Klei Mphŭn Dơ̆ng 13:16 - Klei Aê Diê Blŭ 2015

¹⁶ Kâo srăng brei phung anak čô ih jing lu msĕ si ƀruih lăn. Snăn tơdah arăng dưi yap ƀruih lăn, arăng dưi mơh yap phung anak čô ih.

Klei Mphŭn Dơ̆ng 13:16 Iomraidhean Croise

Klei Mphŭn Dơ̆ng 15:5

Ñu atăt ba Y-Abram kơ tač leh anăn lač, “Kngưr ală ih phă adiê leh anăn yap mtŭ tơdah ih dưi.” Leh anăn Ñu lač kơ gơ̆, “Msĕ snăn yơh anak čô ih srăng jing.”

Klei Mphŭn Dơ̆ng 16:10

Dĭng buăl jăk Khua Yang lač kơ gơ̆, “Kâo srăng bi lar phung anak čô ih tơl arăng amâo dưi yap ôh.”

Klei Mphŭn Dơ̆ng 17:16

Kâo srăng brei klei jăk jĭn kơ ñu, leh anăn Kâo srăng brei ñu kkiêng sa čô anak êkei kơ ih. Kâo srăng brei klei jăk jĭn kơ ñu; ñu srăng jing amĭ kơ lu phung găp djuê mnuih; phung mtao kơ phung găp djuê srăng kbiă mơ̆ng ñu.”

Klei Mphŭn Dơ̆ng 17:2

Kâo srăng ngă klei bi mguôp hŏng ih, leh anăn Kâo srăng bi lar phung anak čô ih lu snăk.”

Klei Mphŭn Dơ̆ng 17:20

Bi kơ Y-Ismaêl, Kâo hmư̆ klei ih lač leh. Nĕ anei, Kâo srăng brei klei jăk jĭn kơ ñu, leh anăn Kâo srăng bi lar phung anak čô ñu lu snăk. Ñu srăng jing ama kơ pluh dua čô anak mtao; leh anăn Kâo srăng brei ñu jing sa găp djuê prŏng.

Klei Mphŭn Dơ̆ng 17:6

Kâo srăng brei ih mâo lu anak čô, leh anăn Kâo srăng bi kbiă phung găp djuê mnuih mơ̆ng ih, leh anăn phung mtao srăng kbiă mơ̆ng ih.

Klei Mphŭn Dơ̆ng 18:18

Kyuadah Y-Abraham srăng jing sa phung găp djuê prŏng leh anăn ktang, leh anăn jih jang phung găp djuê hlăm lăn ala srăng mâo klei jăk jĭn hlăm ñu.

Klei Mphŭn Dơ̆ng 21:13

Kâo srăng mjing mơh kơ anak êkei mniê hlŭn ih sa phung găp djuê, kyuadah ñu jing anak ih mơh.”

Klei Mphŭn Dơ̆ng 22:17

Kâo srăng brei klei jăk jĭn kơ ih, leh anăn Kâo srăng bi lar phung anak čô ih msĕ si mtŭ hlăm adiê leh anăn msĕ si čuah ti hang êa ksĭ. Leh anăn phung anak čô ih srăng dưi hŏng phung roh diñu.

Klei Mphŭn Dơ̆ng 26:4

Kâo srăng bi lar phung anak čô ih msĕ si mtŭ hlăm adiê; leh anăn Kâo srăng brei jih čar anei kơ phung anak čô ih. Jih jang găp djuê hlăm lăn ala srăng mâo klei jăk jĭn kyua phung anak čô ih;

Klei Mphŭn Dơ̆ng 28:14

Phung anak čô ih srăng jing lu msĕ si ƀruih lăn; ih srăng bi lar phă yŭ, phă ngŏ, phă dưr, leh anăn phă dhŭng, leh anăn jih jang phung găp djuê hlăm lăn ala srăng mâo klei jăk jĭn kyua ih leh anăn kyua phung anak čô ih.

Klei Mphŭn Dơ̆ng 28:3

Brei Aê Diê, Pô Mâo Jih Klei Myang, brei klei jăk jĭn kơ ih leh anăn bi lar êngŭm ih, čiăng kơ ih srăng jing sa phung ƀuôn sang lu.

Klei Mphŭn Dơ̆ng 32:12

Ƀiădah Ih lač leh, ‘Kâo srăng ngă klei jăk kơ ih, leh anăn Kâo srăng brei phung anak čô ih lu msĕ si čuah êa ksĭ, arăng amâo dưi yap ôh kyuadah lu êdimima.’ ”

Klei Mphŭn Dơ̆ng 32:13

Ñu đăm tinăn mlam anăn. Ñu mă đa mnơ̆ng ñu mâo mbĭt hŏng ñu čiăng myơr kơ Y-Êsâo ayŏng ñu:

Klei Mphŭn Dơ̆ng 35:11

Aê Diê lač kơ ñu, “Kâo jing Aê Diê, Pô Mâo Jih Klei Myang. Brei ih bi lar êngŭm. Sa phung găp djuê leh anăn lu phung găp djuê srăng kbiă hriê mơ̆ng ih, leh anăn mơ̆ng tian prôč ih srăng kbiă phung mtao.

Klei Mphŭn Dơ̆ng 46:3

Aê Diê lač, “Kâo jing Aê Diê, Aê Diê ama ih. Đăm huĭ ôh trŭn nao kơ čar Êjip; kyuadah tinăn Kâo srăng brei ih jing sa găp djuê prŏng.

I Bruă Mtao 3:8

Leh anăn dĭng buăl Ih dôk ti krah phung ƀuôn sang Ih ruah leh, sa phung ƀuôn sang êngŭm, amâo dưi yap ôh kyua lu đei.

I Bruă Mtao 4:20

Phung Yuđa leh anăn phung Israel jing lu msĕ si čuah ti êa ksĭ. Diñu ƀơ̆ng huă mnăm leh anăn hơ̆k snăk.

II Bruă Mtao 13:23

Ƀiădah Yêhôwa pap kơ diñu leh anăn hơiêng kơ diñu, leh anăn Yêhôwa wir phă diñu, kyua klei Gơ̆ bi mguôp leh hŏng Y-Abraham, Y-Isăk, leh anăn Y-Yakôp, leh anăn amâo čiăng bi rai diñu ôh, kăn suôt diñu mơ̆ng anăp Gơ̆ rei hlŏng kơ hruê anei.

I Klei Yăl Dliê 21:5

Y-Jôap brei ênoh phung ƀuôn sang ñu yap leh kơ Y-Đawit. Hlăm jih čar Israel mâo sa klăk sa êtuh êbâo êkei dưi djă đao gưm, leh anăn hlăm čar Yuđa mâo pă êtuh kjuh pluh êbâo dưi djă đao gưm.

I Klei Yăl Dliê 27:23

Y-Đawit amâo yap ôh phung ti gŭ dua pluh thŭn, kyuadah Yêhôwa ƀuăn leh čiăng brei phung Isrel jing lu msĕ si mtŭ hlăm adiê.

II Klei Yăl Dliê 1:9

Ơ Yêhôwa Aê Diê, brei Ih bi sĭt klei Ih ƀuăn leh kơ Y-Đawit ama kâo, kyuadah Ih mjing leh kâo mtao kiă kriê sa phung ƀuôn sang lu msĕ si ƀruih lăn.

Y-Yôp 5:25

Ih srăng thâo msĕ mơh kơ phung anak čô ih srăng jing lu, leh anăn phung čô čĕ ih msĕ si rơ̆k ti lăn ala.

Klei Kbiă 1:7

Ƀiădah phung Israel kkiêng lu anak, jing lar êngŭm, đĭ hĭn, leh anăn jing ktang hĭn nanao; leh anăn čar anăn bŏ hŏng diñu.

Klei Kbiă 32:13

Brei Ih hdơr kơ Y-Abraham, Y-Isăk, leh anăn Y-Israel, phung dĭng buăl Ih, kơ digơ̆ yơh Ih kat asei leh hŏng Ih pô, lač, ‘Kâo srăng bi lar phung anak čô diih msĕ si mtŭ hlăm adiê, leh anăn Kâo srăng brei kơ phung anak čô diih jih lăn čar anei Kâo blŭ leh kơ diih, leh anăn diñu srăng dưn gơ̆ hlŏng lar.’ ”

Y-Yêrêmi 33:22

Msĕ si arăng amâo dưi yap ôh mtŭ hlăm adiê leh anăn amâo dưi mkă čuah êa ksĭ, msĕ snăn mơh Kâo srăng bi lar êngŭm phung anak čô dĭng buăl Kâo Y-Đawit, leh anăn phung khua ngă yang Lêwi mă bruă kơ Kâo.’ ”

Klei Yap 23:10

Hlei pô dưi yap ƀruih phung Yakôp, amâodah yap sa kdrêč hlăm pă phung Israel? Brei kâo djiê hŏng klei djiê phung kpă, leh anăn brei klei knhal tuč kâo jing msĕ si ñu!”

Klei Mtô Mñă Klei Bhiăn 1:10

Yêhôwa Aê Diê diih bi lar êngŭm diih leh, leh anăn nĕ anei, hruê anei diih jing lu msĕ si mtŭ hlăm adiê.

Hêbrơ 11:12

Kyuanăn mơ̆ng sa čô mnuih giăm kơ klei djiê leh, kbiă hriê sa phung anak čô lu msĕ si mtŭ hlăm adiê, leh anăn msĕ si čuah ti hang êa ksĭ amâo dưi yap ôh.

Klei Bi Êdah 7:9

Leh klei anăn kâo dlăng leh anăn nĕ anei, mâo phung mnuih lu snăk arăng amâo dưi yap ôh, mơ̆ng jih jang găp djuê mnuih, mơ̆ng jih jang djuê ana, mơ̆ng jih jang phung ƀuôn sang, leh anăn jih jang klei blŭ. Diñu dôk dơ̆ng ti anăp jhưng mtao leh anăn ti anăp Êđai Biăp, hơô leh ao jhung kô̆ leh anăn djă pak ana boh đung hlăm kngan diñu.

Phung Khua Phat Kđi 6:3

Kyuadah tơdah phung Israel rah mjeh, phung Madian, phung Amalek, leh anăn phung ƀuôn sang mơ̆ng čar Ngŏ hriê ngă kơ diñu.

Phung Khua Phat Kđi 6:5

Kyuadah diñu đĭ hriê mbĭt hŏng hlô mnơ̆ng rông leh anăn sang čhiăm diñu, lu msĕ si ktuôp; arăng amâo dưi yap diñu wăt aseh samô diñu ôh. Snăn diñu bi rai ala čar êjai diñu hriê.