Ȓexḏayem 17:13 - Ṯarifiṯ 2020

¹³ Israʼiliyen nni ḏi ṯendint n Salunik arrin-d ȓexbar Bulus itbeccar s wawaȓ n Arebbi ḏi ṯendint n Birya. Usin-d ɣar Birya bḏan teggen ixarwiḍen shajen xas ȓɣaci.

Ȓexḏayem 17:13 Iomraidhean Croise

Matta 23:13

Ya ȓefḍiḥeṯ nwem ay imseȓmaḏen n ccariƹa ḏ ȓḥizeb n ifarrisiyen, a lmunafiqin! Teqqnem ṯawwarṯ n ȓmulk ujenna x yiwḏan. Kenniw war tiḏfem, war tejjim wi ɣa yaḏfen.

Luqa 12:51

Ma tfekkarem belli usiɣ-d aḏ ggeɣ ȓehna ḏi ddunect-a? Lla! Aḏawem iniɣ usiɣ-d aḏ ggeɣ amenɣi.

Ȓexḏayem 14:2

Walakin israʼiliyen iy yugin aḏ amnen samaren yinni war iǧin ca zi Ayṯ-Israʼil x ayṯmaṯneɣ, ƹemmaren-asen azeǧif.

Ȓexḏayem 17:1

Ƹḏun x ṯendint n Umfipulis ḏ ṯendint n Upulunya, uwḍen ɣar ṯendint n Salunik mani ṯeǧa ḏinni ijjen n ṯemziḏa n Ayṯ-Israʼil.

Ȓexḏayem 17:10

Ssenni s ǧiȓeṯ nni ayṯmaṯneɣ ssekken Bulus ḏ Silas ɣar ṯendint umi qqaren Birya. Wami uwḍen, uḏfen ɣar ṯemziḏa n Ayṯ-Israʼil.

Ȓexḏayem 17:5

Walakin israʼiliyen nneɣni ḥesḏen-ṯen, ruḥen smunen-d zi ssuq ijjen n lmejmuƹ n ikruccaren iƹeffanen bac aḏ ggen ssdaƹ, snekkaren ȓfawḍa ḏi ṯendint. Hejmen x ṯeddarṯ n yijjen qqaren-as Yasin rezzun x Bulus ḏ Silas ḥima aṯen sellmen i ȓɣaci.

Ȓexḏayem 20:4

Isafer akiḏes Supatrus mmis n Piru zi ṯendint n Birya, ḏ Aristarxus ḏ Sakundus niṯni zi ṯendint n Salunik, ḏ Ɣayus zi ṯendint n Dirba, ḏ Timutawus ḏ Tuciq ḏ Trifumu niṯni zi lʼiqlim n Asya.

Ȓexḏayem 21:27

Wami ƹȓayen aḏ kemmȓen sebƹa nni n nhuraṯ n ȓuḍu, can israʼiliyen zi lʼiqlim n Asya ẓrin Bulus ḏi ṯemziḏa ṯameqqrant samaren xas marra ȓɣaci nni temzaḥamen xas.

Ȓexḏayem 6:12

Wami sƹeṣṣben iwḏan uȓa ḏ imeqqranen n Ayṯ-Israʼil ḏ imseȓmaḏen n ccariƹa, ṭṭfen Stifan uwin-ṯ ɣar Jmaƹeṯ n lḥukkam n Ayṯ-Israʼil.

2 Ayṯ-Kurinṯ 11:26

Nec mecḥaȓ n ṯwaȓaṯin tiȓiɣ tsafareɣ ḏi lxaṭar n iɣezran, ḏ lxaṭar n iceffaren, ḏ lxaṭar n ȓqum inu, ḏ lxaṭar n iyunaniyen, ḏ lxaṭar ḏi ṯendint, ḏ lxaṭar ḏi ȓexȓa, ḏ lxaṭar ḏi ȓebḥar, ḏ lxaṭar n yinni itarran ixef nsen ḏ ayṯma.