JOHAN 17:3 - Kemethajüh (N) (Re-editing) Bible (BSI)

³ Nu anuphan kahang ma jjügi no atsentsawa Nyiza, nu no kesun kechiwa Jisu Khrista tsü chüya thsüle kesalina.

JOHAN 17:3 Iomraidhean Croise

1 KHENICÜKI 28:9

Nu ma Solomon wi khi, “Itsa, no nba Nyizawa tsü chüya, nu nleben tsüdi nu samvuthi kesa kahang pi ma kekuli salo kesa hi no kizaben. Ma ithu kemeshen nu kenmvu tsüdi chüben. Keujüla no ma wi wa lethu, ma no ssiyaben; isala keujüla no ma wina bvü lethu, ma anuphanla no teshiaben.

2 KHENICÜKI 15:3

Matsü kesiela Israel na Anyiza tsentsawa tsü nsenla, keqhaikedithu na mathu nsansi, nu ayenwa nsenla hang wadha.

ZAKECI 9:10

Apvüwa, anyi thowa na no chüya lakhe, no nondiya metsi; no bha kegho nyi kesüla teshi nten.

KEMETSAJÜH 8:35

Anyi hi bha ketenwa na kahang muyaden, nu Apvüwa na ma miwi ma kenen ben yaden.

ISAYA 48:16

“Khili hi tetsaki gho hi mangwa khi khe kinayalo. Hi adechhü wina aghandu khidha, nu keshüthangla ijühwa tsü sacen thsüden.” (Kemisintsa Apvüwa na ma kekhang pi cü, nu hi kesunchi.)

ISAYA 53:11

Ketizenkesa kahang kesü sengwi, ma anonkeghe mu neng yaben; ma kaghacang wi ketizen nsale kesa chü yaben. Hi kenen saki keten, hi ma miwi hi kenen ben keten imaghawa, ma anyi kejon kemetenwa tsü pvü yaben, nu ma ghena hi mathu kesami teshi pi cüden.

ISAYA 61:1

Kemisintsawa Apvüwa na ma ghamu pi hi pong cüdha. Ma hi kessiya nu hi kesun pi ajühkemehaiwa sengho ketha-uthu cü thsü, leben gükeccüthu sapi mehai cü, nyu kekhu wi kebenthu kekhen nkemi, nu atssüzüthu lishü kecü jüh pi thangchilo kesalina.

JEREMIYA 10:10

Isala Apvüwa, no tsü atsentsa Nyiza le, no hangkeben Nyiza, nu anuphanla kadimiwa le. No nlebentsu shaghathu ayyi na kedheggü den, mizzatentithu na nleben ketsu wi kethanya nben.

HOSEYA 6:3

Ithu Apvüwa chüyale sa nalo! Tsantheghi shagha metsi nu pathsü tsangho pi ayyi tencü metsi keten ti ma ithu wi ghoaben .”

MARK 9:37

“Anyi thowa na inyan wina ghanyi hati kesathu ssiya khe hi la ssiyaden; nu thowa na hi ssiya khe hi ketan nyela hi kesun kechiwa la ssiyaden.”

Luk Zhükechi Jühtheü Kemehaiwa 9:48

nu mathu wi khi, “Thowa na inyan wina ghanyi ha ssiya khe hi la ssiyaden; nu thowa na hi ssiya khe hi kesun kechiwa la ssiyaden. Kepaghenanye nthu tsüdi jawi kizza ntsawa tsüna kedi ntsawa saben.

JOHAN 10:36

Ighena tsü, Abawa na hi satemetha nu hi kesun pi ayyi wi chi. Isathu, hi Anyiza Tsawa le kekhi ghena nthu na khati nu hi kethenjüh khiben le khiya mehai nu?

JOHAN 11:42

No keshüthangla hi kekhie kina ten kesa hi chüben, isala anyi he wi kebenthu ghena, no hi kesunchile kesa mathu ya nondiya thsüle kesalina hi ha khiben.”

JOHAN 14:26

Kekiqawa, Kemetha Ghamu, Abawa na inyan wina kesunchi ketenwa tsüna pala tsüdi pi nthu sansi cüben nu nthu yala hi pi nthu kekiza tsüdila meshen nengya thsüaben.”

JOHAN 17:18

No hi kesun pi ayyi wi kechi tsüti hi la mathu kesun pi ayyi wi chidha.

JOHAN 17:21

Mathu tsüdila kesütan saya thsülo khieben. O, iBa, no hi kesun chile kesa ayyi nyi ya nondiya thsüle kesalina no hi wi ben nu hi la no wi ben keten tsüti mathu la ishinyi wi benya thsülo.

JOHAN 17:23

Ayyi nyi yala no hi kesunchi nu hi tizenghali keten tsüti mathu la tizenghali tenle kesa chüya thsüle kesalina hi no wi ben, nu no hi wi ben, isanu mathu ya kesütan saya thsülo.

JOHAN 17:25

O, Ketsatan Bawa! Ayyi nyi na no nchü, isala hi tsü no chü, nu hathu ha no hi kesun chile kesa chüben.

JOHAN 17:8

No ketsijüh pi hi kecüthu hi tsü pi mathu cü nu mathu tsü yayadha; mathu na hi ntsakhiwa no wina ghole kesa chüyadha, nu no hi kesun chile kesa nondiyadha.

JOHAN 3:17

Kepaghenanye Anyiza na ma Tsawa kesun pi ayyi jühkekaghatenwa sa thsüle kesawa nye, isala ayyi Hangshawa sa thsü.

JOHAN 3:34

Anyiza na kesun kechiwa na Anyiza jüh khiden, kepaghenanye Anyiza na nkedela Aghamu pi ma cüden.

JOHAN 5:44

Nthu na khokho wi nyankethang tsü ya mvu, isala nthu na Anyiza wina kegho nyankethangwa tsü bha mvu nten, isathu nthu na khati nu hi nondiya mehai nu?

JOHAN 6:57

Hangkeben Abawa na hi kesunchi, nu hi la ma ghena hangben. Tsü makesü anyi thowa na isa dsa ten khe ma la ighena hang yaben.

JOHAN 7:29

Hi ma chüben, kepaghenanye hi ma wina gho, nu ma hi kesunchi.”

JOHAN 8:19

Mathu na ma wi keü, “NBa na khiewa ben nu?” Jisu na luneng, “Nthu na hi nu iBa nchü. keujüla nthu na hi chü lethu, iBa la chü kesa.”

1 KORINTHNYI 15:34

Nthu leben metsashhu sa nengya nu nsamila yilo. Kepaghenanye nthu pahan na Anyiza npi chüyale, hi ha khi pi nthu kejügheya thsüben.

1 KORINTHNYI 8:4

Tsalina atsse pi atsikezhüthu kekinyi tsü kedsa cüki: atsikezhü tsüna ayyi wi kahangli nmi, nu ciwi Anyiza kesütan benle kesa tsü ithu na chüben.

2 KORINTHNYI 4:6

Anyiza na “Kewegüwa na kejang wina wegü shhugho ben!” kekhiwa tsü makesü Nyiza na ma kewegü pi ithu leben wi wegü cü, ithu ssigho Anyiza nyankethang Khrista miwi wegü keben palakechü wi tsü chi cüben.

FILIPPINYI 3:10

Hi kenmvu maben lethu Khrista chüya nu ma hangneng-keshagha kekhang wi tsü sanan, ma ketizen kesa wi gwegheya, nu ma keshü wi tsü ma ti saya,

FILIPPINYI 3:8

Pala tsüthu ketan nye; Apvüwa Jisu Khrista cüki tsüdi miwi ma men kebenwa tsü ghena hi pala tsüdi pi ma men nkemi saden. Hi ma ghena tsüdila teshidha; hi Khrista wi kekiyi muya le kesalina tsüthu pi acenya ti sa,

1 THESSALONIKANYI 1:9

Mathu tsüdila ikhang na nthu hhainan kegho wi nthu na khati ikhang ssiya nu nthu na khati atsikezhüthu wina khapeghe sen nu Anyiza wi gho nu atsentsa nu hangkeben Nyiza kekuli saben khe tsü cüki khiben,

2 THESSALONIKANYI 1:8

annikeqhe sen nu ithu Pvüwa Jisu cüki Jühtheü Kemehaiwa tsü nkina nu Anyiza meya mvula kesathu meten cüden.

IBRINYI 3:1

Hi Khristanyi cünyuthu, Anyiza na ciya kesathu! Anyiza na kesunchi pi ithu kenondi wi khishi keten Keqhaikedi Kemisintsa kesa thsüwa Jisu cüki tsü meshen chilo.

2 PITOR 1:2

Anyiza nu ithu Pvüwa Jisu cüki kechü wina nanketizen nu kecca ya nthu pong ntsa keyawa salo.

2 PITOR 1:3

Ithu ci pi ma ji anyankethang nu kemehai wi saghuya kesawa cüki kechü ghena Anyiza kekhang na ithu ya atsentsa kahang wi hangya thsüle kesa nsenthu keyishü tsüdi pi ithu cüdha.

2 PITOR 1:8

Nthu na hathu ha nsenthu yishü ben, nu nthu na hathu ha benya lethu, tsüthu na nthu sa pi ithu Pvüwa Jisu Khrista cüki kechü wi ma men ben nu ma bi bünya thsüben.

1 JOHAN 1:2

Kahang ha mutha keshhugho wi ikhang na tsü muyadha; tsalina ikhang na tsü cüki khi nu Abawa wi anuphan kahang keben pi ikhang ccüca kechi cüki tsü pi nthu kizaben.

1 JOHAN 1:3

Ikhang na Abawa nu ma Tsawa Jisu Khrista gweghe ashukesa wi tsü nthu la ithu gwegheya thsüle kesalina ikhang na ikhang mukeya nu zakeya tsü pi nthu la kizadha.

1 JOHAN 2:23

Kepaghenanye thowa na Atsawa meya mvu saten khe Abawa la meya mvu saden; thowa na Atsawa yayaten khe Abawa la yayaden.

1 JOHAN 4:6

Isala ithu tsü Anyiza ji. Anyi kesü le kesü lela Anyiza chüben lethu, ithu jühkina den; nu thowa na Anyiza ji nye khe ithu jühkina nten. Tsalina hati nu ithu na atsentsawa Ghamu nu kesazzi ghamu chü kepapa saya mehai.

1 JOHAN 5:20

Anyiza Tsawa na ghodha nu ithu ya atsentsawa Nyiza tsü chüya thsüle kesalina chüshikeya pi ithu cüle kesa ithu chüben. Ithu na ma Tsawa Jisu Khrista wi hang keben ghena atsentsawa Nyiza wi hangben. Hawa ha atsentsa Nyiza, nu anuphan kahang.