JEREMIYA 8:2 - Kemethajüh (N) (Re-editing) Bible (BSI)

² Saghu pi vhü nsala mathu gü na ayyi miwi kele pi ayyi kemehai ti saaden. Tsüthu pi anyi hathu na ghali nu kekuli sa, mathu ccüneng nu kinyi keghothu aghani, asha, nu ghotsithu tuwi vvüzighe den.

JEREMIYA 8:2 Iomraidhean Croise

2 KADIMITHU 17:16

Mathu na Apvüwa mathu Nyiza yenthu tsüdila pakhhia nu amighe pi amesü zza asüpon keni zhü nu kinyi; mathu na acenpvü nzawa Asherah tsikezhü kesü la zhü, ghotsithu kinyi, nu Baal cenpvü kekuli sa.

2 KADIMITHU 21:3

Ma ma ba Hezekiya na yasa kesathu Anyiza nkechüthu kekinyipenthu tsü saneng; ma Israel Kadimi Ahab na kesa ti Baal kekinyipenthu sa nu acenpvü nzawa Asherah tsikezhü kesü sa. Manasseh na ghotsithu la kinyi.

2 KADIMITHU 21:5

Kekinyijjen ccühha keni witsü ma ghotsithu kekinyipenthu sa.

2 KADIMITHU 23:5

Ma Judah kadimithu na pi Anyiza nkechü kekinyipenthu wi ahhanshathu sa thsüle keqhaikedithu sa thsü kethengthu tsüna Judah nyunutithu nu Jerusalem kete witsü ahhanshathu sapi Baal, aghani, asha, tangwi kebenthu, nu ghotsithu cü ketenthu tsüdi khupia.

ZAKECI 53:5

Isala mathu na kheni tsüti npi kesa ghena mathu keqhethi kidenya tendha, kepaghenanye Anyiza ma nyi ghinyithu güthu tsü pazigheaden. Anyiza na mathu meya mvu ladha, nu tsüghena Israel yala mathu miwi khangya thsüaden .

ZAKECI 83:10

No Endor wi mathu miwi khangya, nu mathu kamangthu na ayyi wi bighea.

ZAKECI 83:11

Oreb nu Zeeb manyi miwi kuli kechi ti mathu ccülikesathu miwi kuli chilo; Zebah nu Zalmunna miwi kesa ti mathu miwi kekhang kesenthu tsüdi miwi khangya cülo,

Sansichhü 6:3

Anyi kesü na atsa meza ben nu ma kesie hangya mehai, isala ma kesie hangya lela keujüla ma shei anonkeghewa tsü nu mehaitsü pi kevhü tsü mu meya lethu hi khiben, meme keshü kesü pvügha keyawa la mehai.

JEREMIYA 14:16

Mathu na ajüh hapi thothu kiza khe tsüthu la tsü makesü pathiaben. Mathu kamangthu pi Jerusalem lentonti wi khala, nu thola mathu pi nvhü laben. Ha mathu tsüdi miwi kuliben — mathu wubvü, nu mathu tsangathu saghu. Hi mathu ya mathu gheshighena kutimen dhi thsüden.’

JEREMIYA 16:11

Isalethu Apvüwa na hati khi benle kesa mathu wi kizalo, ‘Nthu bamyithu na hi teshi theng nu wa acenpvü kepathu kinyi nu kekuli sa. Mathu na hi yisha nu hi pi sansi keten jühthu nkinala.

JEREMIYA 16:4

Mathu na kesakinaa ghei nkemehai ntsa pvü nu shüben, isanu thola mathu ghena leben güccü, nyelela mathu kamang pi vhüle sa nben. Mathu kamang na acenya pi nbonki ketheng ti saaden. Aghi wi shü nyelela khwenthi shü, mathu kamang na awathu nu aghangsathu tsse saaben.

JEREMIYA 16:6

Keban nu ketha-u lela ayyi hawa wi shüaben, isala thola mathu pi vhü nyelela mathu ghena leben gükeccü sa nben. Thola ma leben gükeccü zensu wina ayisü sa nyelela ali whia nben.

JEREMIYA 19:13

Jerusalem jjenthu, Judah kadimithu jjenthu, nu ajjen miwi hankedemvu mecang pi ghotsithu kinyi nu ciwi na kisengtssü meyisha pi acenpvü kepathu kinyi kesa pen tsüdila nmetha pi Tofeth ti saaben.”

JEREMIYA 22:19

Gada kesü pi kevhü wi kenyuwa pi kecü cu ma zan sen wa Jerusalem khweti-jenka na ameiwa khala ben.’ ”

JEREMIYA 25:33

Tsü ghanan wi Apvüwa na pathi ketheng kamangthu tsüna ayyi kenten kesü wina wa kepawa kecu vvüzighe benden. Thola mathu ghena anongü, nu mathu pie wa vhü nben. Tsüthu tsüna acenya pi nponki ketheng ti saaben.

JEREMIYA 31:40

Keshü pi vhü nu acenya pi khala keten yyiketijü maben, nu Kidron Kuza meiwa alli tsüdi na wa Goru khweti-jenka na wa nishuwa kecu tsüna ituwi metha ben. Anyunutiwa tsüna khiela gishüzighe nyelela dedi nbendha.”

JEREMIYA 36:30

Tsalina hi Apvüwa, hi khili no, Kadimiwa Jehoiakim kizaben, nshicübvügha kesütanla David Kadiyyi miwi kekhang senya nbendha. Nkamang pi khala nu aghanan wi thsü nu aghaja wi akejan caki isaben.

JEREMIYA 9:20

Hi khi, “Nthu nzathu, Apvüwa hhai kinalo, nu ma jühthu wi kekaketsü sa chilo. khatinu anongü ten khe pi nthu ngathu, nu khatinu pi kevhü khwisa ten khe pi apvüshangthu sansi cülo,

JEREMIYA 9:21

Keshüwa na ithu jjenkubhi wina dugho, nu ithu kadijjenthu wi dughodha; tsüna alentonti wi atsangathu, nu asenkesapen wi acalithu pathidha.

JEREMIYA 9:22

Apen kahe wi keshü kamang na vvüzighe ben, allithu wi ayyi kenyan pi abhon sa ketheng ti, alli kewwithu na wwi pi teshi nu thola tsü saghu nkeya ti. Hawa ha Apvüwa na hi khilo pi hi kiza.”

EZEKIEL 29:5

Hi no nu anga tsüthu tsüdi pi ayyikeshü wi cüchiaben . Nkamang pi nvhüla teshiaben . Hi tsüpi awathu nu aghangsathu tsse sa thsüaden .

EZEKIEL 39:5

Mathu ya agheja wi ghameme shü thsüaden, hi Kemisintsa Apvüwa na khidha.

EZEKIEL 6:5

Hi Israel nyithu kamang pi vvüzighe cüden; hi mathu gü tsüpi mecang pi kekinyipenthu kevü tsüdi vvüzighe chi cüden.

EZEKIEL 8:16

Nu ma hi ssisen Kekinyijjen ccühha anonwa wi du. Ciwi kemetha pen wi kedulen kete wi kekinyipen nu accühha manyi jüwi, npvüza nkwe nu manga-u na ben. Mathu na mathu ghatsü pi kemetha pen wiwa sa nu nishu wiwa kukedu aghani keshhugho tsü kinyiben.

ZEFANIYA 1:17

Apvüwa na khiben, “Hi ketizenkesa hati kesa sengho anyi miwi chi nu tsüdila anyon nkemu nyi kesü ti keqoe thsüben. Mathu na sami pi hi shundha, nu khili mathu jjü na atssü ti keji thsü nu mathu kamangthu na ayyi miwi bighe benden.”

ZEFANIYA 1:5

Hi anyi kesü le kesü lela ajjenmili wi kila aghani, asha, nu ghotsithu kinyi ketenwa yasa den. Hi anyi hi kinyi nu ijühya le kishen, isala acenpvü Molek nyan wina kishen ketenthu la yasa cüden.

KEKULI 7:42

Tsalina Anyiza na mathu teshi nu mathu yala tang wi ghotsithu kinyi wa thsü, tsüna atusenjüh- kechüthu lesüshen wi zhü ketheng ti: ‘Israel nyithu! Nthu na amapi jügha ayyikeshü wi keten wi, nthu na aghangsathu pathi pi ahhansha sa pi hi ncü.

AYENZHÜNENG 17:3

tsüna Apvüwa yenkhukechi tsü matangla acenpvü kepathu nyelela aghani, asha, ghotsithu kinyi nu kekuli sawadha le kesa zaya.

AYENZHÜNENG 4:19

Nthu mechu pi atssan wi mukeben tsü kinyi nu kekuli nsa thsüla — aghani, asha, nu ghotsithu. Apvüwa nthu Nyiza na anyi kepathu tsüdi yala tsüthu kinyi thsüle khuchidha.