Isaías 24:8 - CHUYA QELLQA La Biblia en Quechua de Ayacucho 2012

⁸ Tamborwan kusikuyninkum qollurun, kusikuyllapiña chaqwakuyninkum tukurun, arpakunapa miskillaña waqayninmi upallarun.

Quechua Ayacucho Bible 1987

⁸ Tinyawan kusikuyninkuqa upallarunmi. Fiestakunawan bulla rurayninkuqa upallarunmi. Arpakunapa miskillaña waqayninqa upallarunmi.

Chuya Qellqa 1992

⁸ Tamborwan kusikuyninkum qollurun, kusikuyllapiña chaqwakuyninkum tukurun, arpakunapa miskillaña waqayninmi upallarun.

Isaías 24:8 Iomraidhean Croise

Jobwan Sutichasqa Libro 3:7

¡Ima allincha kanman karqa chay tutapi mana pipas wiksayakuptinqa, kusikuymanta mana pipas chay tutapi qapariptinqa!

Jobwan Sutichasqa Libro 30:31

Arpallaypas llakillatañam waqachkan, qenallaypas llakillatañam waqachkan.

Isaías 16:10

Kusikuyninkum tukurunña, tarpusqa chakrakunapi qapariyninkum tukurunña, uvas huertankupi takiyninkum manaña kanñachu, uvas sarunankupipas manañam sarunqakuñachu, vinopaq uvastapas manañam sarunqakuñachu. Diosmi kusikuyninkutapas tukurachin.

Isaías 5:12

Convido ruwasqaykichikpipas arpakunata, bombokunata, qenakunatam tocankichik, vinopas puchu-puchum; Tayta Diospa ruwasqantam ichaqa mana qawarinkichikpaschu, Diospa tukuy ima ruwasqantaqa manam kaqpaqpas hapinkichikchu.

Isaías 5:14

Chayraykum wañuqkunapa kasqan sitiopas yarqaymanta hinaraq simintapas kicharinqa, llaqtatawan kamachikuqkunatapas millpurunanpaq, fiestakunapi aychanku kusichiyllapi kaqkunatapas millpurunanpaq.

Jeremías 16:9

Ñoqa Israelpa yupaychasqan Tukuy Atiyniyuq Tayta Diosmi kaynata nini: Kay llaqtapim takiyninkuta, kusikuyninkuta, casarakuy fiestapi takinkuta qayllankumanta qollurachisaq. Chaykuna ruwasqaytaqa ñawikichikwanmi rikunkichik.

Jeremías 25:10

Kusikuspanku fiestakunapi chaynataq casarakuykunapi takiyninkutapas qollurachisaqmi. Maraypa kunrunyayninpas, mecheropa achkiyninpas manañam kanqañachu.

Jeremías 7:34

Judá llaqtakunapi chaynataq Jerusalén llaqtapa callenkunapim, asikuyta, kusikuyta casarakuy fiestata chinkarachisaq. Kay nacionqa pasaypaqtañam chunninqa, nispa.

Lamentaciones 5:14

Ancianokunapas llaqtapa punkunpiqa manañam kanñachu, jovenkunapas manañam takinkuñachu.

Ezequiel 26:13

Suma-sumaq takikikunatapas qollurachisaqmi, arpaykikunapa waqayninpas manam uyarikunqañachu.

Ezequiel 28:13

Qamqa Edén lawpi Diospa huertanpim karqanki, tukuy rikchaq alhaja rumikunawan pachasqam karqanki: Cornerinawan, topaciowan, jaspewan, crisolitowan, berilowan, onicewan, zafirowan, carbunclowan, esmeraldawan hinaspa qoriwan. Tukuy kaykunaqa unanchasqa kasqayki punchawmantaraqmi alistasqaña karqa.

Oseas 2:11

Kusikuynintapas chinkachisaqmi; fiestankunatapas, musoq killankunatapas, samana punchawninkunatapas hinaspa hatun huñunakuyninkunatapas qolluchisaqmi.

Amós 6:7

Chayraykum kunan preso apaqkunapas qamkunamanta qallarispa presochasunkichik; chaynapim hawkallaña samakuspa upyakuynikichikwan mikukuynikichikpas tukunqa, nispa.

Apocalipsis 18:22

Chaypiqa arpakunapa, qenakunapa, trompetakunapa waqayninpas manañam uyarikunqañachu. Tukuy imapi llamkaqkunapas manañam llamkanqakuñachu, molino rumipa tunrunyayninpas manañam uyarikunqañachu.