Y-Đaniel 11:4 - Klei Aê Diê Blŭ 2015

⁴ Tơdah gơ̆ hriê kơ prŏng leh, ƀuôn ala mtao gơ̆ srăng mčah leh anăn bi mbha phă pă bĭt angĭn hlăm adiê, ƀiădah amâo djŏ kơ phung anak čô gơ̆ ôh, kăn djŏ tui si klei dưi gơ̆ kiă kriê rei; kyuadah arăng srăng buč ƀuôn ala mtao gơ̆ leh anăn bi mbha kơ phung mkăn.

Y-Đaniel 11:4 Iomraidhean Croise

Klei Mmuñ Hđăp 39:6

Sĭt nik mnuih hiu êbat msĕ si êyui! Ñu mă bruă dleh dlan luč hơăi mang; ñu mkăm klei mdrŏng leh anăn amâo thâo hlei srăng dưn mă.

Khua Pô Mtô 4:8

sa čô mnuih asei hjăn, kăn mâo anak êkei leh anăn ayŏng adei rei, ƀiădah klei suăi ñu amâo mâo knhal ôh, leh anăn ală ñu amâo tuôm hrăp ôh hŏng klei mdrŏng sah, tơl ñu êmuh, “Kơ hlei pô kâo mă bruă suăi, leh anăn bi mkhư̆ klei bi mơak kơ kâo pô?” Klei anăn msĕ mơh jing klei hơăi mang leh anăn bruă amâo mâo mơak ôh.

Y-Yêrêmi 12:15

Tơdah leh Kâo buč hĕ diñu, Kâo srăng lŏ pap kơ diñu, leh anăn lŏ atăt grăp čô kơ ngăn dưn diñu leh anăn kơ čar diñu pô.

Y-Yêrêmi 12:17

Ƀiădah tơdah sa găp djuê mnuih amâo dôk hmư̆ ôh, snăn Kâo srăng buč bi rai hĕ diñu jih nguêč,” Yêhôwa lač.

Y-Yêrêmi 18:7

Tơdah Kâo hưn klei djŏ kơ sa găp djuê amâodah kơ sa boh ƀuôn ala mtao klei Kâo srăng buč hĕ leh anăn bi klưh leh anăn bi rai hĕ gơ̆,

Y-Yêrêmi 31:40

Kluôm jih tlung atâo leh anăn hbâo, wăt jih jang hma kbưi hĭn hlue êa hnoh Kidrôn, truh kơ kiêng Ƀăng Jang Aseh phă ngŏ, srăng jing anôk pioh brei kơ Yêhôwa. Hlŏng lar arăng amâo srăng lŏ buč ñu ôh kăn srăng lŏ mdlưh ñu rei.”

Y-Yêrêmi 45:4

Yêhôwa lač, “Snei brei ih lač kơ ñu, ‘Nĕ anei, ya Kâo mdơ̆ng leh Kâo bi klưh hĕ gơ̆, leh anăn ya dŏ Kâo pla leh Kâo buč hĕ gơ̆ hlăm jih čar.

Y-Yêrêmi 49:36

leh anăn Kâo srăng bi truh kơ čar Êlam pă mta angĭn mơ̆ng pă kiêng adiê; leh anăn Kâo srăng prah prŭng diñu kơ pă mta angĭn anăn, leh anăn phung Êlam Kâo suôt leh srăng truh kơ grăp găp djuê mnuih.

Y-Êsêkiêl 37:9

Hlăk anăn Yêhôwa lač kơ kâo, “Hưn êlâo bĕ kơ klei bi êwa, hưn êlâo bĕ, Ơ anak mnuih, leh anăn lač kơ klei bi êwa, ‘Snei Yêhôwa Aê Diê lač: Hriê bĕ, Ơ êwa mơ̆ng pă bĭt angĭn leh anăn thut bĕ kơ phung djiê anei, čiăng kơ diñu dưi lŏ hdĭp.’ ”

Y-Đaniel 7:2

Y-Đaniel lač, “Êjai mlam kâo ƀuh hlăm klei bi ƀuh kâo snei: pă mta angĭn mơ̆ng adiê thut ti dlông êa ksĭ prŏng.

Y-Đaniel 7:6

Êdei tinăn kâo dlăng leh anăn nĕ anei, mâo sa drei hlô dliê mkăn jing msĕ si êmông brêč; ti rŏng mâo pă pŏk siap čĭm. Hlô dliê anăn mâo pă boh kŏ; leh anăn arăng brei klei dưi kiă kriê kơ ñu.

Y-Đaniel 7:8

Êjai kâo ksiêm phung ki anăn, nĕ anei mâo sa ƀĕ ki điêt mkăn čăt ti krah phung ki anăn, leh anăn arăng buč hĕ tlâo ƀĕ ki hlăm phung ki mâo êlâo ti anăp ki điêt anăn. Nĕ anei, ki anăn mâo ală msĕ si ală mnuih leh anăn ƀăng êgei blŭ hŏng klei mgao.

Y-Đaniel 8:22

Bi kơ ki joh leh, mâo pă ƀĕ ki mkăn čăt hrô ñu bi hmô hŏng pă boh ƀuôn ala mtao kbiă mơ̆ng phung găp djuê ñu anăn, ƀiădah amâo mâo klei ktang msĕ si ñu ôh.

Y-Đaniel 8:8

Leh anăn bê knô bi mđĭ ñu pô lu snăk. Ƀiădah tơdah ñu jing ktang leh, ki prŏng anăn joh hĕ. Hrô ki joh anăn mâo pă ƀĕ ki prŏng mkăn čăt phă pă bĭt angĭn hlăm adiê.

Y-Sakari 2:6

“Hơi! Hơi! Đuĕ bĕ mơ̆ng čar dưr,” Yêhôwa lač, “kyuadah Kâo prah prŭng diih leh msĕ si pă angĭn hlăm adiê,” Yêhôwa lač.

Y-Sakari 6:5

Dĭng buăl jăk lŏ wĭt lač kơ kâo, “Phung anei jing pă čô mngăt myang hlăm adiê kbiă nao mơ̆ng anôk diñu dôk dơ̆ng ti anăp Yêhôwa kơ jih lăn ala.

Y-Mathiơ 12:25

Yêsu thâo klei mĭn diñu leh anăn lač kơ diñu, “Tơdah sa boh ƀuôn ala mtao bi mbha hĕ ñu pô, srăng rai tuč yơh, leh anăn sa boh ƀuôn amâodah sa boh sang bi mbha hĕ ñu pô, amâo srăng dưi dôk ôh.

Y-Luk 12:20

Ƀiădah Aê Diê lač kơ ñu, ‘Ơ mnuih mluk! Mlam anei Aê Diê srăng sua mă mngăt ih. Leh anăn mnơ̆ng ih mkra leh, hlei pô srăng dưn lĕ?’

Klei Bi Êdah 7:1

Leh klei anăn kâo ƀuh pă čô dĭng buăl jăk dôk dơ̆ng ti pă bĭt kiêng lăn ala. Diñu kơ̆ng hĕ pă angĭn ti lăn ala, čiăng đăm mâo ôh angĭn dưi thut ti lăn ala, ti êa ksĭ, amâodah ti ana kyâo.