1 Pētero 4:14 - Rapa Nui

¹⁴ E koa kōrua mo vā-vā atu e te nuꞌu ꞌo te ai o kōrua ꞌa Ietū Kiritō; hai meꞌe nei e ꞌite ena: te ⌊Vārua Maitai⌋ pūai o te ꞌAtua nā ꞌi ruŋa i a kōrua ꞌi te hora taꞌatoꞌa.

1 Pētero 4:14 Iomraidhean Croise

Māteo 5:11

»Ko te koa i a kōrua ꞌi te hora vā-vā ꞌe tōtōā atu e te taŋata, ꞌe ꞌi te hora haꞌaꞌino hai rauhuru nō atu reo-reo ꞌo te peꞌe mai o kōrua ki a au.

Māteo 5:16

Pē ira kōrua ana haka tere ꞌi muꞌa o te taŋata. Ka takeꞌa ena, paꞌi, i te kōrua haka tere iŋa tano ki te mata o te ꞌAtua, he haꞌahana-hana tahi ki te kōrua Matuꞌa o te raŋi.

Ruka 6:22

»Ko te koa i a kōrua ka tute ena e te nuꞌu mai muri i a rāua, ka riri, ka vā-vā ꞌe ka taꞌe haka au ena ꞌi te ai o kōrua o te Poki o te taŋata.

Iovani 15:21

ꞌO te ai a kōrua ꞌāꞌaku, he aŋa tahi atu i te meꞌe nei ꞌi ruŋa i a kōrua, he taꞌe aŋi-aŋi e rā nuꞌu ko ai mau te kope uŋa mai era i a au.

Iovani 8:48

He kī ia e te hūrio ra-rahi: —¿Ko takeꞌa ꞌā? He aŋi mau ꞌā te mātou meꞌe kī: o ⌊Tāmāria⌋ koe ꞌe ꞌi roto i a koe te tātane.

Iovani 9:28

He haꞌamata ia tū nuꞌu era he vā-vā i rā kope, ꞌe he kī: —Ko koe ꞌā taꞌa meꞌe he taŋata hāpī o te taŋata era; a mātou he nuꞌu hāpī ꞌa ⌊Mōtē⌋.

Iovani 9:34

He kī ia e tū nuꞌu era: —A koe, mai tuꞌu poreko iŋa ꞌā ki te hora nei, he taŋata hara, ꞌe, ¿e haŋa ꞌā koe mo hāpī mai i a mātou? He toꞌo ia e tū nuꞌu ra-rahi era i rā taŋata he haka eꞌa mau rō ꞌai mai roto i te ⌊hare pure hūrio⌋.

Aŋa o te ꞌĀpōtoro 13:45

I takeꞌa era e te hūrio ra-rahi i te rahi o te taŋata, he mākota. He haꞌamata ia he vā-vā ꞌe he kī he reo-reo te vānaŋa ꞌa Pauro.

Aŋa o te ꞌĀpōtoro 18:6

He haꞌamata rā nuꞌu he riri ꞌe he vā-vā i a Pauro. He tū-tū ia a Pauro i te puŋaꞌehu mai ruŋa i tōꞌona kahu mo haka ꞌite ki rā nuꞌu: taꞌe ōꞌona te hape mo haka ūtuꞌa i a rāua e te ꞌAtua, o rāua ꞌā. ꞌE he kī: mai rā hora pe muꞌa he oho a ia ki te nuꞌu taꞌe he hūrio.

Aŋa o te ꞌĀpōtoro 28:22

E haŋa rō ꞌā a mātou mo ꞌite i tuꞌu manaꞌu o ruŋa i te hāpī ⌊kiritiano⌋ ꞌo te ai ko ꞌite ꞌā e mātou: ꞌi te kona taꞌatoꞌa e vānaŋa taꞌe tano rō ꞌā o ruŋa.

Aŋa o te ꞌĀpōtoro 5:41

He oho ia tū ŋā ꞌāpōtoro era mai muꞌa o rā nuꞌu ko toꞌo ꞌā te koa, he ꞌite ko haka nui-nui ꞌā a rāua e te ꞌAtua ꞌi te haka rē mo ꞌamo i te ꞌati ꞌo te ai o rāua ꞌa Ietū.

2 Kōrinto 12:10

ꞌĒ-ē, e koa rō ꞌana a au ꞌo tōꞌoku taꞌe pūai, ꞌo te vā-vā mai, ꞌo te kore o tāꞌaku meꞌe, ꞌo te tute mai mo tōtōā ꞌe ꞌo te ꞌati taꞌatoꞌa topa mai ꞌi ruŋa i a au ꞌi te ai ōꞌoku ꞌa Ietū Kiritō; ꞌi te hora taꞌe pūai ōꞌoku, paꞌi, ꞌi rā hora mau ꞌā e ꞌata pūai ena a au hai pūai ōꞌona.

2 Kōrinto 4:10

ꞌI te kona taꞌatoꞌa tuꞌu o mātou, he takeꞌa nō te aŋa e te nuꞌu pē nei ē: e oho rō ꞌana a mātou mo mate ꞌi te rima o te nuꞌu taꞌe haŋa mai, pa he meꞌe topa ki a Ietū. ꞌE, hai hāꞌūꞌū mai ōꞌona ꞌo mate a mātou, e takeꞌa takoꞌa ena: e ora nō ꞌā a Ietū.

2 Kōrinto 4:16

ꞌO ira a mātou e taꞌe hōriŋa nei ꞌi te mātou aŋa. Te mātou hakari, pe te rehe-rehe pe te oho nō, ꞌe, ka ai atu pē ira, te mātou haka moe iŋa i te manaꞌu ꞌi ruŋa i a Ietū pe te pūai pe te oho nō te mahana te mahana.

Karatia 1:24

ꞌE ꞌi te parau ꞌāpī era o ruŋa i a au, i haꞌahana-hana ai rā nuꞌu ki te ꞌAtua.

ꞌEvereo 11:26

Tōꞌona manaꞌu: i hau rō atu mōꞌona te ꞌamo i te ꞌati topa ꞌi ruŋa i te nuꞌu ŋatu i te haŋu ki te ⌊Mētia⌋ mo uŋa mai e te ꞌAtua ki te ai i a ia te hauhaꞌa o Ehipto; a ia, paꞌi, e tiaki ꞌana ki te meꞌe hopeꞌa o te riva-riva mo vaꞌai e te ꞌAtua.

Tanatiako 1:12

Ko te koa i te taŋata haꞌaoromaꞌi hai pūai i te ꞌati taꞌatoꞌa topa ꞌi ruŋa i a ia. ꞌI te haka moe nō i te manaꞌu ꞌi ruŋa i a Ietū ꞌi roto i te ꞌati, he tano rā taŋata ki te mata o te ꞌAtua, ꞌe he vaꞌai ki a ia i te ora ꞌāpī ꞌina he hopeꞌa raꞌa, he hei kī e te ꞌAtua mo vaꞌai ki te nuꞌu haŋa ki a ia.

Tanatiako 5:11

Ko ꞌite ꞌana a tātou: te nuꞌu haꞌaoromaꞌi i te ꞌati e hio-hio rō ꞌā te manaꞌu ꞌi ruŋa i te ꞌAtua e haꞌamaitai rō ꞌā e ia. Ko ꞌite ꞌana, paꞌi, e kōrua pē hē a Hope, ꞌi muꞌa ꞌā, i haꞌaoromaꞌi ai i tōꞌona ꞌati, ꞌe pē hē te ꞌAtua i haꞌamaitai ai i a ia ꞌi te hora hopeꞌa. Te ꞌAtua meꞌe māhatu ꞌaroha.

1 Pētero 2:12

E noho kōrua ꞌina e tahi hape ꞌi roto i te nuꞌu taꞌe haŋa ki te ꞌAtua. Mo noho o kōrua pē ira, he takeꞌa e rā nuꞌu i te meꞌe riva-riva aŋa e kōrua ꞌe he haꞌahana-hana ki te ꞌAtua ꞌi te mahana ka kī era e ia i te meꞌe tano ꞌe i te meꞌe taꞌe tano aŋa e te taŋata, ka ai atu ꞌi te hora nei e kī rō ꞌana e rāua pē nei ē: a kōrua he nuꞌu aŋa i te meꞌe taꞌe tano.

1 Pētero 3:14

ꞌE mo topa atu o te ꞌati ꞌi ruŋa i a kōrua, ka ai atu e aŋa ꞌana i te meꞌe tī-tika, he haꞌamaitai atu kōrua e te ꞌAtua. ꞌO ira, ꞌina ko riꞌa-riꞌa ꞌi te nuꞌu tōtōā atu.

1 Pētero 3:16

ꞌE ana pāhono, hai haumārū ꞌe hai moꞌa. ꞌIna kōrua ko aŋa i te meꞌe taꞌe tano. Pē ira te nuꞌu vānaŋa taꞌe tano o ruŋa i a kōrua ka haꞌamā ena ꞌi te rāua vānaŋa ꞌi te takeꞌa i te kōrua noho iŋa tano ꞌo te ai o kōrua he nuꞌu haka moe i te manaꞌu ꞌi ruŋa i te ⌊Kiritō⌋.

1 Pētero 4:16

Meꞌe kē te meꞌe he ꞌamo i te ꞌati ꞌo te ai o kōrua he ⌊kiritiano⌋, ꞌe, mo topa atu, ꞌina ko haꞌamā. Te meꞌe mo aŋa: he haꞌahana-hana i te ꞌAtua ꞌo te ai o kōrua ꞌa Ietū Kiritō.

2 Pētero 2:2

Ka ai atu pē ira, e rahi rō te nuꞌu ka aŋa takoꞌa ena i te meꞌe taꞌe tano aŋa e te ŋā maꞌori reo-reo era, ꞌe hai noho iŋa taꞌe tano o rā nuꞌu ka ai ena te vānaŋa taꞌe tano mo te ara parautiꞌa o te ꞌAtua.