

Pinataud ti daga ti apit nga adu ta binendisionannatayo ti Dios a Diostayo.

Dagiti Salmo 72:16

Umadu koma ti apit iti daga, makumotan koma dagiti turod iti mula kas kabunga dagiti adda idiay Libano. Umadu koma dagiti tattao kadagiti siudad, a kas iti kaadu ti ruruot iti tay-ak.

Dagiti Proverbio 10:22

Ti bendision ti Apo pabaknangenna ti maysa a tao. Mabalin a saan a manayonan ti kinabaknangna iti kinagagetna unay.

Eclesiastes 11:6

Agmulaka iti agsapa ken uray pay iti sumipnget. Dimo ammo no agtuboda amin wenno nasayaatda nga agpapada.

Zacarias 8:12

Awanto ti kabutengda no agmulada. Agbunganto dagiti ubasda. Adunto ti maapit iti daga. Nawadwadto ti tudo. Ipaaykonto amin dagitoy a bendision kadagiti tattao a nakalasat iti nasionko.

San Mateo 13:23

Ti bukel a naimula iti nadam-eg a daga iladawanna dagiti dumngeg ken makaawat iti sao ket agbungada; adda makaibunga iti sangagasut, adda makainnem a pulo ket adda pay makatallopulo.”

San Mateo 13:8

Ngem nagdisso ti dadduma a bukel iti nadam-eg a daga, ket nagdawada: adda nagdawa iti sangagasut, adda met innem a pulo ken adda pay tallopulo.”

San Marcos 4:8

Ngem adda dagiti bukel a nagdisso iti nadam-eg a daga, ket nagtubo, dimmakkel ken nagdawada. Adda nagdawa iti 30, adda met 60 ken adda pay 100.”

1 Taga-Corinto 3:6

Siak ti nangitukit iti bukel. Ni Apolos ti nagsibug. Ngem ti Dios ti nangpadakkel iti mula.