I Bruă Mtao 8:25 - Klei Aê Diê Blŭ 2015

²⁵ Snăn ară anei, Ơ Yêhôwa, Aê Diê phung Israel, djă pioh bĕ klei Ih ƀuăn leh kơ dĭng buăl Ih Y-Đawit ama kâo, klei Ih ƀuăn leh kơ ñu, lač, ‘Ti anăp Kâo ih amâo srăng kƀah ôh sa čô mnuih dôk gŭ ti jhưng mtao Israel, knŏng tơdah phung anak êkei ih răng kơ êlan diñu, êbat ti anăp Kâo msĕ si ih êbat leh ti anăp Kâo.’

I Bruă Mtao 8:25 Iomraidhean Croise

I Bruă Mtao 2:4

čiăng kơ Yêhôwa dưi bi sĭt klei Ñu blŭ leh djŏ kơ kâo, lač, ‘Tơdah phung anak êkei ih răng kơ êlan diñu čiăng êbat ti anăp Kâo hlăm klei sĭt suôr hŏng jih ai tiê leh anăn jih mngăt diñu, amâo srăng kƀah sa čô êkei ôh čuê anôk ih ti jhưng mtao phung Israel.’

I Klei Yăl Dliê 28:9

Leh anăn bi ih, Ơ Y-Salômôn anak êkei kâo, thâo kral bĕ Aê Diê ama ih, leh anăn mă bruă bĕ kơ ñu hŏng jih ai tiê leh anăn hŏng klei mĭn čiăng; kyuadah Yêhôwa ksiêm dlăng jih jang ai tiê, leh anăn ñu thâo săng jih jang hdră leh anăn klei mĭn. Tơdah ih duah ñu, ñu srăng brei ih ƀuh ñu; ƀiădah tơdah ih lui ñu, ñu srăng suôt ih hlŏng lar.

I Bruă Mtao 8:24

Pô djă pioh leh hŏng dĭng buăl Ih Y-Đawit ama kâo klei Ih hưn leh kơ ñu. Sĭt nik Ih blŭ leh hŏng ƀăng êgei Ih, leh anăn hŏng kngan Ih, Ih bi sĭt leh klei anăn hruê anei.

Klei Mmuñ Hđăp 119:9

Si êkei hlăk ai srăng bi doh êlan ñu? Hŏng klei ñu gưt kơ klei Ih blŭ yơh.

I Bruă Mtao 3:3

Y-Salômôn khăp kơ Yêhôwa, êbat hlăm klei bhiăn Y-Đawit ama ñu; ƀiădah ñu ngă yang leh anăn čuh mnơ̆ng ƀâo mngưi ti anôk dlông.

Klei Mmuñ Hđăp 132:12

Tơdah phung anak êkei ih djă pioh klei Kâo bi mguôp leh anăn klei hưn Kâo srăng bi hriăm diñu, snăn phung anak diñu mơh srăng dôk ti jhưng mtao ih nanao hlŏng lar.”