1 Pētero 1:4 - Rapa Nui

⁴ ꞌe e vaꞌai rō mai i te meꞌe hāpaꞌo mo tātou ꞌi ruŋa i te raŋi, he meꞌe e ko kore, e ko tāpau ꞌe e ko mae-mae ki te hora hopeꞌa.

1 Pētero 1:4 Iomraidhean Croise

Māteo 25:34

E kī rō e te ꞌAriki ki te nuꞌu o tōꞌona pāꞌiŋa mataꞌu: “Ka oho mai kōrua, e te nuꞌu haꞌamaitai e tōꞌoku Matuꞌa ē; ka koa kōrua ꞌi te ao vaꞌai atu e te ꞌAtua haka riva-riva e ia mo kōrua mai te hora haꞌamata aŋa e ia i te ao.

Marko 10:17

I eꞌa era a Ietū mo oho ꞌi tōꞌona ara, he tuꞌu e tahi taŋata e tahuti rō ꞌā, he tū-turi ꞌi muꞌa ꞌe he ꞌui: —E te Maꞌori riva ē, ¿he aha tāꞌaku meꞌe mo aŋa mo ravaꞌa e au i te ora ꞌāpī ꞌina he hopeꞌa raꞌa vaꞌai e te ꞌAtua?

Aŋa o te ꞌĀpōtoro 20:32

»Hora nei, e kuā taina ē, he vaꞌai a au i a kōrua ki te rima o te ꞌAtua mo hāpaꞌo, ꞌe he ani atu mo maꞌu mo oho nō kōrua i te roŋo hāpī atu era e au o ruŋa i te riva rahi o te ꞌAtua. ꞌI te roŋo nei te pūai mo ꞌata haka hio-hio i te kōrua manaꞌu ꞌi ruŋa i a Ietū ki ravaꞌa ai i te meꞌe taꞌatoꞌa hōrea e te ꞌAtua mo te nuꞌu haꞌataꞌa māꞌana.

Aŋa o te ꞌĀpōtoro 26:18

Taꞌa meꞌe ka aŋa ena he haka ꞌara i te rāua mata, ki eꞌa ai mai roto i te pōhāhā ki roto i te māꞌeha, ꞌe mai te rima o Rukifero ki te rima o te ꞌAtua, ki haka moe ai i te rāua manaꞌu ꞌi ruŋa i a au. Pē ira te ꞌAtua ana haka kore i te rāua hara, ꞌe he oꞌo a rāua ki roto i te nūnaꞌa taŋata haꞌataꞌa e te ꞌAtua māꞌana”.

Rōmano 8:17

ꞌE, ꞌi te meꞌe era he ŋā poki tātou o te ꞌAtua, mo tātou takoꞌa te hauhaꞌa ena ka vaꞌai ena e te ꞌAtua ki a Ietū, hauhaꞌa hōrea e te ꞌAtua mo tāꞌana ŋā poki. Te meꞌe nō, e haꞌaoromaꞌi tātou, ꞌi te hora nei, i te ꞌati topa mai ꞌo te ai o tātou ꞌāꞌana, ki ai ai a tātou, pe muꞌa ka oho ena, ꞌi roto i tōꞌona nui-nui, te auraꞌa, ki ai takoꞌa ai i a tātou tōꞌona huru riva.

1 Kōrinto 9:25

Te nuꞌu ꞌāꞌati e hāpaꞌo rō ꞌana i a rāua mo te hora o te ꞌāꞌati. E aŋa ena pē ira mo rē i te hei, ꞌe rā hei e hopeꞌa era he mae-mae. ꞌE, a tātou e aŋa nei mo ravaꞌa i te meꞌe te hauhaꞌa e ko kore ki te hora hopeꞌa.

Karatia 3:18

Te ꞌAtua e ko taꞌe haka tano i tāꞌana meꞌe hōrea. ꞌO ira, ꞌāhani hai haꞌatura nō o tātou ki te haka tere iŋa ꞌa Mōtē ana vaꞌai mai e te ꞌAtua i te meꞌe hōrea mai, e ko ai ia he meꞌe ko hōrea mai era ꞌā e ia. Pē ira takoꞌa ꞌana te meꞌe hōrea era e te ꞌAtua ki a ꞌAparahama. ꞌĀhani ꞌo te aŋa o ꞌAparahama e tahi meꞌe i vaꞌai ai e te ꞌAtua i rā meꞌe, e ko ai ia he meꞌe ko hōrea era ꞌana e ia. ꞌE te parautiꞌa, te ꞌAtua i vaꞌai ai i rā meꞌe ki a ꞌAparahama ꞌo te ai mau nō ko hōrea era ꞌana e ia.

Ēfeto 1:11

I haꞌataꞌa ai i a tātou, ꞌi muꞌa ꞌā, e te ꞌAtua mo nuꞌu ꞌāꞌana hai Ietū Kiritō, he meꞌe i manaꞌu e ia mo aŋa. Te ꞌAtua, paꞌi, e haka tano tahi rō ꞌana i tāꞌana meꞌe haŋa ꞌe i tāꞌana meꞌe manaꞌu.

Ēfeto 1:14

ꞌE, ꞌo te ai o te Vārua Maitai ꞌi roto i a tātou, e ꞌite nei: te ꞌAtua e haka oti rō i tāꞌana meꞌe haꞌamata aŋa era: he haka eꞌa i a tātou mai roto i te hara, ꞌe pe muꞌa ka oho ena he vaꞌai mai i te meꞌe taꞌatoꞌa hōrea mo tāꞌana nuꞌu, ki haꞌahana-hana tahi ai a tātou i te nui-nui o tōꞌona pūai.

Ēfeto 1:18

ꞌE e ani takoꞌa rō ꞌana a au ki a ia mo haka māꞌeha atu i te kōrua manaꞌu, ki ꞌite ai kōrua he aha te meꞌe ꞌāꞌana mo kōrua pe muꞌa ka oho ena ꞌo te ai o kōrua he nuꞌu haꞌataꞌa māꞌana, ꞌe ki ꞌite takoꞌa ai kōrua i te rahi ꞌe i te nui-nui o te meꞌe hōrea e ia mo tāꞌana nuꞌu,

Kōrosa 1:12

koia ko māuru-uru ki te ꞌAtua Matuꞌa ꞌo te haka riro atu i a kōrua he nuꞌu tano mo ravaꞌa takoꞌa i te meꞌe hōrea era e ia mo te nuꞌu haꞌataꞌa māꞌana, he nuꞌu o tōꞌona haka tere iŋa, haka tere iŋa o te māꞌeha.

Kōrosa 1:5

ꞌo te ai e tiaki takoꞌa rō ꞌana kōrua ki te meꞌe hōrea mai e ia mo tātou ꞌi te raŋi. A kōrua ko ŋaroꞌa era ꞌana o ruŋa i te meꞌe nei hora haka ꞌite atu era i te roŋo parautiꞌa o te ꞌAtua

Kōrosa 3:24

A Ietū, paꞌi, he Pūꞌoko Haka Tere parautiꞌa o tātou o te nuꞌu taꞌatoꞌa haka moe i te manaꞌu ꞌi ruŋa i a Ietū, ꞌe ki a ia tātou e tāvini nei. ꞌE ko ꞌite ꞌā e tātou: pe muꞌa ka oho ena te ꞌAtua e vaꞌai rō mai i te meꞌe i hōrea e ia mo tāꞌana nuꞌu,

2 Timoteo 4:8

Te meꞌe toe nō he vaꞌai mai i tōꞌoku hei, hei vaꞌai ki te nuꞌu aŋa i te meꞌe tī-tika ki te mata o te ꞌAtua ka vaꞌai mai ena ꞌi te mahana o te ture hopeꞌa e Ietū Kiritō, kope ture hai parautiꞌa i te hape o te taŋata. ꞌE taꞌe ki a au nō ka vaꞌai mai ena, ki te nuꞌu taꞌatoꞌa tiaki hai māhatu ki tōꞌona hoki iŋa mai.

ꞌEvereo 10:34

I haka ꞌaroha rō kōrua mo te nuꞌu puru ꞌi roto i te hare maꞌuꞌaurī, ꞌe ꞌātā hai koa e haka rē era e kōrua mo toꞌo e te nuꞌu i te kōrua hauhaꞌa, he ꞌite o kōrua: ꞌi te raŋi e ai rō ꞌā te meꞌe ꞌata hau rō atu e ko pau ki te hora hopeꞌa.

ꞌEvereo 9:15

ꞌO ira, ꞌi te haka tere iŋa ꞌāpī nei, a Ietū he kope haka riva-riva i te taŋata ki te ꞌAtua, ki ravaꞌa ai e te nuꞌu kī e te ꞌAtua mo taŋata ꞌāꞌana i te meꞌe taꞌatoꞌa ꞌina he hopeꞌa raꞌa hōrea e ia mo rāua. A Ietū Kiritō, paꞌi, i mate ai mo haka eꞌa takoꞌa mai roto i te ūtuꞌa o te hara i te taŋata hara o te haka tere iŋa raꞌe era.

Tanatiako 1:11

Hora ena o te raꞌā e ꞌata pūai ena he paka-paka te mauku, he vī-viri tōꞌona tiare, he kore te nehe-nehe. Pē ira takoꞌa ꞌā te taŋata ꞌono ka ŋaro ena. ꞌI te mahana e tahi, e riva-riva nō ꞌā; ꞌe ꞌi te rua mahana, ko mate ko oti ꞌā.

1 Pētero 3:9

ꞌIna ko aŋa hai meꞌe rake-rake ki te nuꞌu aŋa atu i te meꞌe rake-rake, ꞌe ꞌina ko parauꞌino ki te nuꞌu parauꞌino atu. Te meꞌe o kōrua mo aŋa he ani ki te ꞌAtua mo haꞌamaitai i rā nuꞌu. Te ꞌAtua, paꞌi, i haꞌataꞌa ai i a kōrua māꞌana mo haꞌamaitai atu e ia.

1 Pētero 5:4

Pē ira, ꞌi te hora o te tuꞌu iŋa haka ꞌou mai o te Pūꞌoko Haka Tere o te ŋāŋata hāpaꞌo māmoe taꞌatoꞌa, he haka hei atu i a kōrua hai meꞌe ꞌina e ko ŋaro ki te hora hopeꞌa, ko te meꞌe ena: he noho mau rō ꞌai kōrua ꞌi muri i a ia ꞌi roto i tōꞌona nui-nui ꞌana-ꞌana.

Meꞌe Haka Takeꞌa 21:27

ꞌE ki te hora hopeꞌa ꞌina e tahi meꞌe taꞌe tano mo oꞌo ki ira. E ko oꞌo te kope haꞌamuri ki te ꞌītoro ꞌe te kope reo-reo. Te nuꞌu nō mo oꞌo he nuꞌu te rāua ꞌīŋoa e pāpaꞌi rō ꞌā ꞌi ruŋa i te puka era o te Māmoe, he puka ꞌi ruŋa i pāpaꞌi ai i te ꞌīŋoa o te nuꞌu i a rāua te ora ꞌāpī ꞌina he hopeꞌa raꞌa vaꞌai e te ꞌAtua.