1 Pētero 3:7 - Rapa Nui

⁷ ꞌE a kōrua, e te kenu hāipo-ipo ē, e haŋa e hāpaꞌo riva-riva i te kōrua ŋā viꞌe. Ka ai atu ꞌata hau rō atu te kōrua pūai ki a rāua, e moꞌa ꞌi te ꞌite pē nei ē: mo rāua takoꞌa te hauhaꞌa ka vaꞌai ena e te ꞌAtua, he ora ꞌāpī ꞌina he hopeꞌa raꞌa. Mo taꞌe aŋa o kōrua pē ira he hihi-hihi te kōrua pure.

1 Pētero 3:7 Iomraidhean Croise

Māteo 18:19

»He kī atu a au: mo haꞌaꞌau ꞌi te ao nei hoko rua o kōrua mo no-noꞌi e tahi meꞌe hai pure, he vaꞌai atu e tōꞌoku Matuꞌa o te raŋi.

1 Kōrinto 7:3

Te nuꞌu hāipo-ipo e moe i te rāua kenu ꞌo i te rāua viꞌe. E ko tano mo taꞌe moe e te kenu i tāꞌana viꞌe ꞌe e te viꞌe i tāꞌana kenu.

Ēfeto 3:6

Rā parautiꞌa ko te meꞌe nei: mo haka moe o te nuꞌu taꞌe hūrio i te manaꞌu ꞌi ruŋa i a Ietū, mo rāua takoꞌa te haꞌamaitai ena o te ꞌAtua mo tōꞌona taŋata he itaraera. ꞌI te hora nei, te ⌊hūrio⌋ ꞌe te nuꞌu taꞌe hūrio ⌊haka moe i te manaꞌu⌋ ꞌi ruŋa i a Ietū he nūnaꞌa mau nō e tahi, ꞌe te meꞌe taꞌatoꞌa hōrea e te ꞌAtua mo te hūrio mo rāua takoꞌa, ꞌi te meꞌe era a rāua takoꞌa, paꞌi, ꞌa Ietū Kiritō.

Ēfeto 4:30

ꞌIna ko haka māui-ui te māhatu o te Vārua Maitai hai aŋa i te meꞌe taꞌe tano; hai ia, paꞌi, te ꞌAtua i tāpaꞌo ai i a kōrua pa he taŋata ꞌāꞌana mo te mahana pe muꞌa ka oho ena ka haka oti ena e te ꞌAtua i tāꞌana meꞌe haꞌamata aŋa: he haka eꞌa mau rō ꞌāvai i a kōrua mai roto i te hara.

Ēfeto 5:33

ꞌE mo kōrua takoꞌa te vānaŋa nei: e haŋa te kenu ki tāꞌana viꞌe, pa he haŋa iŋa mau era ꞌā ōꞌona ki a ia, ꞌe te viꞌe, e ꞌite mo moꞌa i tāꞌana kenu.

Ēfeto 6:18

E te taina, ꞌina kōrua ko haka rē i te pure; e ani e oho ki te ꞌAtua hai pūai o te Vārua Maitai. E uꞌi ꞌo hōriŋa rō ꞌe ꞌo oho kē rō te manaꞌu. E pure mo te nuꞌu taꞌatoꞌa haꞌataꞌa e te ꞌAtua māꞌana.

Kōrosa 3:19

E te kenu, e haŋa ki te kōrua ŋā viꞌe; ꞌina ko tōtōā ki te hora hopeꞌa.

1 Tētārōnika 4:4

ꞌe he ꞌite o kōrua taꞌatoꞌa mo haka noho i te meꞌe pohe e te hakari, ki ai ai te kōrua noho iŋa, noho iŋa ꞌina e tahi hara mo moꞌa atu e te taŋata.

Tito 3:7

ki aŋi-aŋi riva-riva ai e tātou: pe muꞌa ka oho ena e ravaꞌa rō e tātou i te ora ꞌāpī ꞌina he hopeꞌa raꞌa vaꞌai e te ꞌAtua, pa he hauhaꞌa haka rē e te matuꞌa mo tāꞌana poki. ꞌE e ꞌite nei e tātou i nei meꞌe ꞌo te ai, ꞌi tōꞌona riva rahi, i kī ai e te ꞌAtua: a tātou he nuꞌu tano ki tōꞌona mata.

ꞌEvereo 1:14

Te merahi taꞌatoꞌa, paꞌi, he vārua aŋa ki te ꞌAtua uŋa mo hāꞌūꞌū ki te nuꞌu eꞌa mai roto i te ūtuꞌa o te hara ꞌe ravaꞌa i te ora ꞌāpī ꞌina he hopeꞌa raꞌa vaꞌai e te ꞌAtua.

1 Pētero 3:1

ꞌE a kōrua, e te ŋā viꞌe ⌊hāipo-ipo⌋ ē, e haꞌatura ki te kōrua kenu, ka ai atu he kenu taꞌe ⌊haka moe i te manaꞌu⌋ ꞌi ruŋa i te ⌊roŋo riva-riva o ruŋa i a Ietū⌋. Mo aŋa o kōrua pē ira, he huri pēaha te manaꞌu, ꞌe he haka moe takoꞌa i tōꞌona manaꞌu ꞌi ruŋa i a Ietū, ꞌe taꞌe ꞌō ꞌo te meꞌe i kī e kōrua, ꞌo te takeꞌa i te kōrua noho iŋa tano, noho iŋa moꞌa ꞌe haꞌatura ki te ꞌAtua.