Y-Yôhan 1:9 - Klei Aê Diê Blŭ 2015

⁹ Klei mngač anăn jing klei mngač sĭt, tơdah Ñu truh ti lăn ala, Ñu mtrang kơ grăp čô mnuih.

Y-Yôhan 1:9 Iomraidhean Croise

Y-Êsai 49:6

Ñu lač, “Jing klei điêt đei kơ ih jing dĭng buăl Kâo čiăng lŏ kơrŭ phung găp djuê Yakôp leh anăn čiăng lŏ mdơ̆ng phung Israel adôk. Kâo msĕ mơh srăng brei ih jing klei mngač kơ phung tue, čiăng kơ klei Kâo bi mtlaih dưi truh ti knhal lăn ala.”

Y-Êsai 8:20

Ksiêm bĕ klei mtô leh anăn klei hưn! Tơdah diñu amâo blŭ djŏ si klei blŭ anei, diñu amâo mâo klei mngač ôh.

Y-Mathiơ 6:23

Ƀiădah tơdah ală ih bum, jih asei mlei ih srăng bŏ hŏng klei mmăt. Tơdah klei mngač hlăm ih jing mmăt, klei mmăt anăn prŏng snăk yơh!”

Y-Luk 11:36

Tơdah kluôm asei mlei ih bŏ hŏng klei mngač, amâo mâo sa kdrêč mmăt ôh, ñu srăng mâo klei mngač kluôm msĕ si pui kđen mtrang klei mngač kơ ih.”

Y-Yôhan 1:4

Hlăm Ñu mâo klei hdĭp, leh anăn klei hdĭp anăn jing klei mngač kơ mnuih.

Y-Yôhan 1:7

Gơ̆ hriê leh čiăng hưn bi sĭt brei arăng thâo kral klei mngač, čiăng kơ jih jang mnuih dưi đăo.

Y-Yôhan 12:46

Kâo jing klei mngač hriê leh kơ lăn ala, čiăng kơ hlei pô đăo kơ Kâo amâo lŏ dôk hlăm klei mmăt ôh.

Y-Yôhan 14:6

Yêsu lač kơ gơ̆, “Kâo jing êlan, klei sĭt nik, leh anăn klei hdĭp; amâo mâo pô dưi nao kơ Ama, knŏng hŏng Kâo.

Y-Yôhan 15:1

Kâo jing ana boh kriăk ƀâo sĭt, leh anăn Ama Kâo jing pô pla.

Y-Yôhan 6:32

Leh anăn Yêsu lač kơ digơ̆, “Kâo lač kơ diih klei sĭt nik, amâo djŏ ôh Y-Môis brei leh kơ diih kpŭng mơ̆ng adiê; ƀiădah Ama Kâo brei kơ diih kpŭng sĭt mơ̆ng adiê.

Y-Yôhan 7:12

Lu phung ƀuôn sang blŭ mhač djŏ kơ Ñu. Êjai đa đa lač, “Ñu jing sa čô mnuih jăk,” phung mkăn lač, “Hơăi, ñu bi wơr êlan kơ phung ƀuôn sang.”

I Y-Yôhan 1:8

Tơdah drei lač drei amâo mâo klei soh ôh, drei mplư drei pô yơh, leh anăn klei sĭt nik amâo dôk hlăm drei ôh.

I Y-Yôhan 2:8

Ƀiădah ăt kâo čih kơ diih sa klei mtă mrâo, jing sĭt hlăm Ñu leh anăn hlăm diih, kyuadah klei mmăt dơ̆ng êgao tuč leh anăn klei mngač sĭt mtrang leh.

I Y-Yôhan 5:20

Leh anăn drei thâo kơ Anak Aê Diê truh leh, leh anăn brei leh kơ drei klei thâo săng čiăng thâo kral Pô sĭt nik; leh anăn drei dôk hlăm Pô sĭt nik, hlăm Anak Ñu Yêsu Krist. Ñu yơh jing Aê Diê sĭt nik leh anăn klei hdĭp hlŏng lar.