I Y-Samuel 2:2 - Klei Aê Diê Blŭ 2015

² Amâo mâo pô doh jăk msĕ si Yêhôwa ôh, amâo mâo pô mkăn êngao kơ Ih ôh; amâo mâo ôh Boh Tâo msĕ si Aê Diê drei.

I Y-Samuel 2:2 Iomraidhean Croise

II Y-Samuel 22:3

Aê Diê kâo, boh tâo kâo, hlăm ñu kâo đuĕ dăp, khil kâo, leh anăn ki kơ klei bi mtlaih kâo, kđông kâo, leh anăn anôk kâo đuĕ dăp, Pô bi mtlaih kâo; Ih bi mtlaih kâo mơ̆ng klei măk ƀai.

II Y-Samuel 22:32

Kyuadah hlei jing Aê Diê? hjăn Yêhôwa yơh! Leh anăn hlei jing sa Boh Tâo prŏng? knŏng Aê Diê drei yơh!

II Y-Samuel 7:22

Kyuanăn Ih jing prŏng, Ơ Khua Yang Yêhôwa, kyuadah amâo mâo sa čô ôh msĕ si Ih, leh anăn amâo mâo Aê Diê mkăn êngao kơ Ih ôh, tui si jih klei hmei hmư̆ leh hŏng knga hmei.

I Bruă Mtao 8:23

leh anăn lač, “Ơ Yêhôwa, Aê Diê phung Israel! Amâo mâo ôh Aê Diê mkăn msĕ si Ih hlăm adiê ti dlông amâodah ti lăn ala ti gŭ, djă pioh klei bi mguôp leh anăn bi êdah klei khăp sĭt suôr kơ phung dĭng buăl Ih, phung êbat ti anăp Ih hŏng jih ai tiê diñu;

Klei Mmuñ Hđăp 111:9

Ñu brei leh klei bi tui kơ phung ƀuôn sang Ñu; Ñu ngă klei bi mguôp hlŏng lar, Anăn Ñu doh jăk leh anăn năng huĭ.

Klei Mmuñ Hđăp 18:2

Yêhôwa jing boh tâo kâo, kđông mgang kâo, leh anăn pô bi êngiê kâo, Aê Diê kâo, boh tâo kâo, hlăm Ih kâo đuĕ dăp, khil kâo, ki kơ klei bi mtlaih kâo, anôk sang tum kâo kđap.

Klei Mmuñ Hđăp 18:31

Kyuadah hlei jing Aê Diê, knŏng hjăn Yêhôwa yơh! Hlei jing boh tâo kjăp, knŏng hjăn Aê Diê drei yơh!

Klei Mmuñ Hđăp 71:19

Klei kpă ênô Ih, Ơ Aê Diê, truh ti adiê dlông. Ih ngă leh lu bruă prŏng, Ơ Aê Diê, hlei jing msĕ si Ih?

Klei Mmuñ Hđăp 71:3

Brei Ih jing boh tâo kơ kâo dưi đuĕ dăp nanao, Ih mtă leh čiăng bi mtlaih kâo, kyuadah Ih jing boh tâo kâo leh anăn kđông mgang kâo.

Klei Mmuñ Hđăp 73:25

Hlei pô mkăn kâo mâo hlăm adiê, knŏng Ih yơh. Leh anăn ti lăn ala kâo amâo čiăng kơ mnơ̆ng mkăn ôh, knŏng hjăn Ih.

Klei Mmuñ Hđăp 86:8

Ơ Khua Yang, amâo mâo ôh pô jing msĕ si Ih hlăm phung yang; kăn mâo bruă mkăn rei msĕ si bruă Ih.

Klei Mmuñ Hđăp 89:6

Kyuadah hlei pô hlăm jih adiê arăng dưi bi mđơr hŏng Yêhôwa? Hlei pô hlăm phung anak êkei Aê Diê jing msĕ si Yêhôwa?

Klei Mmuñ Hđăp 89:8

Ơ Yêhôwa, Aê Diê kơ phung kahan, hlei pô myang msĕ si Ih, Ơ Yêhôwa? Klei sĭt suôr Ih dôk jŭm Ih.

Klei Mmuñ Hđăp 99:3

Brei diñu bi mni kơ anăn Ih prŏng leh anăn năng kơ arăng huĭ; Ñu yơh jing doh jăk.

Klei Mmuñ Hđăp 99:5

Mpŭ mni bĕ kơ Yêhôwa Aê Diê drei, buôn kkuh bĕ ti anăp mdhô̆ Ñu trông jơ̆ng; Ñu yơh jing doh jăk.

Klei Mmuñ Hđăp 99:9

Mpŭ mni bĕ kơ Yêhôwa Aê Diê drei, leh anăn kkuh mpŭ bĕ ti čư̆ doh jăk Ñu; kyuadah Yêhôwa Aê Diê drei jing doh jăk.

Klei Kbiă 15:11

Hlei yang jing msĕ si Ih, Ơ Yêhôwa? Hlei jing msĕ si Ih, guh kơang hlăm klei doh jăk, Pô thâo bi huĭ hŏng bruă guh kơang, ngă lu klei yuôm bhăn?

Y-Êsai 40:18

Hŏng hlei pô ih čiăng bi msĕ Aê Diê, amâodah ya mnơ̆ng ih dưi bi mđơr hŏng Ñu?

Y-Êsai 44:6

Snei Yêhôwa, Mtao Israel leh anăn Pô Bi Tui, Yêhôwa kơ phung kahan lač: “Kâo jing Pô tal êlâo hĭn leh anăn Pô knhal tuč; ti êngao kơ Kâo amâo lŏ mâo Aê Diê mkăn ôh.

Y-Êsai 44:8

Đăm huĭ ôh, kăn hyưt rei, amâo djŏ hĕ Kâo hưn leh klei anăn kơ diih mơ̆ng sui leh, leh anăn bi êdah leh klei anăn? Diih jing phung hưn bi sĭt kơ Kâo! Mâo mơ̆ sa čô Aê Diê mkăn êngao kơ Kâo? Hơăi! Amâo mâo Boh Tâo ôh; Kâo amâo thâo pô mkăn ôh.”

Y-Êsai 57:15

Kyuadah snei Pô Ti Dlông Hĭn, Pô dôk hlŏng lar, anăn Ñu jing Doh Jăk, lač: “Kâo dôk hlăm anôk ti dlông leh anăn doh jăk, leh anăn msĕ mơh mbĭt hŏng pô mâo ai tiê ênguôt kơ klei soh leh anăn thâo luă gŭ, čiăng lŏ bi hdĭp ai tiê phung luă gŭ, čiăng lŏ bi hdĭp ai tiê pô ênguôt kơ klei soh.

Y-Êsai 6:3

Digơ̆ ur hdơ̆ng digơ̆, lač, “Doh jăk, doh jăk, doh jăk yơh Yêhôwa kơ phung kahan; jih lăn ala bŏ hŏng klei guh kơang Ñu.”

Y-Yêrêmi 10:6

Amâo mâo pô mkăn msĕ si Ih, Ơ Yêhôwa, Ih jing prŏng, Anăn Ih jing prŏng hŏng klei myang.

Bruă Lêwi 11:44

Kyuadah Kâo jing Yêhôwa Aê Diê diih; snăn pioh brei diih pô, leh anăn jing doh jăk, kyuadah Kâo pô jing doh jăk. Đăm diih bi čhŏ diih pô kyua sa mnơ̆ng bi phung êrui ti rŏng lăn ala.

Bruă Lêwi 11:45

Kyuadah Kâo jing Yêhôwa Pô atăt ba leh diih kbiă mơ̆ng čar Êjip, čiăng jing Aê Diê diih; snăn brei diih jing doh jăk, kyuadah Kâo pô jing doh jăk.

Bruă Lêwi 19:2

“Lač bĕ kơ jih phung ƀuôn sang Israel bi kƀĭn, ‘Brei diih jing doh jăk, kyuadah Kâo, Yêhôwa Aê Diê diih jing doh jăk.

Hră Y-Pôl Mơĭt kơ Phung Rôm 15:4

Kyuadah jih Klei Aê Diê Blŭ čih leh ênuk êlâo jing klei pioh bi hriăm drei, čiăng kơ drei dưi mâo klei čang hmăng kbiă hriê mơ̆ng klei gĭr leh anăn klei bi juh mơ̆ng Klei Aê Diê Blŭ čih leh.

Hră Y-Pôl Mơĭt kơ Phung Rôm 4:8

Jăk mơak yơh mnuih Khua Yang amâo yap ôh klei soh ñu.”

Klei Mtô Mñă Klei Bhiăn 3:24

‘Ơ Khua Yang Yêhôwa, Ih knŏng dơ̆ng bi êdah kơ dĭng buăl Ih klei Ih jing prŏng leh anăn kngan myang Ih; kyuadah hlei yang ti adiê amâodah ti lăn ala dưi ngă bruă leh anăn klei yuôm bhăn msĕ si Ih?

Klei Mtô Mñă Klei Bhiăn 32:20

Ñu lač, “Kâo srăng mdăp ƀô̆ mta Kâo kơ diñu, Kâo srăng ƀuh ya srăng jing klei tuč ruê̆ diñu, kyuadah diñu jing sa găp djuê wê jhat snăk, phung anak amâo mâo klei sĭt suôr ôh.

Klei Mtô Mñă Klei Bhiăn 32:39

Ară anei brei diih thâo Kâo, Kâo gơ̆, jing Aê Diê, leh anăn amâo mâo yang mkăn ôh êngao kơ Kâo; Kâo bi mdjiê leh anăn Kâo bi hdĭp; Kâo bi êka leh anăn Kâo bi hlao; leh anăn amâo mâo pô dưi bi mtlaih mơ̆ng kngan Kâo ôh.

Klei Mtô Mñă Klei Bhiăn 32:4

Ñu jing Boh Tâo Prŏng, bruă Ñu jing klă, kyuadah jih jang êlan Ñu jing kpă. Aê Diê Pô sĭt suôr leh anăn amâo mâo klei wê ôh, Ñu jing kpă leh anăn djŏ.

Klei Mtô Mñă Klei Bhiăn 4:35

Arăng bi êdah leh kơ diih klei anăn, čiăng kơ diih dưi thâo Yêhôwa jing Aê Diê, amâo lŏ mâo pô mkăn ôh.

Klei Mtô Mñă Klei Bhiăn 4:39

Snăn brei diih thâo hruê anei, leh anăn djă pioh bĕ hlăm ai tiê diih, Yêhôwa jing Aê Diê hlăm adiê ti dlông leh anăn hlăm lăn ala ti gŭ; amâo lŏ mâo pô mkăn ôh.

I Y-Pêtrôs 1:16

Kyuadah Klei Aê Diê Blŭ čih leh, “Brei diih jing doh jăk, kyuadah Kâo pô jing doh jăk.”