Y-Mathiơ 23:11 - Klei Aê Diê Blŭ 2015

¹¹ Pô prŏng hĭn hlăm phung diih srăng jing dĭng buăl diih.

Y-Mathiơ 23:11 Iomraidhean Croise

Y-Mathiơ 23:10

Kăn brei arăng pia kơ diih khua rei, kyuadah diih mâo knŏng sa čô Khua, jing Krist.

Y-Markôs 9:35

Yêsu dôk gŭ leh anăn iêô phung pluh dua čô, leh anăn Ñu lač kơ digơ̆, “Tơdah sa čô čiăng jing pô tal sa, brei ñu jing ti tluôn hĭn kơ jih jang leh anăn jing dĭng buăl kơ jih jang.”

I Kôrantô 9:19

Kyuadah wăt tơdah kâo jing êngiê mơ̆ng jih jang mnuih, kâo mjing kâo pô hlŭn kơ jih jang čiăng kơ kâo dưi atăt lu hĭn mnuih kơ klei đăo.

II Kôrantô 11:23

Diñu jing phung dĭng buăl Krist mơ̆? Kâo jing dĭng buăl jăk hĭn — kâo blŭ msĕ si sa čô khŏ — kâo mă bruă lu hĭn. Arăng krư̆ kâo lu blư̆ hĭn. Arăng čăm kâo amâo thâo yap ôh, leh anăn jêñ jêñ kâo dôk giăm klei djiê.

II Kôrantô 4:5

Kyuadah hmei amâo mtô kơ hmei pô ôh, ƀiădah hmei mtô klei Yêsu Krist jing Khua Yang, leh anăn hmei pô jing dĭng buăl diih kyua Yêsu.

Galati 5:13

Ơ phung ayŏng adei, arăng iêô leh diih kơ klei êngiê, ƀiădah đăm yua ôh klei êngiê diih jing êlan brei klei ngă tui si kđeh, ƀiădah hlăm klei khăp brei diih jing dĭng buăl hdơ̆ng diih.