Y-Đaniel 12:4 - Klei Aê Diê Blŭ 2015

⁴ Ƀiădah bi ih, Ơ Y-Đaniel, kđăl leh anăn kđăm hĕ hdruôm hră anei tơl ênuk knhal tuč; lu mnuih srăng hiu ti anei tinăn leh anăn klei thâo săng srăng đĭ hĭn.”

Y-Đaniel 12:4 Iomraidhean Croise

Y-Êsai 11:9

Diñu amâo srăng ngă jhat ôh, kăn bi rai rei hlăm jih čư̆ doh jăk Kâo, kyuadah lăn ala srăng bŏ hŏng klei thâo kral Yêhôwa msĕ si êa guôm êa ksĭ.

Y-Êsai 29:11

Jih jang klei diih bi ƀuh anei jing msĕ si boh blŭ hlăm sa pŏk hdruôm hră arăng kđăm leh. Tơdah arăng brei hdruôm hră anăn kơ sa čô mnuih thâo dlăng hră leh anăn lač, “Dlăng bĕ klei anei”; snăn gơ̆ lŏ wĭt lač, “Kâo amâo dưi ôh, kyuadah arăng kđăm ñu leh.”

Y-Êsai 30:26

Wăt klei mngač mlan srăng jing msĕ si klei mngač yang hruê, leh anăn klei mngač yang hruê srăng jing kjuh blư̆ ktang hĭn, msĕ si klei mngač kjuh hruê, hlăm hruê Yêhôwa srăng guôm hĕ anôk êka phung ƀuôn sang Ñu, leh anăn bi hlao anôk Ñu čăm bi êka leh.

Y-Êsai 32:3

Hlăk anăn ală phung thâo ƀuh amâo srăng pĭt hĕ ôh, leh anăn knga phung thâo hmư̆ srăng mđing.

Y-Êsai 8:16

Klĭt hĕ klei hưn, kđăm hĕ klei mtô ti krah phung ƀĭng kna kâo.

Y-Yêrêmi 5:1

“Êran tinei tinăn hlăm êlan prŏng ƀuôn Yêrusalem, leh anăn ksiêm dlăng bĕ! Ksiêm dlăng bĕ hlăm wăl ñu, tơdah ih ƀuh mâo sa čô mnuih ngă klei kpă leh anăn duah klei sĭt nik, čiăng kơ Kâo dưi pap kơ ƀuôn Yêrusalem.

Y-Đaniel 10:1

Thŭn tal tlâo Y-Sirus jing mtao čar Persơ, mâo sa klei bi êdah kơ Y-Đaniel, lŏ bi anăn Y-Beltisasar. Klei anăn sĭt nik leh anăn hưn kơ klei bi blah prŏng. Ñu thâo săng klei blŭ leh anăn klei bi ƀuh anăn.

Y-Đaniel 10:14

Ară anei kâo hriê čiăng brei ih thâo săng klei srăng truh kơ phung ƀuôn sang ih hlăm ênuk knhal tuč, kyuadah klei bi ƀuh djŏ kơ ênuk êdei.”

Y-Đaniel 10:21

Ƀiădah kâo srăng hưn kơ ih klei arăng čih leh hlăm hdruôm hră klei sĭt nik. Amâo mâo pô đru kâo bi kdơ̆ng hŏng phung anăn ôh, knŏng hjăn Y-Mikel, khua ih.”

Y-Đaniel 11:33

Leh anăn phung thâo mĭn hlăm phung ƀuôn sang srăng brei phung lu thâo săng wăt tơdah digơ̆ srăng êbuh hŏng đao gưm, hŏng êlah pui, hŏng klei jing mnă, leh anăn hŏng klei arăng plah mă êjai bhiâo.

Y-Đaniel 11:40

Ti ênuk knhal tuč mtao čar Dhŭng srăng bi kdơ̆ng hŏng ñu, leh anăn mtao čar Dưr srăng nao bi kdơ̆ng hŏng ñu msĕ si angĭn đrŭng, hŏng êdeh aseh, phung đĭ aseh, leh anăn hŏng lu kŭmpăn; ñu srăng mŭt, lip, leh anăn găn lu boh čar.

Y-Đaniel 12:13

Ƀiădah nao bĕ ih tơl truh ênuk knhal tuč; leh anăn ih srăng djiê, ƀiădah ti ênuk knhal tuč ih srăng kbiă lŏ hdĭp čiăng mă tŭ ngăn dưn pioh kơ ih.”

Y-Đaniel 12:5

Leh klei anăn, kâo gơ̆ Y-Đaniel dlăng, leh anăn nĕ anei, dua čô mkăn dôk dơ̆ng, sa čô nah anei hang êa krông, sa čô mkăn nah dih hang êa krông.

Y-Đaniel 12:9

Ñu lač, “Nao bĕ, Ơ Y-Đaniel, kyuadah klei blŭ anei kđăl leh anăn kđăm leh tơl ênuk knhal tuč.

Y-Đaniel 8:17

Snăn gơ̆ hriê giăm anôk kâo dôk dơ̆ng. Tơdah gơ̆ truh, kâo huĭ leh anăn buôn kŭp ti lăn. Ƀiădah gơ̆ lač kơ kâo, “Brei ih thâo săng, Ơ anak mnuih, klei bi ƀuh anăn djŏ kơ ênuk knhal tuč.”

Y-Đaniel 8:19

Ñu lač, “Nĕ anei, kâo srăng brei ih thâo ya klei srăng truh ti knhal tuč klei ngêñ, kyuadah klei anăn djŏ kơ ênuk knhal tuč bi kčah leh.

Y-Đaniel 8:26

Klei bi ƀuh kơ lu tlam leh anăn lu aguah arăng hưn leh jing sĭt nik; ƀiădah brei ih kđăl kđăm hĕ klei bi ƀuh anei, kyuadah ñu djŏ kơ ênuk êdei.”

Y-Mathiơ 24:14

Leh anăn arăng srăng mtô klei mrâo mrang jăk kơ ƀuôn ala mtao anei tar ƀar lăn ala jing klei hưn kơ jih jang găp djuê mnuih. Hlăk anăn hruê knhal tuč srăng truh.”

Hră Y-Pôl Mơĭt kơ Phung Rôm 10:18

Ƀiădah kâo êmuh, diñu amâo tuôm hmư̆ hĕ? Sĭt nik diñu hmư̆ leh! Kyuadah “Asăp diñu arăng hmư̆ leh tar ƀar lăn ala, leh anăn klei diñu blŭ truh leh ti knhal lăn ala.”

Klei Bi Êdah 10:4

Tơdah kjuh grăm anăn đah leh, kâo dơ̆ng čih, ƀiădah kâo hmư̆ asăp mơ̆ng adiê lač, “Kđăm hĕ klei kjuh grăm anăn lač leh; đăm čih klei anăn ôh.”

Klei Bi Êdah 22:10

Leh anăn ñu lač kơ kâo, “Đăm kđăm ôh klei blŭ hưn êlâo hlăm hdruôm hră anei, kyuadah mông giăm truh leh.

Klei Bi Êdah 5:1

Leh klei anăn kâo ƀuh hlăm kngan hnuă Pô dôk ti jhưng mtao sa pŏk hdruôm hră klĭt čih leh hlăm lam leh anăn ti êngao, arăng kđăm leh hŏng kjuh mnơ̆ng kđăm.