Éxodo 25:22 - CHUYA QELLQA La Biblia en Quechua de Ayacucho 2012

²² Chaypim qanman rikurisqayki, hinaspam chay tapapa hawanmanta, pacto ruwasqay Arcapa hawanpi kaq querubinkunapa chawpinmanta rimapayasqayki; chaypim Israelpa mirayninkunapaq kamachikuykunata willasqayki.

Quechua Ayacucho Bible 1987

²² Chaypi tupanakuptinchikmi, rimapayasqayki tapapa hawanmanta otaq Chunkantin Kamachikuyniy waqaychana baulpa hawanpi kaq angelkunapa chawpinmanta, chaypim willasqayki Israelpa mirayninkunapaq lliw kamachikuyniykunata.

Chuya Qellqa 1992

²² Chaypim qanman rikurisqayki, hinaspam chay tapapa hawanmanta, pacto ruwasqay Arcapa hawanpi kaq querubinkunapa chawpinmanta rimapayasqayki; chaypim Israelpa mirayninkunapaq kamachikuykunata willasqayki.

Éxodo 25:22 Iomraidhean Croise

Génesis 18:33

Chaymantam Abrahamwan rimayta tukuruspan Tayta Dios pasakurqa, Abrahamñataqmi maymi kasqanman kutikurqa.

2~Samuel 6:2

hinaspam llapallan tropankunapiwan Judá lawpi Baala llaqtaman pasarqaku Diospa Arcanta chay lugarmanta Jerusalenman apanankupaq. Chay Arcapim Diospa sutinta mañakuqku. Chaypitaqmi querubinkunapa chawpinpi Tukuy Atiyniyuq Tayta Diosqa munaychakuq.

2~Reyes 19:15

Tayta Diospa qayllanpi kaynata mañakurqa: Querubinkunapa chawpinpi yachaq Israelpa Tukuy Atiyniyuq Diosnin, qamllam kanki kay pachapi llapallan nacionkunapi munaychakuq Diosqa. Qanmi ruwarqanki hanaq pachatapas hinaspa kay pachatapas.

1~Crónicas 13:6

Chaymantam Israelpi llapallan runakunawan kuska Quiriat-jearim llaqtaman David rirqa, Tayta Diospa Arcanta apamunankupaq. Chay Arcantakamam querubinkunapa chawpinpi yachakuq Tayta Diosta qayakuqku. Quiriat-jearim llaqtapa huknin sutinmi karqa Baala, Judá lawpim tarikurqa,

Éxodo 20:24

Altarniytaqa allpamantam ruwanki, hinaspam animalkunata wañuchispayki chaypi lliwta kañanki, chaypitaqmi wañuchinki ovejaykikunatawan vacaykikunatapas chaynataq ñoqawan allinlla kasqaykimanta ofrendakunatapas. Ñoqam hamuspay sitiota akllasaq, sutiyta chaypi yuyarinaykichikpaq, hinaspaymi chaypi bendecisqaykichik.

Éxodo 27:21

Aaronwan churinkunam mecherokunata allichanqaku ñoqapa ñawpaqniypi tukuy tuta ratananpaq. Chaytaqa ruwanqa pacto ruwasqay Arcata harkaq velopa ñawpaqninpim. Kaymi kanqa wiñaypaq decretoy llapallan Israel castakunapaq chaynataq mirayninkunapaqpas.

Éxodo 30:36

Wakintam ñutuy-ñutuyta kutaruspa ñoqaman asuykuna carpapi pacto ruwasqay Arcapa ñawpaqninman churanki, chaypim qanwan tupasun, chay inciensoqa ñoqallapaqña sapaqchasqam kanqa.

Éxodo 30:6

Chay altartam velopa qepanpi, pacto ruwasqay Arcapa waqtanpi churanki, tapapa ñawpaqninpi, chaypim qanwan tupasaq.

Éxodo 31:18

Sinaí orqopi Tayta Dios rimayta tukuruspanmi Moisesman iskay tabla rumikunapi chunkantin kamachikuyta qoykurqa, chaykunaqa Diospa dedonwan qellqasqam karqa.

Éxodo 31:6

Bezaleelta yanapananpaqmi Dan ayllumanta kaq Ahisamacpa churin Aholiab sutiyuq runata qoni. Llapallan maestrokunamanmi yachayta qoni, chaynapi qanman tukuy kamachisqayta ruwanankupaq.

Isaías 37:16

Querubinkunapa chawpinpi yachaq Israelpa Tukuy Atiyniyuq Diosnin, qamllam kanki llapallan nacionkunapi munaychakuqqa. Qanmi ruwarqanki hanaq pachatapas chaynataq kay pachatapas.

Ezequiel 43:6

Chay runam waqtaypi sayaykurqa, hinaptinmi templomanta Tayta Diospa rimapayamuwasqanta uyarirqani.

Levítico 1:1

Diosman asuykuna carpamanta qayamuspanmi Israelman nimunanpaq Moisesta Tayta Dios nirqa: Qamkunamanta hukkaqnikichik ofrendata ñoqa Tayta Diosman ofrecewaspanqa, vacamanta otaq ovejamantam apamunqa.

Levítico 16:2

Wawqeki Aaronta niy, carpapi “Chuyay-chuyay” lugarmanta “Chuya” lugarta rakinaq velopa qepanmanqa otaq Arcapa tapanpa ñawpaqninmanqa ama sapa kutilla yaykunanpaq, chaynapi ama wañurunanpaq. Ñoqam Arcapa tapanpa hawanpi puyupi sutillata rikurisaq.

Números 17:4

Chay tawnakunataqa ñoqaman asuykuna carpapim Arcapa ñawpaqninpi churanki, chaypim qamkunawan tupasaq.

Números 7:89

Diosman asuykuna carpamanmi Moisés yaykurqa Dioswan rimananpaq, hinaptinmi chunkantin kamachikuykuna waqaychana Arcapa tapanmanta otaq querubinkunapa chawpinmanta Moisesta Tayta Dios rimapayamuq. Chaynatam Moiseswan Tayta Dios rimaq.

Jueces 20:27

Chay tiempopim Dioswan pacto ruwasqanku Arca, Bet-el llaqtapi kachkarqa, Aaronpa willkan hinaspa Eleazarpa churin Fineesñataqmi sacerdote karqa. Israelpa mirayninkunam huktawan Tayta Diosta tapurqaku: ¿Huktawanchu aylluyku Benjaminwan peleamusaqku icha manañachu? nispanku. Chaymi Tayta Dios nirqa: Rispa peleamuychik, paqarinmi makikichikman churamusaq, nispa.

1~Samuel 4:4

Chaynapim runakunata Silo llaqtaman kacharqaku, querubinkunapa chawpinpi tiyakuq Tukuy Atiyniyuq Tayta Diospa contrato ruwasqan Arcata apamunankupaq; Eliypa churin Ofniwan Fineespas Arcawan kuskam hamurqaku.