Y-Mika 7:9 - Klei Aê Diê Blŭ 2015

⁹ Kâo srăng tŭ klei Yêhôwa ăl, kyuadah kâo ngă soh leh hŏng Ñu, tơl Ñu blŭ mgang brei kđi kâo leh anăn phat brei kđi kâo. Ñu srăng atăt kâo kơ klei mngač, kâo srăng ƀuh klei Ñu kpă ênô.

Y-Mika 7:9 Iomraidhean Croise

II Y-Samuel 24:17

Leh anăn Y-Đawit blŭ kơ Yêhôwa tơdah ñu ƀuh dĭng buăl jăk pô dôk ngă kơ phung ƀuôn sang, leh anăn lač, “Nĕ anei, kâo ngă soh leh, leh anăn kâo ngă leh hŏng klei ƀai. Ƀiădah phung biăp anei, ya klei digơ̆ tuôm ngă lĕ? Kâo kwưh kơ Ih, brei kngan Ih ngă kơ kâo leh anăn kơ sang ama kâo.”

Y-Yôp 23:10

Ƀiădah Ñu thâo êlan kâo êbat; tơdah leh Ñu lông dlăng kâo, kâo srăng jing doh msĕ si mah.

Y-Yôp 35:14

Ƀai hĭn tơdah ih lač ih amâo ƀuh Ñu ôh, klei ih bi êdah kơ Ñu leh, leh anăn ih dôk guôn kơ Ñu!

Klei Mmuñ Hđăp 119:154

Mgang klei kâo, leh anăn bi tui kâo, bi mrâo klei hdĭp kâo tui si klei ƀuăn Ih.

Klei Mmuñ Hđăp 37:6

Ñu srăng bi êdah klei kpă ênô ih msĕ si klei mngač, leh anăn klei djŏ ih msĕ si yang hruê dơ̆ng.

Klei Mmuñ Hđăp 43:1

Ơ Aê Diê, phat bĕ kđi kâo, leh anăn mgang kâo mơ̆ng phung ƀuôn sang amâo mpŭ kơ Aê Diê ôh; bi mtlaih kâo mơ̆ng phung mplư leh anăn soh jhat.

Klei Mmuñ Hđăp 7:6

Ơ Yêhôwa, kgŭ bĕ Ih hlăm klei Ih ăl, kgŭ bĕ Ih bi blah hŏng klei ngêñ phung roh kâo; mdih bĕ Ih, Ơ Aê Diê kâo, leh anăn đru kâo đa; Ih mkra leh klei phat kđi.

Klei Mmuñ Hđăp 94:15

Kyuadah arăng srăng lŏ brei klei phat kđi kpă kơ phung kpă ênô; leh anăn jih jang phung mâo ai tiê kpă srăng tui hlue klei anăn.

Y-Êsai 42:16

Kâo srăng atăt phung bum ală ti êlan diñu amâo tuôm thâo kral ôh, Kâo srăng gai diñu hlăm êlan điêt diñu amâo thâo bĭt ôh. Kâo srăng bi mlih klei mmăt jing klei mngač ti anăp diñu, leh anăn anôk lăn ƀlŭng êhŭt jing lăn dap. Snăn yơh Kâo srăng ngă, leh anăn amâo lui diñu ôh.

Y-Êsai 42:7

čiăng mblang ală phung bum, čiăng bi kbiă phung mnă mơ̆ng ƀăng arăng krư̆, leh anăn čiăng bi êngiê mơ̆ng sang mnă phung dôk hlăm klei mmăt.

Y-Êsai 46:13

Kâo ba klei kpă ênô Kâo giăm, ñu amâo dôk kbưi ôh, leh anăn klei Kâo bi mtlaih amâo srăng dôk guôn sui ôh. Kâo srăng brei klei bi mtlaih hlăm ƀuôn Siôn, pioh klei guh kơang Kâo kơ phung Israel.”

Y-Êsai 51:22

Snei Khua Yang ih, Yêhôwa Aê Diê ih, Pô mgang klei phung ƀuôn sang Ñu, lač: “Nĕ anei, Kâo mă hĕ leh kčok klei êbat ting ring rang mơ̆ng kngan ih; ih amâo srăng lŏ mnăm ôh mtĭl klei Kâo ngêñ.

Y-Êsai 56:1

Snei Yêhôwa lač: “Djă pioh bĕ klei djŏ, leh anăn ngă bĕ klei kpă ênô, kyuadah klei Kâo bi mtlaih giăm truh leh, leh anăn klei kpă ênô Kâo srăng djăl bi êdah.

Y-Yêrêmi 10:19

Knap mñai yơh kơ kâo kyua anôk êka kâo! Anôk êka kâo amâo dưi hlao ôh. Ƀiădah kâo lač, “Anei yơh jing klei ruă kâo, leh anăn kâo gĭr tŭ klei anăn.”

Y-Yêrêmi 14:7

“Wăt tơdah klei wê hmei hưn bi kdơ̆ng hŏng hmei, ngă bĕ, Ơ Yêhôwa, kyua anăn Ih. Kyuadah klei hmei lui wir leh jing lu; hmei ngă soh hŏng Ih leh.

Y-Yêrêmi 51:10

‘Yêhôwa bi êdah leh klei drei jing kpă ênô; hriê bĕ, brei drei hưn hlăm ƀuôn Siôn bruă Yêhôwa Aê Diê drei ngă leh.’

Klei Čŏk Hia 1:18

“Yêhôwa jing kpă, bi kâo lĕ, kâo bi kdơ̆ng leh hŏng klei Ñu blŭ. Hmư̆ bĕ, Ơ jih jang diih phung ƀuôn sang, dlăng bĕ kơ klei knap mñai kâo; phung mniê êra hrông leh anăn phung êkei êdam kâo đuĕ nao jing mnă leh.

Bruă Lêwi 26:41

snăn Kâo êbat mdê hŏng klei diñu čiăng leh anăn atăt ba diñu kơ čar phung roh diñu; hlăk anăn tơdah ai tiê diñu amâo khăt klĭt ôh srăng luă gŭ leh anăn diñu tla nư klei wê diñu,

Y-Malaki 3:18

Leh anăn lŏ sa blư̆ diih srăng yap mdê phung kpă ênô hŏng phung ƀai, phung mă bruă kơ Aê Diê hŏng phung amâo mă bruă kơ Ñu ôh.”

I Kôrantô 4:5

Snăn đăm phat kđi arăng ôh êlâo hruê bi kčah, êlâo Khua Yang srăng truh. Ñu srăng bi mngač jih jang klei mdăp leh hlăm klei mmăt, leh anăn srăng bi êdah klei ai tiê arăng čuăn. Hlăk anăn grăp čô srăng mă tŭ klei Aê Diê bi mni năng kơ pô.

II Y-Timôthê 4:8

Mơ̆ng anei kơ anăp mâo đuôn mtao klei kpă ênô pioh leh kơ kâo. Khua Yang, khua phat kđi kpă, srăng brei đuôn anăn kơ kâo hlăm Hruê anăn, leh anăn amâo djŏ knŏng kơ kâo ôh, ƀiădah msĕ mơh wăt kơ jih jang phung khăp leh kơ klei Ñu srăng lŏ hriê.

Klei Bi Êdah 18:20

“Ơ adiê, hơ̆k mơak bĕ kyua ñu, Ơ phung doh jăk, phung khua ƀĭng kna, leh anăn phung khua pô hưn êlâo, kyuadah Aê Diê phat kđi ñu leh tui si bruă ñu ngă kơ diih!”

I Y-Samuel 24:15

Kyuanăn akâo kơ Yêhôwa jing khua phat kđi kâo hŏng ih, mĭn kơ klei anăn, blŭ mgang kâo, leh anăn bi mtlaih kâo mơ̆ng kngan ih.”

I Y-Samuel 25:39

Tơdah Y-Đawit hmư̆ kơ Y-Nabal djiê leh, ñu lač, “Mpŭ mni kơ Yêhôwa, Pô rŭ leh ênua kơ klei Y-Nabal mưč mač kơ kâo leh, leh anăn kơ̆ng leh dĭng buăl Ñu kơ klei ngă jhat. Yêhôwa bi wĭt leh klei ƀai Y-Nabal kơ boh kŏ ñu pô.” Leh anăn Y-Đawit tiŏ mnuih nao êmuh H'Abigêl čiăng brei gơ̆ jing mô̆ ñu.

I Y-Samuel 26:10

Leh anăn Y-Đawit lač, “Tui si Yêhôwa dôk hdĭp, Yêhôwa pô yơh srăng čăm ñu, amâodah hruê ñu djiê srăng truh, amâodah ñu srăng nao bi blah leh anăn rai tuč.

I Y-Samuel 3:18

Snăn Y-Samuel hưn jih leh anăn amâo mdăp kơ ñu ôh sa mta klei. Leh anăn Y-Hêli lač, “Ñu yơh jing Yêhôwa; brei Ñu ngă tui si klei Ñu mĭn jăk.”