Klei Yap 23:21 - Klei Aê Diê Blŭ 2015

²¹ Ñu amâo ƀuh ôh klei dleh hlăm phung Yakôp; kăn Ñu ƀuh klei rŭng răng rei hlăm phung Israel. Yêhôwa Aê Diê diñu dôk mbĭt hŏng diñu, leh anăn klei mtao driâo hơ̆k dôk ti krah diñu.

Klei Yap 23:21 Iomraidhean Croise

II Klei Yăl Dliê 13:12

Nĕ anei, Aê Diê dôk mbĭt hŏng hmei jing khua hmei, leh anăn phung khua ngă yang Ñu djă ki klei bi blah čiăng ayŭ mtrŭt kơ klei bi blah hŏng diih. Ơ phung anak êkei Israel, đăm bi blah hŏng Yêhôwa Aê Diê phung aê diih ôh, kyuadah diih amâo srăng dưi ôh.”

Klei Mmuñ Hđăp 103:12

Msĕ si ngŏ kbưi mơ̆ng yŭ, snăn mơh Ñu bi kbưi klei soh drei mơ̆ng drei.

Klei Mmuñ Hđăp 118:15

Asăp klei hơ̆k mơak klei bi mtlaih arăng hmư̆ hlăm sang čhiăm phung kpă ênô, kngan hnuă Yêhôwa ngă leh hŏng klei myang.

Klei Mmuñ Hđăp 135:21

Mpŭ mni bĕ kơ Yêhôwa mơ̆ng ƀuôn Siôn, kơ Pô dôk ti ƀuôn Yêrusalem. Bi mni kơ Yêhôwa.

Klei Mmuñ Hđăp 23:4

Wăt tơdah kâo êbat hlăm troh êyui klei djiê, kâo amâo srăng huĭ kơ sa mta klei jhat ôh; kyuadah Ih dôk mbĭt hŏng kâo; giê dra leh anăn giê knuăk Ih bi juh kâo.

Klei Mmuñ Hđăp 32:2

Jăk mơak yơh mnuih Yêhôwa amâo yap ôh klei wê ñu, leh anăn pô amâo ngă klei mplư ôh.

Klei Mmuñ Hđăp 32:5

Snăn kâo hưn klei soh kâo kơ Ih, kâo amâo mdăp klei wê kâo ôh; kâo lač, “Kâo srăng hưn klei kâo gao klei bhiăn kơ Yêhôwa”; hlăk anăn Ih pap brei klei kâo jing soh. (Sêla)

Klei Mmuñ Hđăp 46:11

Yêhôwa kơ phung kahan dôk mbĭt hŏng hmei; Aê Diê Y-Yakôp jing anôk hmei đuĕ dăp. (Sêla)

Klei Mmuñ Hđăp 46:7

Yêhôwa kơ phung kahan dôk mbĭt hŏng hmei; Aê Diê Y-Yakôp jing anôk hmei đuĕ dăp. (Sêla)

Klei Mmuñ Hđăp 97:1

Yêhôwa kiă kriê, brei lăn ala mâo klei hơ̆k mơak; brei phung čar ti hang êa ksĭ mâo klei mơak.

Klei Mmuñ Hđăp 99:2

Yêhôwa jing prŏng hlăm ƀuôn Siôn, leh anăn arăng mpŭ Ñu ti dlông jih jang phung ƀuôn sang.

Klei Kbiă 13:21

Yêhôwa nao êlâo ti anăp diñu êjai hruê hlăm sa ƀĕ kmeh knam, čiăng atăt diñu ktuê êlan, leh anăn êjai mlam hlăm sa ƀĕ kmeh pui, čiăng bi mngač diñu, čiăng kơ diñu dưi êbat êjai hruê wăt mlam.

Klei Kbiă 3:12

Aê Diê lač, “Kâo srăng dôk mbĭt hŏng ih, leh anăn anei klei bi knăl kơ ih Kâo jing Pô tiŏ nao ih: leh ih atăt ba phung ƀuôn sang kbiă mơ̆ng čar Êjip, diih srăng kkluh mpŭ kơ Aê Diê ti dlông čư̆ anei.”

Klei Kbiă 34:9

Ñu lač, “Ơ Khua Yang, ară anei tơdah kâo mâo leh klei pap ti anăp ală ih, kâo akâo kơ ih brei Khua Yang nao ti krah phung hmei, wăt tơdah diñu jing phung ƀuôn sang khăng kŏ dưn; leh anăn pap brei kơ klei wê leh anăn klei soh hmei, leh anăn brei hmei jing ngăn dưn ih.”

Y-Êsai 1:18

Yêhôwa lač, “Hriê bĕ, brei drei ksiêm mđrăm mbĭt. Wăt tơdah klei soh diih jing hrah huč, diñu srăng jing kô̆ msĕ si pliêr; wăt tơdah diñu jing hrah jŭ, diñu srăng jing kô̆ msĕ si mlâo biăp.

Y-Êsai 12:6

Ur kraih leh anăn ur hơ̆k bĕ, Ơ phung dôk hlăm ƀuôn Siôn, kyuadah Pô Doh Jăk Israel jing prŏng ti krah diih.”

Y-Êsai 33:21

Ƀiădah tinăn Yêhôwa srăng dôk mbĭt hŏng drei hŏng klei kdrăm, jing anôk lu êa krông ƀai leh anăn êa hnoh. Tinăn kŭmpăn arăng wah amâo dưi mŭt ôh, leh anăn kŭmpăn prŏng kăn dưi găn rei.

Y-Êsai 33:22

Kyuadah Yêhôwa jing khua phat kđi drei, Yêhôwa jing Pô brei klei bhiăn kơ drei, Yêhôwa jing mtao drei, Ñu pô yơh srăng bi mtlaih drei.

Y-Êsai 38:17

Nĕ anei, kâo mâo leh klei ênguôt čiăng bi truh klei jăk kơ kâo; klei khăp Ih mgang klei hdĭp kâo mơ̆ng ƀăng klei bi rai, kyuadah Ih dlăm leh jih jang klei soh kâo ti tluôn Ih.

Y-Êsai 41:10

Đăm huĭ ôh, kyuadah Kâo dôk mbĭt hŏng diih. Đăm êdu ai ôh, kyuadah Kâo jing Aê Diê diih. Kâo srăng bi ktang diih, Kâo srăng đru diih. Kâo srăng krơ̆ng diih hŏng kngan hnuă kpă ênô Kâo.

Y-Êsai 8:10

Bi trông čhai bĕ hdơ̆ng diih, ƀiădah klei anăn srăng jing hơăi mang. Mkra hdră ngă, ƀiădah klei anăn amâo srăng dôk kjăp ôh, kyuadah Aê Diê dôk mbĭt hŏng drei.

Y-Yêrêmi 50:20

Hlăm hruê anăn leh anăn hlăm ênuk anăn,” Yêhôwa lač, “arăng srăng duah klei wê hlăm phung Israel, ƀiădah amâo srăng ƀuh ôh; arăng srăng duah klei soh hlăm phung Yuđa, ƀiădah amâo srăng ƀuh ôh; kyuadah Kâo srăng pap brei kơ phung Kâo pioh ăt dôk.”

Y-Êsêkiêl 48:35

Jŭm dar ƀuôn srăng mâo pluh sa păn êbâo heh. Anăn ƀuôn mơ̆ng anei kơ anăp srăng jing: “Yêhôwa Dôk Ti Anăn.”

Y-Yôel 2:27

Hlăk anăn diih srăng thâo Kâo dôk ti krah phung Israel, leh anăn Kâo, Yêhôwa, jing Aê Diê diih, leh anăn amâo lŏ mâo pô mkăn ôh. Leh anăn arăng amâo srăng lŏ bi hêñ ôh phung ƀuôn sang Kâo.

Bruă Lêwi 9:24

Pui kbiă mơ̆ng anăp Yêhôwa leh anăn ƀơ̆ng mnơ̆ng myơr čuh leh anăn prăi ti dlông knưl. Tơdah jih jang phung ƀuôn sang ƀuh klei anăn, diñu ur hơ̆k leh anăn buôn kŭp ƀô̆ ti lăn.

Klei Yap 14:18

‘Yêhôwa amâo djăl ăl ôh, leh anăn mdrŏng hŏng klei khăp sĭt suôr, pap brei klei wê leh anăn klei gao klei bhiăn, ƀiădah hơăi Ñu amâo yap kpă ôh pô soh leh, leh anăn bi lĕ klei wê phung ama kơ phung anak tơl truh ti ênuk tal tlâo leh anăn tal pă.’

Klei Yap 14:19

Pap brei kơ klei wê phung ƀuôn sang anei, kâo kwưh kơ Ih, tui si klei prŏng klei Ih khăp sĭt suôr, leh anăn tui si klei Ih pap brei leh kơ phung ƀuôn sang anei mơ̆ng čar Êjip truh kơ ară anei.”

Klei Yap 16:3

Diñu bi kƀĭn mbĭt bi kdơ̆ng hŏng Y-Môis leh anăn Y-Arôn leh anăn lač kơ digơ̆, “Diih ngă leh êbeh đei! Kyuadah jih jang phung bi kƀĭn jing doh jăk, grăp čô diñu, leh anăn Yêhôwa dôk ti krah diñu. Snăn si ngă diih bi mđĭ diih pô ti dlông hĭn kơ phung ƀuôn sang Yêhôwa bi kƀĭn?”

Klei Yap 9:22

Thâodah knam ăt dôk ti dlông sang čhiăm dua hruê amâodah sa mlan, amâodah sui hĭn ăt dôk tinăn, phung ƀuôn sang Israel dôk jưh leh anăn amâo đuĕ nao ôh; ƀiădah tơdah knam đĭ kơ dlông diñu đuĕ nao yơh.

Y-Mathiơ 1:23

“Nĕ anei, sa čô mniê êra hrông srăng kkiêng kơ sa čô anak êkei, leh anăn arăng srăng bi anăn gơ̆ Êmanuel,” čiăng lač, “Aê Diê dôk mbĭt hŏng drei.”

Hră Y-Pôl Mơĭt kơ Phung Rôm 6:14

Klei soh amâo srăng jing khua diih ôh, kyuadah diih amâo dôk ti gŭ klei bhiăn ôh, ƀiădah ti gŭ klei pap.

Hră Y-Pôl Mơĭt kơ Phung Rôm 8:1

Kyuanăn ară anei hin amâo lŏ mâo klei bi kmhal ôh kơ phung dôk hlăm Krist Yêsu.

II Kôrantô 2:14

Ƀiădah bi mni kơ Aê Diê, Pô atăt hmei dưi nanao hlăm Yang Krist, leh anăn kyua hmei Ñu rah mnâo ƀâo mngưi mơ̆ng klei thâo kral Ñu tar ƀar.

II Kôrantô 5:19

Čiăng lač, Aê Diê dôk leh hlăm Krist bi grăng lăn ala hŏng Ñu pô, amâo yap ôh klei soh čiăng bi kmhal digơ̆, leh anăn jao kơ hmei klei mtô kơ klei bi grăng.

II Kôrantô 6:16

Ya klei bi mguôp sang kkuh mpŭ Aê Diê dưi mâo hŏng rup yang? Kyuadah drei jing sang kkuh mpŭ kơ Aê Diê hdĭp, tui si Aê Diê lač leh, “Kâo srăng dôk hlăm diñu leh anăn êbat ti krah diñu, leh anăn Kâo srăng jing Aê Diê diñu, leh anăn diñu srăng jing phung ƀuôn sang Kâo.

Klei Mtô Mñă Klei Bhiăn 31:23

Yêhôwa jao bruă kơ Y-Yôsuê anak êkei Y-Nun, lač, “Brei jing ktang leh anăn mđĭ ai bĕ; kyuadah ih srăng atăt ba phung anak Israel mŭt hlăm čar Kâo kat asei leh čiăng brei kơ diñu; Kâo srăng dôk mbĭt hŏng ih.”

Klei Mtô Mñă Klei Bhiăn 32:5

Diñu ngă hŏng Gơ̆ klei soh jhat êdi, diñu amâo lŏ jing phung anak Gơ̆ ôh kyua klei hêñ diñu; diñu jing phung găp djuê soh leh anăn wê.

Klei Mtô Mñă Klei Bhiăn 33:5

Snăn Yêhôwa jing leh mtao hlăm Yêsurun êjai phung khua phung ƀuôn sang bi kƀĭn leh, jih jang phung găp djuê Israel mbĭt.

Klei Mtô Mñă Klei Bhiăn 9:24

Diih jing phung kreh bi kdơ̆ng hŏng Yêhôwa dơ̆ng mơ̆ng hruê Ñu thâo kral diih.

Phung Khua Phat Kđi 6:13

Y-Gidêôn lŏ wĭt lač kơ ñu, “Ơ khua, tơdah Yêhôwa dôk mbĭt hŏng hmei, si ngă jih jang klei anei truh hĕ kơ hmei? Leh anăn ti lei jih jang klei yuôm bhăn Ñu ngă phung aê hmei đưm, yăl dliê leh kơ hmei, lač, ‘Amâo djŏ hĕ Yêhôwa atăt hmei kbiă mơ̆ng čar Êjip?’ Ƀiădah ară anei Yêhôwa lui hĕ hmei, leh anăn jao hmei hlăm kngan phung Madian.”

I Y-Samuel 25:28

Kâo akâo kơ ih, pap brei klei soh dĭng buăl mniê ih; kyuadah sĭt nik Yêhôwa srăng bi kjăp sang khua kâo, kyuadah khua kâo dôk bi blah kơ Yêhôwa; leh anăn arăng amâo srăng ƀuh ôh klei jhat hlăm ih hlăm jih klei hdĭp ih.