Y-Mathiơ 2:11 - Klei Aê Diê Blŭ 2015

¹¹ Digơ̆ mŭt hlăm sang leh anăn ƀuh hđeh điêt mbĭt hŏng amĭ Ñu, H'Mari. Digơ̆ buôn kkuh kơ hđeh điêt anăn. Leh anăn digơ̆ pŏk ngăn drăp digơ̆, leh anăn myơr kơ hđeh điêt anăn mah, mnơ̆ng ƀâo mngưi, leh anăn êa drao phĭ ƀâo mngưi.

Y-Mathiơ 2:11 Iomraidhean Croise

Klei Mphŭn Dơ̆ng 43:11

Y-Israel ama diñu lač, “Tơdah snăn, ngă bĕ snei: dưm hlăm kdô diih boh jăk hĭn mơ̆ng čar anei, leh anăn djă ba kơ pô anăn mnơ̆ng myơr êa ƀâo mngưi ƀiă, êa hnuê ƀiă, mnơ̆ng ƀơ̆ng jăk, êa drao phĭ, leh anăn boh amandê.

I Bruă Mtao 10:10

Leh anăn ñu brei kơ mtao sa êtuh dua pluh talăng mah, lu lĭn êa ƀâo mngưi, leh anăn boh tâo yuôm. Amâo lŏ tuôm mâo ôh klei êbeh dlai êa ƀâo mngưi msĕ si mtao mniê čar Sêba brei leh kơ mtao Salômôn.

I Bruă Mtao 10:2

Ñu truh ti ƀuôn Yêrusalem mbĭt hŏng phung dĭng buăl lu, mbĭt hŏng lu aseh samô mdiăng êa ƀâo mngưi, mah lu snăk, leh anăn boh tâo yuôm. Tơdah ñu truh kơ Y-Salômôn, ñu hưn kơ gơ̆ jih klei mĭn ñu.

Klei Mmuñ Hđăp 2:12

Čŭm Anak huĭdah Ñu ăl, leh anăn diih rai luč hlăm êlan diih, kyuadah klei Ñu ngêñ srăng djăl đĭ. Jăk mơak yơh jih jang phung kđap hlăm Ñu.

Klei Mmuñ Hđăp 45:8

Jih jang čhiăm ao ih bi ƀâo mngưi hŏng êa mir, alôê, leh anăn kas; klei arăng pĕ đĭng brô̆ bi mơak kơ ih hlăm sang mtao ngă hŏng mla.

Klei Mmuñ Hđăp 72:10

Brei phung mtao čar Tarsis leh anăn phung plao êa ksĭ tuh jia kơ ñu, brei phung mtao Sahêba leh anăn Sêba myơr mnơ̆ng kơ ñu.

Klei Mmuñ Hđăp 72:15

Brei ñu dôk hdĭp sui, brei arăng myơr kơ mtao mah mơ̆ng čar Sahêba. Brei arăng wah lač kyua mtao nanao, leh anăn brei arăng akâo klei jăk jĭn truh kơ ñu jih hruê.

Klei Mmuñ Hđăp 95:6

Bơ drei buôn leh anăn kkuh mpŭ; brei drei čuôn kơŭt ti anăp Yêhôwa, Pô hrih drei.

Klei Kbiă 30:23

“Mă bĕ mnơ̆ng ƀâo mngưi jăk hĭn: êma êtuh sêkel êa drao phĭ mơêa, dua êtuh êma pluh sêkel, čiăng lač sa mkrah anăn, sinamôn ƀâo mngưi, leh anăn dua êtuh êma pluh sêkel mbô ƀâo mngưi,

Klei Kbiă 30:34

Yêhôwa lač kơ Y-Môis, “Mă bĕ mnơ̆ng ƀâo mngưi stakê, ônika, galbanum, mnơ̆ng ƀâo mngưi mmih leh anăn doh (grăp mta srăng mkă hnơ̆ng msĕ).

Klei Mmuñ Siam Hĭn 3:6

Hlei pô anăn kbiă hriê mơ̆ng kdrăn tač, msĕ si kmeh săp pui, mâo mnâo lu mnơ̆ng ƀâo mngưi, mâo wăt jih kpŭng ƀâo mngưi phung čhĭ mnia?

Y-Êsai 60:6

Lu aseh samô srăng guôm lăn čar ih, lu êđai aseh samô mơ̆ng čar Madian leh anăn čar Êpha; jih jang aseh samô mơ̆ng čar Sêba srăng hriê. Diñu srăng mdiăng ba mah leh anăn mnơ̆ng ƀâo mngưi, leh anăn srăng myơr klei bi mni kơ Yêhôwa.

Bruă Lêwi 6:15

Sa khua ngă yang čô srăng mă sa kpăt kpŭng ƀhĭ mơ̆ng mnơ̆ng myơr kpŭng ƀhĭ mbĭt hŏng êa boh ôliwơ gơ̆ wăt jih jang mnơ̆ng ƀâo mngưi arăng dưm ti mnơ̆ng myơr kpŭng ƀhĭ, leh anăn čuh mnơ̆ng anăn ti dlông knưl, jing kdrêč bi hdơr, mnâo ƀâo mngưi kơ Yêhôwa.

Y-Malaki 1:11

Kyuadah mơ̆ng anôk yang hruê ƀlĕ truh ti anôk yang hruê lĕ, anăn Kâo jing prŏng ti krah phung găp djuê mnuih, leh anăn hlăm jih jang anôk arăng myơr mnơ̆ng ƀâo mngưi leh anăn mnơ̆ng myơr doh kơ anăn Kâo, kyuadah anăn Kâo jing prŏng ti krah phung găp djuê mnuih,” Yêhôwa kơ phung kahan lač.

Klei Yap 7:14

sa boh jam mah boh ktrŏ gơ̆ pluh sêkel bŏ hŏng mnơ̆ng ƀâo mngưi;

Klei Yap 7:86

pluh dua boh jam mah bŏ hŏng mnơ̆ng ƀâo mngưi, boh ktrŏ grăp boh jam pluh sêkel tui si sêkel hlăm adŭ doh jăk, boh ktrŏ jih jang jam mah mâo sa êtuh dua pluh sêkel;

Y-Mathiơ 1:18

Nĕ snei klei arăng kkiêng kơ Yêsu Krist. Amĭ Ñu H'Mari bi čuôp leh hŏng Y-Yôsep, êlâo kơ diñu bi dôk mbĭt, H'Mari ƀuh ñu pô dơ̆ng tian leh hŏng Yang Mngăt Jăk.

Y-Mathiơ 12:46

Êjai Yêsu ăt dôk blŭ kơ phung ƀuôn sang, amĭ Ñu leh anăn phung ayŏng adei Ñu dôk ti tač akâo blŭ hrăm hŏng Ñu.

Y-Mathiơ 14:33

Phung dôk hlăm čhŏng buôn kkuh kơ Ñu, lač, “Sĭt nik, Ih jing Anak Aê Diê.”

Y-Mathiơ 2:2

“Ti anôk mtao Yuđa mrâo kkiêng? Kyuadah hmei ƀuh leh mtŭ Ñu ti ngŏ, leh anăn hmei hriê čiăng kkuh mpŭ kơ Ñu.”

Y-Luk 2:16

Diñu nao hŏng klei ruăt, ƀuh H'Mari, Y-Yôsep leh anăn anak điêt dôk đih hlăm kniêm rơ̆k čiêm êmô biăp.

Y-Luk 2:38

Mông anăn ñu truh, bi mni kơ Aê Diê, leh anăn blŭ klei djŏ kơ Yêsu kơ jih jang phung dôk čang hmăng klei bi êngiê ƀuôn Yêrusalem.

Y-Yôhan 19:39

Msĕ mơh Y-Nikôdem, pô mphŭn dô nao kơ Yêsu êjai mlam, hriê djă ba hlăm brô tlâo pluh kilô êa drao phĭ ƀâo mngưi bi lŭk hŏng êa drao alôê.

Klei Bi Êdah 19:10

Kâo buôn ti jơ̆ng ñu čiăng kkuh mpŭ kơ ñu, ƀiădah ñu lač kơ kâo, “Đăm ngă snăn ôh! Kâo jing dĭng buăl mă bruă mbĭt hŏng ih leh anăn hŏng phung ayŏng adei ih djă pioh klei Yêsu hưn. Kkuh mpŭ bĕ kơ Aê Diê.” Kyuadah klei Yêsu hưn jing mngăt klei hưn êlâo.

Klei Bi Êdah 5:8

Tơdah leh Ñu mă hdruôm hră klĭt anăn, pă drei mnơ̆ng hdĭp leh anăn phung dua pluh pă čô khua mduôn buôn ti anăp Êđai Biăp, grăp čô djă sa ƀĕ brô̆, leh anăn mâo êlŭ mah bŏ hŏng mnâo ƀâo mngưi, jing klei phung doh jăk wah lač.

I Y-Samuel 10:27

Ƀiădah mâo phung mnuih tă tăn lač, “Si pô anei dưi bi mtlaih drei?” Leh anăn diñu bi êmut kơ Y-Sôl leh anăn amâo djă ba mnơ̆ng myơr kơ gơ̆ ôh. Ƀiădah Y-Sôl dôk ñăt.