Oseas 2:23 - CHUYA QELLQA La Biblia en Quechua de Ayacucho 2012

²³ Kikiypaqmi llaqtayta kay pachapi hatarichisaq; mana llakipayanatapas llakipayaykusaqmi, “manam llaqtayñachu kanki” nisqaytapas, “llaqtaymi kanki” niptiymi paypas “Diosnilláy” niwanqa, nispa.

Quechua Ayacucho Bible 1987

²³ Allpa pachapim runaykunata kikillaypaqña tarpusaq. “Manam llakipayasaqñachu” nisqaykunatam kunanqa llakipayasaq. “Manam runaykunañachu kankichik” nisqaykunatam kunanqa: “Runaykunañam kankichik” nisaq. Paykunañataqmi niwanqa: “Qamllam Diosniyqa kanki” nispa.

Chuya Qellqa 1992

²³ Kikiypaqmi llaqtayta kay pachapi hatarichisaq; mana llakipayanatapas llakipayaykusaqmi, “manam llaqtayñachu kanki” nisqaytapas “llaqtaymi kanki” niptiymi paypas “Diosnilláy” niwanqa, nispa.

Oseas 2:23 Iomraidhean Croise

Cantares 2:16

Kuyaqniyqa ñoqapam, ñoqapas paypam kani, payqa rosas chawpikunapim ovejanta michin.

Isaías 44:5

Paykunamantam hukkaqnin ninqa: “Ñoqaqa Tayta Diospam kani”, nispa. Hukninñataqmi ninqa: “Ñoqaqa Jacobpa mirayninmi kani”, nispa. Hukkaqninñataqmi makinpim qellqakunqa: “Ñoqaqa Tayta Diospam kani”, niqta. Hinaspam sutinman yapaykunqa “Israelpa miraynin”, niqta.

Jeremías 16:19

Dios taytalláy, kallpanchaqniymi qamqa kanki, sasachakuypi harkaykuqniymi qamqa kanki. Kay pachapa patankunamantam nacionkuna hamuspanku nisunki: Cheqaptapunipas ñawpaq taytaykuqa, mana valeq idolokunatam herenciata hina chaskirqaku.

Jeremías 30:22

Qamkunam llaqtayña kankichik, ñoqañataqmi Diosnikichik kasaq, ñoqa Tayta Diosmi chaynata nini.

Jeremías 31:27

Tayta Diosmi kaynata nin: Hamuchkanmi punchaw Israel naciontawan Judá nacionta runakunawan hinaspa animalkunawan huntachinaypaq.

Jeremías 32:38

Paykunam llaqtay kanqaku, ñoqañataqmi Diosninku kasaq.

Jeremías 33:26

Chaynaqa, Jacobpa mirayninku-natawan serviqniy Davidpa mirayninkunataqa manam haykapipas qepanchakusaqchu. Paykunamantam hatarichisaq Abrahampa, Isaacpa hinaspa Jacobpa mirayninkunapi munaychakuqta. Huklaw nacionkunaman preso apasqakunatapas, llakipayarispaymi kutichimusaq, nispa.

Ezequiel 36:29

Manaña imawanpas qanrachakunaykichikpaqmi waqaychasqaykichik. Trigotapas llumpayta ruruchiptiymi manaña huktawanqa yarqaymanta kanki-chikñachu.

Oseas 1:6

Huktawan wiksayakuruspanmi warmi wawata Gomer wachakururqa. Chaymi Oseasta Tayta Dios nirqa: Lo-ruhama nispa sutichay, manañam huktawanqa Israel nacionta llakipayasaqñachu, nitaqmi pampachasaqñachu.

Oseas 8:2

Chaywanpas Israel runakunam qayakuwanqaku: ¡Diosniykupaqñam reqsikuykiku! nispanku.

Zacarías 10:9

Nacionkunamanmi paykunata cheqerachisaq, hinaptinmi chay karu llaqtakunapi ñoqamanta yuyarinqaku, huk punchawmi wawa-churintin kutimunqaku.

Zacarías 13:9

Chay puchuqkunatam qollqeta hina ninapi chulluchisaq, qorita hinam chuyanchasaq. Hinaptinmi paykuna qayakamuwaptinku ñoqañataq uyariykuspay kaynata nisaq: “Llaqtalláy” nispay, paykunañataqmi ninqaku: “Tayta Diosllam Diosninchikqa”, nispanku.

Zacarías 14:16

Chaymantam Jerusalenpa contranpi hatariq nacionkunamanta puchuqkunañataq, Tukuy Atiyniyuq Tayta Dios Reyta yupaychanankupaq hinaspa ramada fiestata ruwanankupaq watan-watan qespinqaku.

Zacarías 14:9

Tayta Diosmi kay pachapi munaychakunqa. Pay sapallanmi Dios kanqa, sutinpas sapallanpam reqsisqa kanqa.

Zacarías 2:11

Chay punchawpim achka nacionkuna Tayta Diosman hukllawakunqaku, paykunapas llaqtanñam kanqaku, Diosmi chawpikichikpi yachanqa. Chaynapim yachankichik Tukuy Atiyniyuq Tayta Dios kachamuwasqanta.

Malaquías 1:11

Ñoqataqa intipa qespimunan lawmanta qallaykuspa intipa seqaykunan lawkamam lliw nacionkuna hatunchawanku, yupaychawanankupaqpas tukuy hinastinpim inciensokunatawan suma-sumaq ofrendakunata kañapuwanku. Llapallan nacionkunapim sutiyqa hatunchasqa. Tukuy Atiyniyuq Tayta Diosmi chay-nata nin.

Romanos 3:29

Chaynaqa, Diosqa ¿judiokunapa Diosnillanchu? ¿Manachu wakiq runakunapapas Diosninku? Arí, paykunapapas Diosninkum.

Santiago 1:1

Ñoqa Santiagom Diospa hinaspa Señor Jesucristopa serviqnin, llapallan kay pachapi cheqesqa Israelpa chunka iskayniyuq ayllunkunata rimay-kamuykichik.