Klei Yap 18:10 - Klei Aê Diê Blŭ 2015

¹⁰ Ih srăng ƀơ̆ng mnơ̆ng anăn hlăm sa anôk doh jăk hĭn; grăp čô êkei dưi ƀơ̆ng dŏ anăn; dŏ anăn jing doh jăk kơ ih.

Klei Yap 18:10 Iomraidhean Croise

Y-Êsêkiêl 42:13

Leh anăn ñu lač kơ kâo, “Adŭ tĭng dưr leh anăn adŭ tĭng dhŭng phă hŏng wăl jing adŭ doh jăk, tinăn phung khua ngă yang nao giăm Yêhôwa srăng ƀơ̆ng mnơ̆ng myơr doh jăk hĭn; tinăn diñu srăng dưm mnơ̆ng myơr doh jăk hĭn — mnơ̆ng myơr kpŭng ƀhĭ, mnơ̆ng myơr kyua klei soh, leh anăn mnơ̆ng myơr kyua klei gao klei bhiăn, kyuadah anôk anăn jing doh jăk.

Bruă Lêwi 10:13

Brei diih ƀơ̆ng gơ̆ hlăm sa bĭt anôk doh jăk, kyuadah gơ̆ jing kdrêč pioh kơ ih leh anăn phung anak êkei ih mơ̆ng mnơ̆ng myơr brei pui ƀơ̆ng kơ Yêhôwa. Kyuadah snăn yơh Yêhôwa mtă leh kơ kâo.

Bruă Lêwi 10:17

“Si ngă diih amâo ƀơ̆ng hĕ mnơ̆ng myơr kyua klei soh hlăm adŭ doh jăk, kyuadah gơ̆ jing mnơ̆ng doh jăk hĭn, leh anăn Yêhôwa brei leh kơ diih čiăng kơ diih dưi klam klei wê phung bi kƀĭn, čiăng ngă klei bi doh klei soh kơ diñu ti anăp Yêhôwa?

Bruă Lêwi 14:13

Ñu srăng koh êđai biăp hlăm anôk arăng koh mnơ̆ng myơr kyua klei soh leh anăn mnơ̆ng myơr čuh, hlăm anôk doh jăk; kyuadah mnơ̆ng myơr kyua klei gao klei bhiăn msĕ si mnơ̆ng myơr kyua klei soh pioh kơ khua ngă yang; mnơ̆ng anăn jing doh jăk hĭn.

Bruă Lêwi 21:22

Ñu dưi ƀơ̆ng mnơ̆ng ƀơ̆ng huă Aê Diê ñu, wăt mnơ̆ng doh jăk hĭn leh anăn mnơ̆ng doh jăk,

Bruă Lêwi 6:16

Y-Arôn leh anăn phung anak êkei ñu srăng ƀơ̆ng ya mnơ̆ng adôk; diñu srăng ƀơ̆ng gơ̆ amâo mâo kpei hlăm sa bĭt anôk doh jăk; hlăm wăl sang čhiăm klei bi kƀĭn diñu srăng ƀơ̆ng gơ̆.

Bruă Lêwi 6:18

Grăp čô êkei hlăm phung anak Y-Arôn dưi ƀơ̆ng gơ̆, msĕ si mtă leh hlŏng lar hlăm jih jang ênuk diih, mơ̆ng mnơ̆ng myơr brei pui ƀơ̆ng kơ Yêhôwa; hlei pô ruêh mnơ̆ng anăn srăng jing doh jăk.”

Bruă Lêwi 6:26

Khua ngă yang pô myơr gơ̆ kyua klei soh srăng ƀơ̆ng gơ̆; arăng srăng ƀơ̆ng gơ̆ hlăm sa bĭt anôk doh jăk hlăm wăl sang čhiăm klei bi kƀĭn.

Bruă Lêwi 6:29

Grăp čô êkei hlăm phung khua ngă yang dưi ƀơ̆ng gơ̆; gơ̆ jing doh jăk hĭn.

Bruă Lêwi 7:6

Grăp čô êkei hlăm phung khua ngă yang dưi ƀơ̆ng gơ̆; arăng srăng ƀơ̆ng gơ̆ hlăm sa bĭt anôk doh jăk; gơ̆ jing doh jăk hĭn.

Klei Yap 18:11

Anei msĕ mơh jing dŏ ih, mnơ̆ng myơr mơ̆ng dŏ diñu brei, jih jang mnơ̆ng myơr hdai mơ̆ng phung ƀuôn sang Israel; Kâo brei dŏ anăn kơ ih, kơ phung anak êkei leh anăn phung anak mniê ih mbĭt hŏng ih, jing klei djŏ dôk nanao; grăp čô hlei pô jing doh hlăm sang ih dưi ƀơ̆ng dŏ anăn.

Klei Yap 18:9

Anei srăng jing dŏ ih mơ̆ng mnơ̆ng doh jăk hĭn arăng pioh leh amâo čuh ôh, grăp mnơ̆ng diñu myơr, grăp mnơ̆ng myơr kpŭng ƀhĭ diñu, grăp mnơ̆ng myơr kyua klei soh diñu, leh anăn grăp mnơ̆ng myơr kyua klei gao klei bhiăn diñu, mnơ̆ng diñu myơr kơ Kâo srăng jing doh jăk hĭn kơ ih leh anăn kơ phung anak êkei ih.