Exodo 33:16 - Ti Baro a Naimbag a Damag Biblia

¹⁶ Kasano nga adda makaammo a maragsakanka kaniak ken kadagiti tattao no dinakami met kuyogen? Ngem no kuyogennakami, maipakita a naisalsaluminakami kadagiti amin a tattao ditoy daga.”

Ti Biblia (1973)

¹⁶ Ta ania ita ti pacaammoan a natumpungacon ti parabur iti imatangmo, siac ken ti ilim? saan aya nga iti pannacaicuyogmo cadacami, tapno, siac ken ti ilim maisalsaluminacami, cadagiti amin a tattao nga addada iti rabaw ti daga?

Exodo 33:16 Iomraidhean Croise

2 Samuel 7:23

Awanen ti sabali a nasion ditoy rabaw ti daga a kas iti Israel nga inispalmo iti pannakaadipen tapno pagbalinem ida a tattaom. Nagsaknap ti kinalatakmo iti entero a lubong gapu kadagiti naindaklan ken nakaskasdaaw a banag nga inaramidmo kadakuada. Pinagtalawmo dagiti sabali a nasion ken dagiti didiosenda idi sumangpet dagiti tattaom, isuda a winayawayaam idiay Egipto tapno agbalinda a kukuam.

1 Ar-ari 8:53

Pinilim ida kadagiti amin a tattao tapno agbalinda a tattaom kas impakaammom ken ni Moises nga adipenmo idi inruarmo dagiti kapuonanmi idiay Egipto.”

Dagiti Salmo 147:20

Saanna nga inaramid daytoy kadagiti sabali a pagilian, saanna nga ipakaammo kadakuada dagiti lintegna. Madaydayaw ti Apo!

Exodo 34:10

Kinuna ni Yahweh ken ni Moises, “Ita, makitulagak kadagiti Israelita. Agaramidakto kadagiti milagro a di pay napasamak ditoy lubong wenno iti uray ania a pagilian. Makitanto dagiti amin a tattao dagiti naindaklan a banag a kabaelak nga aramiden agsipud ta agaramidak kadagiti nakaskasdaaw a banag nga agpaay kadakayo.

Exodo 34:9

Kinunana, “Apo, no pudno met laeng a maragsakanka kaniak, dawatek a kuyogennakami. Nasukir dagitoy a tattao, ngem pakawanennakami koma kadagiti kinadakesmi ket awatennakami a kas tattaom.”

Exodo 8:22

Ngem ilisikto ti daga ti Gosen a pagnaedan dagiti tattaok, ket awanto ti ngilaw sadiay. Aramidek daytoy tapno maammoam a siak, ni Yahweh, ti mannakabalin iti daytoy a daga.

Levitico 20:24

Ngem inkarik a tagikuaenyo daytoy nabaknang ken nadam-eg a daga, ket siak ti mangted iti daytoy a daga kadakayo. Siak ni Yahweh a Diosyo, ket pinilikayo kadagiti sabali a pagilian.

Levitico 20:26

Agbiagkayo a nasantoan ket siak laeng ti pagpaayanyo, ta siak ni Yahweh ket nasantoanak. Pinilikayo kadagiti sabali a tattao tapno siak laeng ti pagpaayanyo.

Numero 14:14

ibagadanto kadagiti tattao nga agnaed iti daytoy a daga. Nadamagen dagitoy a tattao a sika nga Apo ket addaka kadakami. Ammoda nga agparangka a silalatak no agsardeng ti ulepmo iti ngatoenmi, ket ammoda nga idaldalannakami babaen iti monmon nga ulep iti aldaw ken monmon nga apuy iti rabii.

Numero 23:9

Manipud nangato a kabatoan, makitak ida, manipud katurturodan, maimatangak ida maysa a nasion nga agbiag nga agmaymaysa, naiduma a pagilian, naisalsalumina.

San Mateo 1:23

“Agsikogto ti birhen a balasang. Ipasngaynanto ti maysa a lalaki, ket mapanagananto iti Immanuel a kayatna a sawen, ‘Adda kadatayo ti Dios.’”

2 Taga-Corinto 6:17

Isut' gapuna a kuna ti Apo: “Panawanyo ida ket suminakayo kadakuada. Diyo sagiden dagiti makatulaw a banag, Ket awatenkayto.

Deuteronomio 4:34

Wenno adda kadin uray ania a dios a nakaitured a nangala kadagiti tattao iti sabali a pagilian tapno pagbalinenna ida a kukuana a kas iti inaramid kadakayo ti Apo a Diosyo idiay Egipto? Nakitayo ti panangaramatna iti naindaklan a pannakabalinna ket inyegna dagiti didigra ken gubat, dagiti milagro ken datdatlag ken dagiti nakabutbuteng a pasamak.

Deuteronomio 4:7

“Awan ti sabali a nasion, uray kasano ti kinatan-okna, ti addaan iti dios nga asideg kadakuada no masapulda ti tulongna a kas iti Apo a Diostayo. Ipangagnatayo no agpatulongtayo kenkuana.